HOSEHA 2
2
1Khulwa yako, laanji vaana venyu vi shiyayi lira, “Vandu vaanje” khandi vambotso venyu, “Vavelelwa tsimbavasi.”
Vaisraeli Vasalilitswa Nivakalushitswa
2“Vaana vaanje, mukaye mama wenyu;
mumukaye -- shichila shiali mukhali wanje,
shindi musatsa wewe tawe.
Mumusaye nayaanza aleshe khukhola vulaaya,
alekhane nu vuheeyi vwa akholanga.
3Vuchila kenako, niitsa khumunavula tsinguvu,
ave shekenye khuli khulitukhu lia yivulwa;
niitsa khumukhola khukwa khuli mwichendanyama,
yumakane khuli shivala shiumakanu,
khandi mumale nu vuluhu.
4Shinyala khuvela vaana veve tsimbavasi tawe;
shichila ni vaana va yivula nakholanga vulaaya.
5Mama wavo wakhola vulaaya;
Mundu wa vavelekha wakhola shikholwa shi tsisoni;
shichila yavoola mwene,
‘Nalondelela vasatsa vaanje vanayaanza,
navo vambetsanga shiukhulia nende matsi,
tsimbusi nende tsimbala tsia machioro malahi,
makura ku khwivekha nende shiu khung'wa.’ ”
6Khulwa yako, niitsa khwikalila na mavwa injila yeye;
niitsa khumuvotokhana ni lisisi
alivula havundu hanyala khulondela.
7Aliitsa khuhitsanyinya vasatsa veve vayayaanza,
navutswa aliitsa khuvula khuvakumila.
Aliitsa khuvakhava,
navutswa aliitsa khuvula khuvanyola.
Nalwo lwa aliitsa khuvoola,
“Nakalukha khu musatsa wanje wali wu khuraanga,
shichila nindi naye nali vulahi
khuvira khuli menyanga nunundi.”
8Khali wakorwa khumanya ndi ninzi wamuha imu, idivai, makura ku musayituni, khandi wachila nanyola ifetsa nende itsahabu ya varumishilanga, nivasaala khu Baali. 9Khulwa yako, khulitukhu liu khuchesa, niitsa khumunuula imu yanje, khandi idivai yanje mu tsinyinga tsiayo. Niitsa khumunuula tsiunguv nende tsimbaala tsianje, tsia yifwalanga khuvimba shekenye shieshie. 10Niitsa khumunavula ave vutswa shekenye, vasatsa veve vayayaanza nivamulolanga; mundu avulakhuho uliitsa khumukayila. 11Niitsa khutivitsa milukha chiechie chiosi chiu khwikhoya -- milukha chiu khumalila khumuhika nende khuraanga mweli nende khwikhoya khwi litukhu li Lisabato -- vikhalo vievie viosi khulondokhana khu idini. 12Niitsa khwononyinya misala chiechie chi misabibu nende mikhuyu chia yakanakananga, navoola nakwo murungu kwa vasatsa veve vayayaanza vamurunganga. Niitsa khuchikhola khuva muliru, tsinyama tsiumbulimu tsiliitsa khuchimala. 13Niitsa khumusalilitsa khumatukhu kosi, ka yali niyanzivilila, lwa yasambanga vubani khu musambwa kwa Baali, nafwala tsibanjili nende matongolo khulondelela vasatsa veve vayayaanza, khandi nanzivilila. Inzi Mwami Nyasaye mali khuvoola.
Khuli Nyasaye Yayaanza Vandu Veve
14Khulwa yako, Mwami Nyasaye avoolanga,
“Loli, niitsa khumuvoolitsa;
nilimuhila mu shiangalangwi;
khumulomolomela makhuva malahi kene.
15Naho ha nilimuheela mulimi kwi misala chiechie chi misabibu,
nilikhola Luhoongo lwa Akori khuva khuli shiliango shi lisuuvilitswa.
Naho haliitsa khukhava inzi khuli mumatukhu ka yali nashili muvukha,
khulitukhu lia yarula mu shivala shia Misri.
16Khulitukhu lienelo, uliitsa khunaanga,
‘Musatsa wanje,’
khandi uleshe khunaanga, ‘Baali wanje.’
17Niitsa khumwkalila khulomolomakhu shindu khulondokhana khu Baali,
khulekha khwitsushitsa lira lielie.”
18Khulitukhu lienelo, niitsa khukhola lilakano ni tsinyama tsiumbulimu, manyonyi, nende vindu vimolanga hasi shichila munyi. Niitsa khurulitsaho vura, shivavi, nende liihe; nu khumukhola mumenye mu vulindi vulahi. 19Israeli, ninzi wakhuselela khuva mukhali wanje mihika ni mihika; nakhuselela khuvirila mu vulunji nende katoto, mu vuyaanzi vwatoto nende tsimbavasi.
20Ninzi wakhuselela mu vusuuvilwa;
nalwo lwa numanye ndi ninzi Mwami Nyasaye.
21Khulitukhu lienelo, inzi Mwami Nyasaye mali khuvoola,
“Niitsa khukhuvitsa imbula khurula mu malesi
khandi ilikhuva khulilova.
22Lilova liliitsa khumeela imu, misabibu chia idivai ilombwakhu,
nende misayituni chia makura karulitswakhu,
khandi Yezireli aliitsa khuhulila vulahi.
23Niitsa khukhola vandu vaanje khuva vahinda mu shivala;
niitsa khuvela tsimbavasi woyo wanalaanga
‘Wavelelwa tsimbavasi’,
niitsa khuvoolela woyo walaangwa,
‘Shiumuli vandu vaanje tawe,’
‘Muli vandu vaanje;’
naye aliitsa khuvoola, ‘Nivi Nyasaye wanje.’ ”
Currently Selected:
HOSEHA 2: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
