LEVI 14
14
Khunihitswa khwa Vandu Valwala Vuchele
1Mwami Nyasaye yavoolela Musa, 2“Yaka nako malako khulondokhana khu mundu walwala vulwale vu vuchele, khulitukhu liakholwangwa khuva munihu, lwa ahilwangwa khu musalisi: 3Musalisi aliitsa khumuhila ihale wene, khurula mu maheemo ka vandu vamenyamu mamukole. Niiva mundu mwenoyo aliitsa khuva wahona khurula mu vulwale vu vuchele vwenovo, 4musalisi aliitsa khuhaana lilako ndi manyonyi kavili manihu kashili mwoyo, ku khukholela mulukha kalerwi, halala ni shitonye shiu lusia lu musala kwa ceda, mukoye mumuuchi nende lusia lu musala kwa hisopu. 5Musalisi aliitsa khuhaana lilako ndi linyonyi lilala khu manyonyi kenako, khusinzwa mu inyungu yalombwa khu litohi ilimu na matsi kashindi khurula mu isieveye. 6Musalisi aliitsa khuvukula linyonyi lindi yelo khulinikha mu masahi ki linyonyi liali niliasinzwa, halala ni shitonye shiu musala kwa ceda, mukoye mumuuchi nende lusia lu musala kwa hisopu. 7Musalisi aliitsa khumitsa hali saba masahi kenako khu mundu utushili khukholwa khuva munihu khurula mu vulwale vu vuchele. Nalwo lwa aliitsa khuvukulwa khuva munihu. Musalisi aliitsa khulakhula linyonyi lishili mwoyo yelo khupulukha khutsia mu milimi. 8Mundu ukholwa khuva munihu, aliitsa khufuya tsinguvu tsietsie, khuveka liswi lielie liosi khu murwi kwekwe, nu khwisinga na matsi; khandi khukholwa khuva munihu. Namali khukholwa kenako, anyala khwinjila mu maheemo ka vandu vamenyamu; navutswa aliitsa khumenya khumatukhu saba ihale wene khurula khu liheemo lielie. 9Khulitukhu lia saba, aliitsa khuveka khandi liswi lielie liosi, matelu keke, visichi vievie nende maswa koosi kali khu mmbili kwekwe. Aliitsa khufuya tsinguvu tsietsie na matsi, nu khwisinga; nu khuva munihu khulondokhana khu mulukha.
10“Aliitsa khulera khulitukhu lia munane makondi mamiiko kavili, nende likondi likhali lilala nu muhika mulala vuchila imbala yosi, vusi vwa tsukanywa makura ku musayituni tsikilo tsivaka nende makura ku musayituni tsilita 6.5. 11Musalisi aliitsa khuhila mundu mwenoyo halala ni vihanwa vienevo mu vwinjililu vwi Liheemo Litakatifu. 12Musalisi aliitsa khuvukula likondi lilala khu makondi mamiiko kenako, na makura tsilita 6.5 mahaane khuli shihanwa shiu khuvasa. Musalisi aliitsa khushihaana khuli shihanwa shilahi shiene muno khu Mwami Nyasaye, shichila musalisi. 13Musalisi aliitsa khusinzila likondi Havundu Hatakatifu, hi miruku chi vihanwa viu khurulitsaho vwoni nende vihanwa viu khusambwa visinzilwangwa. Aliitsa khukhola kenako shichila shihanwa shiu khuvasa, khuli shihanwa shiu khurulitsaho vwoni ni shiu musalisi khandi ni shitakatifu muno. 14Musalisi aliitsa khuvukula masahi mati khu masahi ki likondi, akaveshe khu liroyi lisatsa liu mundu mwenoyo, khu shitere shikali shiu khu mukhono kwekwe musatsa, khandi khu shitere shikali shiu khu shilenje shisatsa shiu mundu utushili khukholwa khuva munihu khulondokhana khu mulukha. 15Musalisi aliitsa khuvukula makura musayituni ku mati makasuundule mushikala shiu mukhono kwekwe musatsa, 16khwinikha shitere shiu khu mukhono musatsa kwekwe mu masahi kenako, khandi amitse hali saba makura mati kenako havundu henaho imbeli wu Mwami Nyasaye. 17Musalisi aliitsa khuvukula makura mati karikale mushikala shiu mukhono kwekwe, halala na masahi ki likondi mati akaveshe khu liroyi lisatsa liu mundu mwenoyo, khu shitere shikali shiu mukhono kwekwe musatsa, khandi khu shitere shikali shiu khu shilenje shisatsa, shiu mundu utushili khukholwa khuva munihu khulondokhana khu mulukha. 18Musalisi aliitsa khuvukula masahi karikale mushikala shiu mukhono kwekwe, akaveshe khu murwi ku mundu mwenoyo. Aliitsa khukhola mulukha ku khunihitswa imbeli wu Mwami Nyasaye munjila yeneyo.
19“Musalisi aliitsa khuhaana shihanwa shiu khurulitsaho vwoni; nu khukhukhola mulukha kukhunihitswa. Namali khukhola kenako, aliitsa khusinza muruku kwi shihanwa shiu khusambwa 20mashihaane halala ni shihanwa shi imu khu vwaali. Musalisi aliitsa khukhola mulukha ku khunihitswa munjila yeneyo; ma mundu mwenoyo akholwi khuva munihu khulondokhana khu mulukha.
21“Navutswa niiva mundu nu mumanani, khandi anyala khukhaywa khunyola vindu vinyishi, mundu mwenoyo aliitsa khulera limiiko khuli shihanwa shiu murungu ku khusemehwa khurula mu vwoni, shihanwa shilahi shiene muno khu Mwami Nyasaye, shichila musalisi shiu khukholwa khuva munihu. Aliitsa khulera vutswa ikilo indala yu vusi vwa tsukanywa makura ku musayituni, khuli shihanwa shi imu nende tsilita 3 tsia makura ku musayituni. 22Aliitsa khulera khandi vituti vivili inoho vinamusotsi vivili, shilala khuli shihanwa shiu khurulitsaho vwoni na shindi khuli shihanwa shiu khusambwa. 23Khulitukhu lia munane liu khukholwa khuva munihu, aliitsa khulera vihanwa vienevo khu musalisi mu vwinjililu vwi Liheemo Litakatifu. 24Musalisi aliitsa khuvukula likondi nende makura ku musayituni, nu khuvihaana khuli shihanwa shilahi shiene muno khu Mwami Nyasaye, shichila musalisi. 25Musalisi aliitsa khusinza limiiko nu khuvukula masahi kalio mati khukavekha khu shiroyi shisatsa shiu mundu mwenoyo, khu shitere shikali shiu khu mukhono musatsa kwekwe, khandi khu shitere shikali shiu khu shilenje shisatsa shieshie. 26Musalisi aliitsa khusuundula masahi mati khu shikala shiu mukhono kwekwe mukhali, 27nu khurumishila shitere shiu mukhono kwekwe musatsa, khumitsa hali saba masahi mati imbeli wu Mwami Nyasaye. 28Musalisi aliitsa khuvikha makura malala havundu halala hele, ha yavikha masahi: khu liroyi lisatsa liu mundu mwenoyo, khu shitere shikali shiu mukhono musatsa ku mundu mwenoyo, khandi khu shitere shikali shiu khu shilenje shisatsa shiu mundu mwenoyo. 29Masahi karikale mushikala shiu mukhono kwekwe, aliitsa khukavikha khu murwi ku mundu mwenoyo makhole mulukha ku khumusemeha khurula mu vwoni munjila yeneyo. 30Aliitsa khuhaana shituti shilala khu vituti vienevo inoho shinamusotsi 31khuli shihanwa shiu khurulitsaho vwoni na shindi yeshio khuli shihanwa shiu khusambwa nende shihanwa shi imu. Musalisi aliitsa khukhola mulukha ku khumusemeha khurula mu vwoni munjila yeneyo. 32Yili nalio lilako khulondokhana khu mundu ulwalanga vulwale vu vuchele, navutswa unyala khukhaywa khunyola vihanwa viatoto vienyekhanga, viu khumukhola khuva munihu.”
Vulwale vu Vuchele mu Tsinzu
33Mwami Nyasaye yavoolela Musa nende Haruni, 34“Lwa muliitsa khuva numumali khwinjila mu shivala shia Kanaani, shia muheetsanga mumenyemu, mambishe vulwale vu vuchele mu inzu yu mu shivala shienesho, 35mwene inzu yeneyo khutukha atsi khuvoolela musalisi, ‘Ndoli shindu shindi shisasanga khuli vulwale vu vuchele mu inzu yanje.’ 36Musalisi aliitsa khuhaana lilako vindu viosi virulitswi munzu mwenomo nashili khwinjilamu khukola vulwale vu vuchele vwenovo. Namali khukhola kenako, vindu viosi vili munzu mwenomo viliitsa khuvukulwa khuva vioneshe. Mayinjili munzu 37khandi akole vulwale vu vuchele vwenovo. Niiva khulikhuho ni vindu viu vulimu inoho vimuuchihilu vilolekhanga vinjilanga mu lisisi, 38aliitsa khulekhainzu yeneyo khandi achikale khumatukhu saba. 39Aliitsa khukalukha khulitukhu lia saba, machikole khandi. Niiva vulwale vu vuchele vwenovo vulava vulandi, 40aliitsa khuhaana lilako ndi machina ku vulwale vu vuchele vwenovo vunyoleshekhu kasinyuulwi nu khusiuvwa havundu honeshe ihale wene khurula mu litaala likali. 41Lwa musalisi ava ni yakhakhola kenako alachelitsa khuli anyala alole ndi masisi ku mukari mwinzu yeneyo kapomolwi khandi matohi ka vahomela nikasiuvilwi havundu honeshe ihale wene khurula mu litaala likali. 42Machina kandi kaliitsa khurumishilwa havukono ha machina karinyuulwa kenako; ma matohi mayia karumishilwi khuhoma masisi kenako.
43“Niiva vulwale vu vuchele, vuliitsa khulolekha munzu yeneyo khandi lwa machina kaliitsa khuva nikakhasinyuulwa khandi inzu ive niyapomolwa khandi niyahomwa, 44musalisi aliitsa khutsia khuchikola. Niiva vuliitsa khuva nu vulandi, inzu yeneyo iliitsa khuva yoneshe. 45Inzu yeneyo iliitsa khupomolwa; khandi machina kayo, misala chiayo, nende matohi kayo koosi ka vahomela, kaliitsa khuhilwa havundu hava ni honeshe ihale wene khurula mu litaala likali. 46Mundu uliitsa khwinjilakhu munzu mwenomo, lwa iva niyakhikalwa, aliitsa khuva woneshe khutukha halukolovo. 47Mundu uliitsa khukona munzu mwenomo, inoho khuliamu shiukhulia mu aliitsa khufuya tsinguvu tsietsie tsiosi.
48“Navutswa niiva musalisi aliitsa khukola, inzu yeneyo, kaloleshe ndi vulwale vu vuchele vwenovo, shiuvulandi munzu mwosi lwa inzu yahomwa tawe, aliitsa khuvukula inzu yeneyo khuva inihu, shichila vulwale vu vuchele vuvetsanga vuhoni. 49Musalisi aliitsa khuvukula manyonyi kavili, misala chindi chia ceda, mukoye mumuuchi, lusia lu musala kwa hisopu, khukhola inzu yeneyo khuva inihu. 50Musalisi aliitsa khusinza linyonyi lilala khu manyonyi kavili mu inyungu ilimu na matsi kashinda khurula mu isieveye. 51Musalisi aliitsa khuvukula musala kwa ceda, lusia lu musala kwa hisopu, mukoye mumuuchi, halala ni linyonyi lishili mwoyo mavinishi mu masahi ki linyonyi liirwa khale khandi mu matsi kashindi. Aliitsa khumitsa hali saba inzu yeneyo. 52Khulwa yako, aliitsa khukhola inzu yeneyo khuva inihu na masahi ki linyonyi, matsi kashindi, linyonyi lishili mwoyo, musala kwa ceda, lusia lu musala kwa hisopu, nende mukoye mumuuchi. 53Musalisi aliitsa khulakhula linyonyi lishili mwoyo lienelo khupulukha khurula mu litaala likali, nu khutsia mu milimi. Lwa musalisi akhola kenako, aliitsa khuva nakholanga mulukha ku khukhola inzu khuva inihu; ma ive yeneyo inihu khulondokhana khu mulukha.
54“Yaka nako malako khulondokhana khu vulwale vu vuchele, likuule, 55shichila vuchele mu tsinguvu inoho munzu, 56khandi shichila livimba inoho lisungure inoho shitonda, 57khumanya lwa shindu shiosi shili shinihu khandi ni shioneshe. Yako nako malako khulondokhana khu vulwale vu vuchele.”
Currently Selected:
LEVI 14: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
LEVI 14
14
Khunihitswa khwa Vandu Valwala Vuchele
1Mwami Nyasaye yavoolela Musa, 2“Yaka nako malako khulondokhana khu mundu walwala vulwale vu vuchele, khulitukhu liakholwangwa khuva munihu, lwa ahilwangwa khu musalisi: 3Musalisi aliitsa khumuhila ihale wene, khurula mu maheemo ka vandu vamenyamu mamukole. Niiva mundu mwenoyo aliitsa khuva wahona khurula mu vulwale vu vuchele vwenovo, 4musalisi aliitsa khuhaana lilako ndi manyonyi kavili manihu kashili mwoyo, ku khukholela mulukha kalerwi, halala ni shitonye shiu lusia lu musala kwa ceda, mukoye mumuuchi nende lusia lu musala kwa hisopu. 5Musalisi aliitsa khuhaana lilako ndi linyonyi lilala khu manyonyi kenako, khusinzwa mu inyungu yalombwa khu litohi ilimu na matsi kashindi khurula mu isieveye. 6Musalisi aliitsa khuvukula linyonyi lindi yelo khulinikha mu masahi ki linyonyi liali niliasinzwa, halala ni shitonye shiu musala kwa ceda, mukoye mumuuchi nende lusia lu musala kwa hisopu. 7Musalisi aliitsa khumitsa hali saba masahi kenako khu mundu utushili khukholwa khuva munihu khurula mu vulwale vu vuchele. Nalwo lwa aliitsa khuvukulwa khuva munihu. Musalisi aliitsa khulakhula linyonyi lishili mwoyo yelo khupulukha khutsia mu milimi. 8Mundu ukholwa khuva munihu, aliitsa khufuya tsinguvu tsietsie, khuveka liswi lielie liosi khu murwi kwekwe, nu khwisinga na matsi; khandi khukholwa khuva munihu. Namali khukholwa kenako, anyala khwinjila mu maheemo ka vandu vamenyamu; navutswa aliitsa khumenya khumatukhu saba ihale wene khurula khu liheemo lielie. 9Khulitukhu lia saba, aliitsa khuveka khandi liswi lielie liosi, matelu keke, visichi vievie nende maswa koosi kali khu mmbili kwekwe. Aliitsa khufuya tsinguvu tsietsie na matsi, nu khwisinga; nu khuva munihu khulondokhana khu mulukha.
10“Aliitsa khulera khulitukhu lia munane makondi mamiiko kavili, nende likondi likhali lilala nu muhika mulala vuchila imbala yosi, vusi vwa tsukanywa makura ku musayituni tsikilo tsivaka nende makura ku musayituni tsilita 6.5. 11Musalisi aliitsa khuhila mundu mwenoyo halala ni vihanwa vienevo mu vwinjililu vwi Liheemo Litakatifu. 12Musalisi aliitsa khuvukula likondi lilala khu makondi mamiiko kenako, na makura tsilita 6.5 mahaane khuli shihanwa shiu khuvasa. Musalisi aliitsa khushihaana khuli shihanwa shilahi shiene muno khu Mwami Nyasaye, shichila musalisi. 13Musalisi aliitsa khusinzila likondi Havundu Hatakatifu, hi miruku chi vihanwa viu khurulitsaho vwoni nende vihanwa viu khusambwa visinzilwangwa. Aliitsa khukhola kenako shichila shihanwa shiu khuvasa, khuli shihanwa shiu khurulitsaho vwoni ni shiu musalisi khandi ni shitakatifu muno. 14Musalisi aliitsa khuvukula masahi mati khu masahi ki likondi, akaveshe khu liroyi lisatsa liu mundu mwenoyo, khu shitere shikali shiu khu mukhono kwekwe musatsa, khandi khu shitere shikali shiu khu shilenje shisatsa shiu mundu utushili khukholwa khuva munihu khulondokhana khu mulukha. 15Musalisi aliitsa khuvukula makura musayituni ku mati makasuundule mushikala shiu mukhono kwekwe musatsa, 16khwinikha shitere shiu khu mukhono musatsa kwekwe mu masahi kenako, khandi amitse hali saba makura mati kenako havundu henaho imbeli wu Mwami Nyasaye. 17Musalisi aliitsa khuvukula makura mati karikale mushikala shiu mukhono kwekwe, halala na masahi ki likondi mati akaveshe khu liroyi lisatsa liu mundu mwenoyo, khu shitere shikali shiu mukhono kwekwe musatsa, khandi khu shitere shikali shiu khu shilenje shisatsa, shiu mundu utushili khukholwa khuva munihu khulondokhana khu mulukha. 18Musalisi aliitsa khuvukula masahi karikale mushikala shiu mukhono kwekwe, akaveshe khu murwi ku mundu mwenoyo. Aliitsa khukhola mulukha ku khunihitswa imbeli wu Mwami Nyasaye munjila yeneyo.
19“Musalisi aliitsa khuhaana shihanwa shiu khurulitsaho vwoni; nu khukhukhola mulukha kukhunihitswa. Namali khukhola kenako, aliitsa khusinza muruku kwi shihanwa shiu khusambwa 20mashihaane halala ni shihanwa shi imu khu vwaali. Musalisi aliitsa khukhola mulukha ku khunihitswa munjila yeneyo; ma mundu mwenoyo akholwi khuva munihu khulondokhana khu mulukha.
21“Navutswa niiva mundu nu mumanani, khandi anyala khukhaywa khunyola vindu vinyishi, mundu mwenoyo aliitsa khulera limiiko khuli shihanwa shiu murungu ku khusemehwa khurula mu vwoni, shihanwa shilahi shiene muno khu Mwami Nyasaye, shichila musalisi shiu khukholwa khuva munihu. Aliitsa khulera vutswa ikilo indala yu vusi vwa tsukanywa makura ku musayituni, khuli shihanwa shi imu nende tsilita 3 tsia makura ku musayituni. 22Aliitsa khulera khandi vituti vivili inoho vinamusotsi vivili, shilala khuli shihanwa shiu khurulitsaho vwoni na shindi khuli shihanwa shiu khusambwa. 23Khulitukhu lia munane liu khukholwa khuva munihu, aliitsa khulera vihanwa vienevo khu musalisi mu vwinjililu vwi Liheemo Litakatifu. 24Musalisi aliitsa khuvukula likondi nende makura ku musayituni, nu khuvihaana khuli shihanwa shilahi shiene muno khu Mwami Nyasaye, shichila musalisi. 25Musalisi aliitsa khusinza limiiko nu khuvukula masahi kalio mati khukavekha khu shiroyi shisatsa shiu mundu mwenoyo, khu shitere shikali shiu khu mukhono musatsa kwekwe, khandi khu shitere shikali shiu khu shilenje shisatsa shieshie. 26Musalisi aliitsa khusuundula masahi mati khu shikala shiu mukhono kwekwe mukhali, 27nu khurumishila shitere shiu mukhono kwekwe musatsa, khumitsa hali saba masahi mati imbeli wu Mwami Nyasaye. 28Musalisi aliitsa khuvikha makura malala havundu halala hele, ha yavikha masahi: khu liroyi lisatsa liu mundu mwenoyo, khu shitere shikali shiu mukhono musatsa ku mundu mwenoyo, khandi khu shitere shikali shiu khu shilenje shisatsa shiu mundu mwenoyo. 29Masahi karikale mushikala shiu mukhono kwekwe, aliitsa khukavikha khu murwi ku mundu mwenoyo makhole mulukha ku khumusemeha khurula mu vwoni munjila yeneyo. 30Aliitsa khuhaana shituti shilala khu vituti vienevo inoho shinamusotsi 31khuli shihanwa shiu khurulitsaho vwoni na shindi yeshio khuli shihanwa shiu khusambwa nende shihanwa shi imu. Musalisi aliitsa khukhola mulukha ku khumusemeha khurula mu vwoni munjila yeneyo. 32Yili nalio lilako khulondokhana khu mundu ulwalanga vulwale vu vuchele, navutswa unyala khukhaywa khunyola vihanwa viatoto vienyekhanga, viu khumukhola khuva munihu.”
Vulwale vu Vuchele mu Tsinzu
33Mwami Nyasaye yavoolela Musa nende Haruni, 34“Lwa muliitsa khuva numumali khwinjila mu shivala shia Kanaani, shia muheetsanga mumenyemu, mambishe vulwale vu vuchele mu inzu yu mu shivala shienesho, 35mwene inzu yeneyo khutukha atsi khuvoolela musalisi, ‘Ndoli shindu shindi shisasanga khuli vulwale vu vuchele mu inzu yanje.’ 36Musalisi aliitsa khuhaana lilako vindu viosi virulitswi munzu mwenomo nashili khwinjilamu khukola vulwale vu vuchele vwenovo. Namali khukhola kenako, vindu viosi vili munzu mwenomo viliitsa khuvukulwa khuva vioneshe. Mayinjili munzu 37khandi akole vulwale vu vuchele vwenovo. Niiva khulikhuho ni vindu viu vulimu inoho vimuuchihilu vilolekhanga vinjilanga mu lisisi, 38aliitsa khulekhainzu yeneyo khandi achikale khumatukhu saba. 39Aliitsa khukalukha khulitukhu lia saba, machikole khandi. Niiva vulwale vu vuchele vwenovo vulava vulandi, 40aliitsa khuhaana lilako ndi machina ku vulwale vu vuchele vwenovo vunyoleshekhu kasinyuulwi nu khusiuvwa havundu honeshe ihale wene khurula mu litaala likali. 41Lwa musalisi ava ni yakhakhola kenako alachelitsa khuli anyala alole ndi masisi ku mukari mwinzu yeneyo kapomolwi khandi matohi ka vahomela nikasiuvilwi havundu honeshe ihale wene khurula mu litaala likali. 42Machina kandi kaliitsa khurumishilwa havukono ha machina karinyuulwa kenako; ma matohi mayia karumishilwi khuhoma masisi kenako.
43“Niiva vulwale vu vuchele, vuliitsa khulolekha munzu yeneyo khandi lwa machina kaliitsa khuva nikakhasinyuulwa khandi inzu ive niyapomolwa khandi niyahomwa, 44musalisi aliitsa khutsia khuchikola. Niiva vuliitsa khuva nu vulandi, inzu yeneyo iliitsa khuva yoneshe. 45Inzu yeneyo iliitsa khupomolwa; khandi machina kayo, misala chiayo, nende matohi kayo koosi ka vahomela, kaliitsa khuhilwa havundu hava ni honeshe ihale wene khurula mu litaala likali. 46Mundu uliitsa khwinjilakhu munzu mwenomo, lwa iva niyakhikalwa, aliitsa khuva woneshe khutukha halukolovo. 47Mundu uliitsa khukona munzu mwenomo, inoho khuliamu shiukhulia mu aliitsa khufuya tsinguvu tsietsie tsiosi.
48“Navutswa niiva musalisi aliitsa khukola, inzu yeneyo, kaloleshe ndi vulwale vu vuchele vwenovo, shiuvulandi munzu mwosi lwa inzu yahomwa tawe, aliitsa khuvukula inzu yeneyo khuva inihu, shichila vulwale vu vuchele vuvetsanga vuhoni. 49Musalisi aliitsa khuvukula manyonyi kavili, misala chindi chia ceda, mukoye mumuuchi, lusia lu musala kwa hisopu, khukhola inzu yeneyo khuva inihu. 50Musalisi aliitsa khusinza linyonyi lilala khu manyonyi kavili mu inyungu ilimu na matsi kashinda khurula mu isieveye. 51Musalisi aliitsa khuvukula musala kwa ceda, lusia lu musala kwa hisopu, mukoye mumuuchi, halala ni linyonyi lishili mwoyo mavinishi mu masahi ki linyonyi liirwa khale khandi mu matsi kashindi. Aliitsa khumitsa hali saba inzu yeneyo. 52Khulwa yako, aliitsa khukhola inzu yeneyo khuva inihu na masahi ki linyonyi, matsi kashindi, linyonyi lishili mwoyo, musala kwa ceda, lusia lu musala kwa hisopu, nende mukoye mumuuchi. 53Musalisi aliitsa khulakhula linyonyi lishili mwoyo lienelo khupulukha khurula mu litaala likali, nu khutsia mu milimi. Lwa musalisi akhola kenako, aliitsa khuva nakholanga mulukha ku khukhola inzu khuva inihu; ma ive yeneyo inihu khulondokhana khu mulukha.
54“Yaka nako malako khulondokhana khu vulwale vu vuchele, likuule, 55shichila vuchele mu tsinguvu inoho munzu, 56khandi shichila livimba inoho lisungure inoho shitonda, 57khumanya lwa shindu shiosi shili shinihu khandi ni shioneshe. Yako nako malako khulondokhana khu vulwale vu vuchele.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013