LEVI 18

Khuhilana khu Musatsa nu Mukhali Khuheelwi Luyali

1Mwami Nyasaye yavoolela Musa 2avoolele Vaisraeli, “Ninzi Mwami Nyasaye, uli Nyasaye wenyu. 3Muvuli khulondakhu miima chia Vamisri, wa mwamenyakhu khale, inoho miima chia vandu vamenyanga mu shivala shia Kanaani, wamuhilanga khumenyamu nunundi. 4Mutsililile khulonda malako kaanje nende mechitso kaanje, shichila ninzi Mwami Nyasaye, uli Nyasaye wenyu. 5Mulonde mechitso nende malako kaanje; shichila mundu uliitsa khukalonda, aliitsa khuva mwoyo khuvirila muko. Ninzi Mwami Nyasaye.

6“Khali mulala khu munyi, yenyekhanga avuli khukona nu mundu wosi mu viikho veve. Ninzi Mwami Nyasaye. 7Khali mulala khu munyi, yenyekhanga avuli khukholelakhu tata wenyu tsisoni, lwa akonanga na mama wewe. Ni mama wowo. Wenyekhanga uvuli khukona na mama wowo. 8Khali mulala khu munyi, yenyekhanga avuli khukholelakhu tata wewe tsisoni, nakona nu mulala khu vakhali veve vandi. 9Khali mulala khu munyi, yenyekhanga avuli khukona na mbotso wewe, inoho mwana wi shikhana wa tata wewe yivula ilwanyi, kave mwivulwa naye munzu indala inoho shiu mwivulwa naye tawe. 10Khali mulala khu munyi, yenyekhanga avuli khukona nu mwana wi shikhana wu mwana wavo inoho mwana wi shikhana wavo yivula; kaliitsa khumuha tsisoni. 11Khali mulala khu munyi, yenyekhanga avuli khukona nu mwana wi shikhana wa tata wewe yivula khu mama wewe wundi; khali ye khandi, ni mbotso wowo. 12Khali mulala khu munyi, yenyekhanga avuli khukonakhu na senje wewe; nu mwana wi shikhana wanga tata wowo. 13Khali mulala khu munyi, yenyekhanga avuli khukona nu mwana wi shikhana wanga mama wewe, shichila nu mwiikho wa hahimbi wa mama wowo. 14Khali mulala khu munyi, yenyekhanga avuli khukona nu mukhali wa khootsa wewe; khali ye ni senje wowo. 15Khali mulala khu munyi, yenyekhanga avuli khukona na nakukhu wewe wi shikhana. Nu mukhali wu mwana wowo muyayi; uvuli khukona naye. 16Khali mulala khu munyi, yenyekhanga avuli khukona nu mukhali wa amwavo wewe yahila; kaliitsa khumuha tsisoni. 17Khali mulala khu munyi, yenyekhanga avuli khukonakhu nu mundu mukhali nende mwana wi shikhana wewe wayivula. Uvuli khukona nu mwana wi shikhana wa amwavo wewe inoho mbotso wewe yivula; ni viikho veve va hahimbi. Nu muchilo khukhola mwiima khuli kwenoko. 18Khali mulala khu munyi, yenyekhanga avuli khuhila mwana wi shikhana wanga mukhali wewe khuva khuli mulala khu vakhali veve; inoho khukona naye, mukhali wewe nashili mwoyo.

19“Khali mulala khu munyi, yenyekhanga avuli khukona nu mukhali nali mumatukhu keke ku mumweli; shichila aliitsa khuva woneshe khulondokhana khu mulukha. 20Khali mulala khu munyi, yenyekhanga avuli khukona nu mukhali wu musatsa wundi; yaka kaliitsa khukhukhola khuva woneshe khulondokhana khu mulukha. 21Uliitsa khuvula khuhaanakhu khali mulala khu vaana vovo khurumishilwa khusaala khu nyasaye ulaangwangwa Moleki; shichila kaliitsa khulerela lira lia Nyasaye wowo tsisoni. Ninzi Mwami Nyasaye. 22Mundu musatsa aliitsa khuvula khukona nu mundu musatsa wundi; Nyasaye wayambakhana mwiima khuli kenako. 23Mundu musatsa inoho mukhali aliitsa khuvula khukona ni inyama yosi; muchilo kwa aliitsa khuva nakholi kwenoko kuliitsa khumukhola ave woneshe.

24“Khali mulala khu munyi, yenyekhanga aliitsa khuvula khwiyononyinya mu vikholwa khuli vienevo, shichila nindi vandu vatamanu vakorwa Nyasaye viyononyinya vene. Navo vandu vali vu khuraanga khumenya mu shivala yishi, khali numushili khwinjilamu, khandi vu Mwami Nyasaye akhunganga, khu mwinjilimu. 25Vikholwa viavo vialomba shivala khuva shioneshe, khandi Mwami Nyasaye asalilitsanga vandu vu mu shivala, khandi avalombanga khwambakhana vandu vamenyanga khale mushio. 26Navutswa mutsililile khulonda makhuva kaanje nende malako kaanje. Shia mundu Muisraeli wosi inoho mundu mucheni wosi, wumenyanga mu munyi aliitsa khuvula khukholakhu vindu vi tsisoni khuli vienevo; 27shichila vindu vienevo viosi viakholwa na vandu vamenyanga khale mu shivala yishi, numushili khwinjilamu; ma shivala shienesho nishiva shioneshe; 28niiva muliitsa khulomba shivala khuva shioneshe, shilitsa khumwambakhana khuli shiambakhana vandu vamenyanga mushio khale, munyi numushili khwinjilamu. 29Mwamanya ndi mundu uliitsa khukholakhu vikholwa viu khulera tsisoni khuli vienevo, aliitsa khukhungwa khurula mu vandu veve.”

30Mwami Nyasaye yavoola, “Mulonde mivaalo kaanje, nu khuvula khulondakhu mwiima kwi shifwavi, kwa vandu vali nivamenya khale mu shivala shinu, munyi numushili khwinjilamu vakholanga. Muvuli khuva khuli vandu voneshe, lwa mukholanga shikholwa shiosi mu vikholwa khuli vienevo. Ninzi Mwami Nyasaye, uli Nyasaye wenyu.”

Currently Selected:

LEVI 18: LLLCATHOLIC

Highlight

Copy