HOSEHA 14
14
1Munyi Vaisraeli,
kalushi khu Mwami Nyasaye, uli Nyasaye wenyu;
mwayisikarila shichila vwoni vwenyu.
2Munyi Vaisraeli, mukalushi khu Mwami Nyasaye, uli Nyasaye wenyu;
muvooleli, “Khusemehe vwoni vweru vwosi,
khandi uhuchilile lisaala lieru,
khutsililile khukhwitsominya khuli khwalaaka.
3Shivala shia Ashuria shilitsa khuvula khukhuhonyinya;
tsifarasi tsiliihe tsiliitsa khuvula khukhulinda.
Shiukhunyala khuvoolelakhu misambwa chieru ndi nachio Nyasaye weru tawe.
Nivi Mwami Nyasaye ulolelanga tsimbavasi vavisandu.”
Nyasaye Walaaka Aliitsa Khuvasemeha
4Mwami Nyasaye avoolanga,
“Niitsa khukalushitsa vandu vaanje khwinzi mwene
nu khuvayaanza nu mwoyo kwanje kwosi,
shichila mbulakhu vurima vwosi navo.
5Niitsa khulolekha khu Vaisraeli khuli liime;
valiitsa khwama khuli mawua.
Valiitsa khutinya khuli misala chia Lebanoni chi miili mu malova.
6Chiliitsa khutsililila khumeela,
nu khuneera khuli misala milahi chi misayituni.
Chiliitsa khuhuunya vulahi khuli misala chia ceda chia Lebanoni.
7Valiitsa khukalukha mavamenye hasi hanje.
Valiitsa khuraaka imu iliva inyishi khuli misala chi misabibu.
Valiitsa khumanyikhana khuli idivai ya Lebanoni.
8Munyi vandu vuluhia lwa Efurahimu, ni shina shiakholela misambwa?
Ninzi njipanga lisaala lienyu khandi nimulinda.
Ndi vutswa khuli musala ku mutarakwa muviisi;
ninzi shirula shi tsikhaavi tsienyu.”
Limalila
9Nu vulahi mundu uli nu vusitsa, amanye makhuva yaka;
mundu wacheliha ave nu vucheli khulondokhana khuko;
shichila Mwami Nyasaye neye wi likhola liu vulunji,
khandi vandu vaseletse vamenyanga khulondokhana khu kenako.
Navutswa vandu vatamanu visikarilanga muko.
Currently Selected:
HOSEHA 14: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
