LEVI 20
20
Khusalilitswa Khuvula Khulonda Malako ka Nyasaye
1Mwami Nyasaye yavoolela Musa, 2“Voolela Vaisraeli ndi mundu Muisraeli wosi inoho mundu mucheni wumenyanga mu munyi, uliitsa khuhaana mulala khu vaana veve khu nyasaye Moleki, aliitsa khwiirwa. Vaisraeli voosi valiitsa khumulesa na machina. 3Niiva mundu aliitsa khuhaana mwana wewe mulala khu Moleki nu khukhola Liheemo Litakatifu lianje lioneshe nu khukholela lira lianje litakatifu tsisoni, niitsa khumwambakhana nu khumukhunga khurula mu vandu vaanje. 4Navutswa niiva Vaisraeli, valiitsa khuvula khwenya khumanya ku mundu mwenoyo akholi, khandi mavambakhane khumwiira, 5inzi mwene niitsa khwambakhana mundu mwenoyo, nende vandu voosi vi inzu yeye; khandi yavo voosi vasanganga naye khuvula khuva vasuuvilwa khwinzi nivasaala khu Moleki. Niitsa khukhunga vandu venavo, khurula mu vandu vaanje.
6“Niiva mundu atsitsanga khureeva inganagani khu vandu vareevilitsanga vandu vakhutsa, niitsa khumwambakhana nu khumukhunga khurula mu vandu vaanje. 7Mutsililile vene khuva vatakatifu, shichila ninzi Mwami Nyasaye wenyu. 8Mulonde malako kaanje, shichila ninzi Mwami Nyasaye, khandi mukholanga khuva vatakatifu.
9“Shia mundu wosi ulaamanga tata wewe inoho mama wewe, aliitsa khwiirwa; aliitsa khukhutsa, shichila vindu vitamanu vievie via yakhola.
10“Niiva mundu musatsa aliitsa khukhola vuheeyi nu mukhali, wu mureende wewe, ye mwene nende mukhali wa vakholi vuheeyi naye valiitsa khwiirwa. 11Niiva mundu musatsa aliitsa khukona nu mukhali wa tata wewe, mundu mwenoyo aliitsa khuva ukholele tata wewe tsisoni. Mundu musatsa mwenoyo, halala nu mukhali woyo valiitsa khwiirwa; valiitsa khukhutsa, shichila vindu vitamanu viavo. 12Niiva mundu musatsa, aliitsa khukona na kukhu wewe mukhana, vo vavili, valiitsa khwiirwa. Vakholi luswa, khandi valiitsa khukhutsa, shichila vindu vitamanu viavo. 13Niiva mundu musatsa aliitsa khukona nu musatsa weshie, vakholi luswa; khandi vo vavili valiitsa khwiirwa. Valiitsa khukhutsa shichila vindu vitamanu viavo. 14Niiva mundu musatsa, aliitsa khuhila mukhali khali na mama wu mukhali wewe mwenoyo, khuli vakhali veve, vo vavaka voosi valiitsa khusambwa nu mulilu, khutukha lwa vakhutsa shichila vakholi shikholwa shi tsisoni. Shikholwa shitamanu khuli shienesho shilitsa khuvula khwikholekhakhu mu munyi. 15Niiva mundu musatsa, aliitsa khukona nu muruku, mundu mwenoyo aliitsa khwiirwa, halala nu muruku kwenoko. 16Niiva mundu mukhali, aliitsa khuchelitsa khukona nu muruku, mukhali mwenoyo aliitsa khwiirwa, halala nu muruku kwenoko. Mukhali mwenoyo, aliitsa khukhutsa halala nu muruku, shichila vindu vitamanu vievie.
17“Niiva mundu musatsa, aliitsa khuhila mbotso wewe, ave mwana wi shikhana wa tata wewe inoho wa mama wewe, ma vakone halala, valiitsa khuva vakholi tsisoni. Valiitsa khukhungwa khurula mu vandu vavo. Aliitsa khuva ukholele mbotso wewe tsisoni khandi aliitsa khusalilitswa shichila ka mwene akholi. 18Niiva mundu musatsa aliitsa khukona nu mukhali nali mu mweli, vo vavili valiitsa khukhungwa khurula mu vandu vavo, shichila vameneche malako khulondokhana khu mulukha kukhwonekha.
19“Niiva mundu musatsa aliitsa khukona na senje wewe, vo vavili valiitsa khusalilitswa shichila vakholi luswa. 20Niiva mundu musatsa aliitsa khukona nu mukhali wa khootsa wewe, aliitsa khuva nakholele khootsa wewe tsisoni; khandi ye halala nu mukhali mwenoyo, valiitsa khurunga shivaso; khali mulala khuvo, shialiitsa khwivulakhu mwana tawe. 21Niiva mundu musatsa aliitsa khuhila mukhali wa amwavo wewe, aliitsa khuva ukholele amwavo wewe tsisoni. Vo vavili valiitsa khukhutsa, vuchila khwivulakhu mwana. Aliitsa khuva ukholi shikholwa shinyala khumukhola khuva woneshe.”
22Mwami Nyasaye yavoola, “Mutsililile khulonda malako kaanje nende makhuva kaanje, khu shivala shia Kanaani, shia nzitsanga khumuleramu shilivula khumwambakhana. 23Muvuli khulondakhu miima chia vandu vamenyanga mu shivala shienesho. Niitsa khumukhunjila vandu vi tsimbia tsienetso, khu mwinjile mu shivala shienesho. Vasiinya, shichila vakholanga vikholwa vitamanu. 24Navutswa mali khulaaka khumuha shivala shinuulu khandi shi lilova lilahi nende vushi; khandi niitsa khumuha shivala shienesho. Ninzi Mwami Nyasaye, uli Nyasaye wenyu; khandi ninzi wamwahula haluveka khurula mu vandu vi tsimbia tsindi tsiosi. 25Khulwa yako, muliitsa khwavukhanyinya vulahi, hakari hi miruku chili minihu khandi chioneshe, khandi hakari ha manyonyi kali manihu khandi koneshe. Muvuli khuliakhu miruku chioneshe, inoho manyonyi koneshe. Namala khuviritsa havulavu khuva chioneshe; khandi niiva muliitsa khulia, muliitsa khuva mwoneshe. 26Muliitsa khuva vandu vatakatifu, ma muve vandu vaanje wonyene, shichila ninzi Mwami Nyasaye khandi ndi mutakatifu. Ninzi wamwahula haluveka, khurula mu vandu vi tsimbia tsindi tsiosi, khu muve vandu vaanje mwene.
27“Mundu musatsa inoho mukhali wu kholanga makhumu inoho vuloochi, aliitsa khuleswa na machina, khutukha lwa aliitsa khukhutsa. Shia mundu wosi wu kholanga kenako, aliitsa khukhutsa shichila vindu vitamanu vievie.”
Currently Selected:
LEVI 20: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
