KHURULA 9

Likhutsa li Miruku

1Mwami Nyasaye yavoolela Musa, “Tsia khu Mwami wa Misri, ma umuvoolele ndi Mwami Nyasaye, uli Nyasaye wa Vahebrania, avoolanga, ‘Lekha vandu vaanje vatsi, khu vandumishile. 2Niiva uliitsa khwambakhana khuvahuchilila khandi khutsia, 3niitsa khukhusalilitsa, lwa niitsa khurumila miruku chienyu chiosi vulwale vutamanu muno -- khu tsifarasi, tsipunda, tsingamia, tsing'ombe, makondi, nende tsimbuli tsienyu. 4Navutswa niitsa khwahula haluveka miruku chia Vaisraeli khurula khu chia Vamisri, khu khali muruku kwa Vaisraeli kuvuli khukhutsakhu. 5Inzi, Mwami Nyasaye ndovole litukhu lia mukamba, khuva litukhu lia kholelamu makhuva yaka.’ ”

6Khulitukhu lialondakhu, Mwami Nyasaye yakhola khuli lwa yali niyavoola aliitsa khukhola, ma miruku chiosi chia Vamisri nichikhutsa, navutswa khali muruku mulala kwa Vaisraeli kuvulakhuho kwakhutsakhu. 7Mwami wa Misri yaruma vandu khutsia khurunishitsa manivanyola ndi khali muruku mulala khu miruku chia Vaisraeli kuvulakhuho kwakhutsa. Navutswa Mwami wa Misri yali muhaaka, niyambakhana khuhuchilila Vaisraeli khutsia.

Maviimba khu Mmbili

8Mwami Nyasaye yavoolela Musa nende Haruni, “Vukuli likooshe litititi mu makhono khurula mu lijiko liu mulilu mululu. Musa aliitsa khulisiuva ikulu mu vushindu imbeli wu Mwami wa Misri. 9Liliitsa khusalana khuli lukuushi lunyukhu shia havundu hosi mu shivala shia Misri, khandi vuli shia havundu hosi liliitsa khulera maviimba, kaliitsa khuva makuule khu vandu nende miruku.” 10Musa nende Haruni vavukula likooshe, nivasinjila imbeli wu Mwami wa Misri. Musa yalisiuva ikulu mu vushindu, ma vandu nende miruku nivava na maviimba. 11Vakhumu vakhaywa khusinjila imbeli wa Musa, shichila khali vo vene nende Vamisri valwala maviimba. 12Navutswa Mwami Nyasaye yalomba Mwami wa Misri, khuva muhaaka, khali Mwami wa Misri niyambakhana khuhulila makhuva ka Musa nende Haruni vamuvoolela, khulondokhana khuli Mwami Nyasaye yali navavoolele.

Imbula ya Machina

13Mwami Nyasaye yavoolela Musa, “Vukha mu mavwevwe litukhu lia mukamba, utsi khwakanila Mwami wa Misri, ma umuvoolele, ‘Mwami Nyasaye wa Vahebrania, avoolanga, Lekha vandu vaanje vatsi, khu vandumishile. 14Isaa yene yinu shinzitsanga khusalilitsa varumishi vovo, halala na vandu vovo vonyene tawe, navutswa niitsa khukhusalilitsa khali yivi, khu umanye ndi avalikhuho wundi khuli inzi, shia havundu hosi mu shivala. 15Khali mbele nakhusalilitsa yivi nende vandu vovo khuvirila mu lukhutsu, shiuwakhavele mwoyo tawe. 16Navutswa khukhumanyinya ndi ni tsingulu, khuleshi utsililile khuva mwoyo, khu vukhumi vwanje vumanyikhane shia havundu hosi mu shivala. 17Nikhali ushitsilililanga khwichinjilila khu vandu vaanje, nu khwambakhana khuvahuchilila khutsia. 18Khulwa yako, isaa khuli yinu khulitukhu lia mukamba, niitsa khukhuvitsa imbula ya machina indamanu muno, ishili khukhuvakhu mu shivala shia Misri, khali litukhu li shivala shienesho, shiraanjitswa khutukha nunundi. 19Haana lilako nunundi miruku chili mu shikuri, chiochio halala ni vindu viosi via uli navio, vivishwi havundu halahi hene. Imbula ya machina iliitsa khukhuva vandu, khali khu miruku chia vavohi ilwanyi, nachio chiliitsa khukhutsa.’ ” 20Valala khu varumishi vu Mwami wa Misri varia, shichila ku Mwami Nyasaye yali navooli, manivinjilitsa varukwa vavo, halala ni miruku khwikama munzu. 21Navutswa yavo vachaya likhuva liu Mwami Nyasaye, varika varukwa vavo nende miruku chiavo mu milimi.

22Mwami Nyasaye yavoolela Musa, “Chinguula ikulu mukhono kwokwo, khu imbula ya machina ikwi shia havundu hosi mu shivala shia Misri khu vandu, miruku, khandi khu viraakwa viosi vili mu milimi chi shivala shia Misri.” 23Nalwo lwa Musa yachinguula ikulu indovoshi yeye, ma Mwami Nyasaye, naruma likulu nende imbula ya machina, khandi luhembo lwi imbula nulurumula lilova. Mwami Nyasaye yaruma 24imbula inyishi ya machina, halala nu luheni lwamemanga nu lwakha iyi neyo. Yali imbula ya machina indamanu muno mu shivala shia Misri, khali khurula nishishili khuva shivala. 25Imbula ya machina yarumula shia shindu shiosi mu milimi, shia havundu hosi mu shivala shia Misri, khali vandu voosi nende miruku chiosi. Yarumula viraakwa viosi mu milimi manikwishitsa misala chiosi. 26Lusomo lwa Gosheni, havundu ha Vaisraeli vamenyanga, naho havundu honyene vutswa ha imbula ya machina yalekha khukhuvakhu. 27Mwami wa Misri yarumana Musa nende Haruni navoola, “Mali khukhola vwoni isaa yinu; Mwami Nyasaye akholanga likhola liu vulunji, khandi inzi halala na vandu vaanje, khukholi vutamanu. 28Musaale khu Mwami Nyasaye! Likulu nende imbula ya machina vimali khukhutukha! Musuuvilitsanga khumuhuchilila khutsia; shinyala khuhuchilila mutsililile khumenya hanu, khumatukhu manyishi tawe.”

29Musa yavoolela Mwami wa Misri, “Lwa niitsa khuva ninakharula mu litaala likali, niitsa khuchingula ikulu makhono kaanje khusaala khu Mwami Nyasaye. Likulu liliitsa khusinjila, khandi imbula ya machina iliitsa khulekha khukhuva, khu mumanye ndi lilova ni liu Mwami Nyasaye. 30Navutswa khali ndio, manyi ndi yivi halala na varumishi va vandu vovo, mwambakhananga khuha Mwami Nyasaye luyali.”

31Viraakwa vi tsimbusi tsia machoro tsirulakhu nende ishayiri viononyinywa, shichila ishayiri yumakana, khandi viraakwa vi tsimbusi tsia machoro tsirulakhu viali nivimeeli khale mawua. 32Navutswa inganu ivulakhuho yonokhakhu, shichila yali yayuma khale.

33Musa yalekha Mwami wa Misri, nasimukha khurula mu litaala, nasaala khu Mwami Nyasaye nachinguli ikulu makhono keke. Likulu, imbula ya machina nende imbula, viosi viasinjila. 34Navutswa lwa Mwami wa Misri yalola makhuva kikholekha, yakhola khandi vwoni. Ye mwene halala na varumishi va vandu veve, vatsililila khuva vahaaka. 35Khuli Mwami Nyasaye yali niyavoolela Musa, Mwami wa Misri yambakhana khuhuchilila Vaisraeli khutsia.

Currently Selected:

KHURULA 9: LLLCATHOLIC

Highlight

Copy