VAGALATIA 3

Malako inoho Lisuuvila

1Munyi Vagalatia vasilo! Ni viina wamuloka, Lwa nali na munyi, namuvoolela vulahi vwene makhuva khulondokhana khuli Yesu Kristo yavambwa, nakhutsila khu musalaba. 2Ni shindu shilala shia nakhayaanzi khwenya khumanya khurula khu munyi: mwanyola Roho wa Nyasaye, shichila mulondanga Malako inoho khuhulila Ivanjeli nu khuchisuuvila? 3Khani muli vasilo murio? Lwa mwaraanga na Roho wa Nyasaye, mwenyanga khumalila mu tsingulu tsienyu vene tsiu mmbili? 4Linyakhana lienyu lia mwavirilamu liosi linyala khuva liali lia vutswa? Ni kilikali liali ni shivune? 5Nyasaye amuheetsanga Roho, nu khukhola viloleshitsu mu munyi shichila mulondanga Malako, inoho shichila muhulilanga Ivanjeli mamuchisuuvila?

6Kanakanikhu kikholekha khu Aburahamu; khuli Mahandiko Matakatifu kavoolanga, “Aburahamu yasuuvila mu Nyasaye; khandi shichila lisuuvila lielie, Nyasaye yamukhola khuva wi likhola liu vulunji imbeli wewe.” 7Nu vulahi khumanya ndi yavo vali ni lisuuvila, navo vitsukhulu vatoto va Aburahamu. 8Mahandiko Matakatifu kali ka yivaala khale ndi Nyasaye aliitsa khukhola vandu vi tsimbia tsindi khuva valunji imbeli wewe khuvirila mu lisuuvila. Mahandiko Matakatifu kali ka yivaalila Aburahamu khale khuvirila mu Ivanjeli: “Vandu vi tsimbia tsindi tsiosi, valiitsa khukasitswa khuvirila mu yivi.” 9Vandu vali ni lisuuvila vakasitswa na Aburahamu, wali mundu wi lisuuvila.

10Vandu voosi vakholanga mihinzilu chiavo khurweshitsa ka Malako kenyanga konyene, vamala khulaamwa. Mahandiko Matakatifu kavoolanga, “Mundu wambakhananga khulonda shia shindu shiosi shiahandikwa mu shitabu shia Malako, wamala khulaamwa!” 11Khulwa yako, kali havulavu ndi mundu avulakhuho unyala khukholwa khuva wi likhola liu vulunji imbeli wa Nyasaye khuvirila mu malako; shichila Mahandiko Matakatifu kavoolanga, “Mundu wa Nyasaye akholi khuva wi likhola liu vulunji, neye uliitsa khutsililila khuva mwoyo shichila lisuuvila.” 12Malako shikanyala khuva kaliho khulondokhana khu lisuuvila tawe; navutswa Mahandiko Matakatifu kavoolanga, “Mundu wu kholanga ka Malako kenyanga, aliitsa khutsililila khuva mwoyo khuvirila muko.”

13Navutswa Kristo wa khuvoholola khurula mu shilaamo shinyolekhanga shichila Malako, lwa yakwa shilaamo shichila khutsi. Mahandiko Matakatifu kavoolanga: “Mundu umali khusungwa khu musala, wamala khulaamwa.” 14Kristo yakhuvoholola, khu vandu vi tsimbia tsindi vanyolekhu tsikhaavi tsia Nyasaye yali niyaha Aburahamu khuvirila mu Yesu Kristo; khandi khuvirila mu lisuuvila, khunyole Roho wa Nyasaye yali niyalaaka aliitsa khukhuha.

Vwavukhani Vuliho Hakari ha Malako nende Lilaaka

15Vasuuvili vashianje, nyenyanga khumuvoolelakhu shindu khurula khu vindu vikholekhanga mu limenya lieru lia shia khase khosi. Lwa vandu vavili vahuchilitsananga khu likhuva, khandi vahandika lilakano, mundu avulakhuho unyala khumeneka lilakano lienelo, inoho khumeetakhu shindu shindi shiosi. 16Nyasaye yalomba lilaaka lielie khu Aburahamu nende mwitsukhulu wewe. Mahandiko Matakatifu shikanyala khuva kavoolanga mu vunyishi “Vitsukhulu,” nakhwo khuvoola vandu vanyishi tawe, navutswa kavoolanga mu vutititi “Mwitsukhulu,” nu khuli khuvoola mundu mulala wonyene ulaangwangwa Kristo. 17Kambolanga ni yaka: Nyasaye yakhola lilakano lielie na Aburahamu, khandi nalaaka aliitsa khurweshitsa. Malako kali nikahaanwa mihika tsimia tsine na makhomi kavaka nichiakhavira, shikanyala khumeneka lilakano lienelo, inoho khusisulula lilaaka lia Nyasaye tawe. 18Niiva shihanwa shia Nyasaye shiliho shichila Malako, shikali shiliho shichila lilaaka lielie tawe. Navutswa Nyasaye yaha Aburahamu shihanwa shienesho khuvirila khu lilaaka lielie.

19Khulwa yako, shichila shina khuliho na Malako? Kameetwa, khwenya khumanyinya khukhola shindu shitamanu ni shina; khandi kakholwa khuvaho khutukha lwa mwitsukhulu wa Aburahamu, wachila lilaaka nililombwa aliitsa khwitsa. Malako kalerwa ni tsinjelosi khuvirila mu mundu mulala, khandi nikahaanwa khu vandu. 20Navutswa ni kilikali, mundu wa hakari anyala khuvula khwenyekhana, lwa mundu mulala wonyene aliho; navutswa Nyasaye nu mulala.

Shivune Shiachila Malako Nikahaanwa

21Yaka kanyala khuva kamanyinyanga ndi Malako kahinganyinyanga lilaaka lia Nyasaye? Shikali kario tawe! Niiva mundu yakhanyoli lilako, linyala khulera vulamu, mundu yakhakholelwi khuva wi likhola liu vulunji khuvirila mu lilako lienelo. 22Navutswa Mahandiko Matakatifu kavoolanga ndi vwoni vwa yamiha vandu voosi mu shivala. Yavo vasuuvilanga, valiitsa khuheelwa shihanwa shialaakwa khuvirila khu lisuuvila mu Yesu Kristo.

23Lisuuvila yili nilishili khuvaho, Malako kali kakhuvoha khuli vavohe, khutukha lwa lisuuvila lialolekha. 24Khulwa yako, Malako nako ka khusinjililanga khutukha lwa Kristo yalolekha, khulu khukholwa khuva valunji imbeli wa Nyasaye khuvirila mu lisuuvila. 25Lwa lisuuvila liliho nunundi, Malako shikanyala khukhusinjilila khandi tawe.

26Munyi voosi muli vaana va Nyasaye khuvirila mu lisuuvila mu Yesu Kristo. 27Mwabatiswa mu Kristo, khandi nunundi mwayifwala Kristo, nakhwo khuvoola, vulamu vwa Kristo mwene. 28Vwavukhani vuvulakhuho hakari ha Vayahudi nende vandu vi tsimbia tsindi, hakari ha varukwa nende vavoholole, hakari ha vandu vasatsa nende vakhali. Munyi voosi muli shilala khuvirila mu lisuuvila mu Yesu Kristo. 29Niiva munyi muli vandu va Kristo, ni kilikali muli vitsukhulu va Aburahamu; khandi muliitsa khunyola shia Nyasaye yalaaka aliitsa khumuha.

Currently Selected:

VAGALATIA 3: LLLCATHOLIC

Highlight

Copy

Compare