HOSEHA 7
7
1“Lwa ndi ninganakani yu khuhonyinya Vaisraeli,
vukoyanu vwa Vaefurahimu vulolekhanga havulavu,
vikholwa vitamanu via Samaria vilolekhanga;
shichila vakholanga vindu viu vuvehi,
vihuuvi vinjililanga vandu ni va vahuuvila;
khandi vanuuli vanuulanga vandu vindu viavo khu mihaanda.
2Navutswa vavula inganakani yukhulola
ndi namanya mihinzilu chiavo mitamanu chiosi.
Vwoni vwavo vumali khuvanyolishitsa;
shia shindu shiosi shia vakhola shilolekhanga imbeli wanje.”
Vutamanu mu Inzu yu Vwami
3Mwami Nyasaye avoolanga,
“Vutamanu vwavo vuchilanga mwami nasangala,
khandi vayaanzitsa vimilili khuvirila mu vindu viu vuvehi vwavo.
4Voosi vakwa vaheeyi;
vali khuli lijiko liashitswa mulilu,
kwa mundu ukandanga mikati anyala khuvula khumeetamu mandaa,
khuli shinokho nishishili khuvimba.
5Khulitukhu liu mulukha ku khwikhoyela ku mwami weru
vimilili vatanda idivai khuvirana,
khandi mwami nasanga mu shihenye henye na vandu vakholanga shihenye henye.
6Vahulilanga mulilu khuli kwi lijiko;
visuunda khuye nu vwikhola kholitsi.
Vali nu vurima vutukhu vwosi;
vulolekhanga mu mavwevwe khuli tsimemo tsiu mulilu.
7“Voosi ni valulu khuli lijiko liu mulilu;
vativitsa vamihi vavo.
Vami vavo voosi vativitswa;
khali mulala khuvo avulakhuho ureevanga vukhonyi khwinzi.”
Visraeli nende Tsimbia Tsindi
8Mwami Nyasaye avoolanga,
Vaefurahimu vatsukana na vandu vi tsimbia tsindi.
Vaefurahimu vali khuli mukati kwa vakanda luveka lulala.
9Vandu vi tsimbia tsindi va vamala tsingulu,
khali vavulakhu shia vamanya.
Matukhu kavo kahimbihitswa,
navutswa vakorwa shindu shiosi.
10Vwiloli vwa Vaisraeli vuhaananga vushiahidi khuvo vene;
khali ndio, vayambakhana khukalukha khwinzi
Mwami Nyasaye, uli Nyasaye wavo,
inoho khukhava inzi khulondokhana khu kenako koosi.
11Efurahimu ali khuli shituti,
alolekhanga khuva musilo khandi muyiingwa,
tsisaa tsindala yenyanga Misri amukhonye,
tsisaa tsindi yenyanga Ashuria amukhonye.
12Lwa valiitsa khuva nivatsitsanga,
nalwo lwa vasiuvila ineti yanje khuvareeka,
niitsa khuvakumila khuli manyonyi;
niitsa khuvasalilitsa shichila vikhola vitamanu viavo.
13“Wooyi! Vali khuvutiinyu, shichila valekhana ninzi!
Nu vulahi khutivitswa shichila vambinganyinya!
Mbele ninganakani yu khuvahonyinya,
navutswa valomolomanga vuvehi khulondokhana khwinzi.
14Vayambakhana khusaala nu mwoyo kwatoto khwinzi,
navutswa vahiliraanga nivakoni tsindolo;
visalaakanga mivili chiavo khu vanyole imu nende idivai,
navutswa vambinganyinyanga.
15Khali niiva naveechitsa khandi nivatinyilitsa,
navutswa vanganakanilanga vindu vitamanu.
16Vasaalanga khu musambwa kwa Baali;
vakwa khuli vura vuvula vukhonyi.
Vimilili vavo valiitsa khwiirwa ni shivavi,
shichila valomolomanga makhuva ku vusilo.
Khulwa yako, Vamisri valiitsa khuvachaya.”
Currently Selected:
HOSEHA 7: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
