KHURULA 40

Khumbakhwa nu Khutakasa Liheemo Litakatifu

1Mwami Nyasaye yavoolela Musa, 2“Khulitukhu liu khuraanga, liu mweli ku khuraanga, uliitsa khulomba Liheemo Litakatifu. 3Uliitsa khuvikha mu Liheemo lienelo, Lisanduku li Lilakano lili na Malako Likhomi, khandi ure luvaala imbeli walio. 4Uliitsa khwinjilitsamu imesa, nu khurenjekhakhu vindu vienyekhanga khuyo. Uliitsa khuleramu shikuru shi itaaha, ma urenjeshekhu tsitaaha tsiashio. 5Uliitsa khuvikha vwaali vwalombwa khu itsahabu, vu khusambilakhu vubani imbeli wi Lisanduku li Lilakano ma welelitsi luvaala mu vwinjililu vwi Liheemo Litakatifu. 6Vikha imbeli wi Liheemo Litakatifu lienelo, vwaali vwi vihanwa viu khusambwa. 7Vikha lukalayi lu khusavilakhu hakari hi Liheemo Litakatifu nende vwaali, khandi witsulitsi matsi mu lukalayi lwenolo. 8Yumbakha lwanyi khundulu khwi Liheemo Litakatifu, khandi welelitsi luvaala mu vwinjililu vwene.

9“Numali kenako, uliitsa khuvukula makura ku khuvekha, Liheemo Litakatifu nende vindu viosi vili mulio khuva vitakatifu; nalio liliitsa khuva litakatifu. 10Lulondakhu, uliitsa khukhola vwaali nende vindu viosi virumikhanga khuvwo khuva vitakatifu, numali khuvivekha makura, ma vive vitakatifu muno. 11Uliitsa khukhola khandi lukalayi lu khusavilakhu nende vwalilu vwalwo khuva vitakatifu munjila indala yeneyo.

12“Uliitsa khulera Haruni nende vaana veve mu vwinjililu vwi Liheemo Litakatifu, ma uvavoolele visinji khulondokhana khu mulukha. 13Uliitsa khufwala Haruni tsinguvu tsiu vusalisi, nu khumuvekha makura ku khumutakasa khumukhola munjila yeneyo, khuva mutakatifu khwenya andumishile khuli musalisi. 14Uliitsa khulaanga khandi vaana veve nu vafwala mashiati. 15Uliitsa khuvavekha makura khuli wavekha tata wavo na makura, vandumishile khuli vasalisi. Khuvekhwa khwavo na makura yukhu, khuliitsa khuvakhola khuva vasalisi khumatukhu koosi kaliitsa khuvaho.”

16Musa yakhola shia shindu shiosi, khuli Mwami Nyasaye yali namuvoolele akhole. 17Khulitukhu liu khuraanga, liu mweli ku khuraanga, khumuhika kwa khavili, lwa Vaisraeli vali nivaruli mu shivala shia Misri, Liheemo Litakatifu lialombwa. 18Musa yalomba vwalilu vwalio, nasinjilitsa tsifulemu tsialwo, nahamanyinya halala tsisheti tsialio, manasinjilitsa misala chialio. 19Musa yakhunikha Liheemo Litakatifu manameeta khulikhunikha ilwanyi ni shindu shindi, khuli Mwami Nyasaye yali namuvoolele akhole. 20Yavukula machina kakhongwa kavili, manachivikha mu Lisanduku li Lilakano. Yavikha misala khutiila lisanduku lienelo, khandi nalikhunikha ikulu ni shindu shiu khulikhunikha. 21Musa yinjilitsa lisanduku mu Liheemo Litakatifu maniyelelitsa luvaala. Munjila iyi, Musa yashinga Lisanduku li Lilakano khuvula khulolekha, khuli Mwami Nyasaye yali namuvoolele akhole.

22Musa yinjilitsa imesa mu Liheemo Litakatifu, khuluveka luli ivuluka ilwanyi wu luvaala, 23navikha khuyo mikati mutakatifu chiu Mwami Nyasaye, khuli Mwami Nyasaye yali namuvoolele akhole. 24Musa yavikha shikuru shi itaaha mu Liheemo Litakatifu, khuluveka luli ikuvanda, iluveka wundi wi imesa, 25nahaambitsaho tsitaaha imbeli wu Mwami Nyasaye, khuli Mwami Nyasaye yali namuvoolele akhole. 26Musa yavikha vwaali vwalombwa khu itsahabu mu Liheemo Litakatifu, imbeli wu luvaala, 27nasambilakhu vubani vwahuunyanga mwayu mulahi, khuli Mwami Nyasaye yali namuvoolele akhole. 28Yelelitsa luvaala mu vwinjililu vwi Liheemo Litakatifu, 29khali navikha imbeli wu luvaala lwenolo vwaali vwi vihanwa viu khusambwa. Yakhola khu vwaali vwenovo musango kwi shihanwa shiu khusambwa nende shihanwa shi imu, khuli Mwami Nyasaye yali namuvoolele akhole. 30Musa yavikha lukalayi lu khusavilakhu hakari hi Liheemo Litakatifu nende vwaali, manalwitsulitsa matsi ku khusava. 31Musa, Haruni, nende vaana veve vasavilaho makhono kavo nende vilenje viavo 32isaa yosi ya vinjilanga mu Liheemo Litakatifu inoho khutsia khu vwaali, khuli Mwami Nyasaye yali navavoolele vakhole. 33Musa yalomba lwanyi khundulu khwi Liheemo Litakatifu nende vwaali, maniyelelitsa luvaala mu vwinjililu vu lwanyi lwenolo. Nalwo lwa Musa yamala muhinzilu kwosi.

Malesi kali khu Liheemo Litakatifu

(Liv 9:15-23)

34Nalwo lwa malesi kakhunikha Liheemo Litakatifu, ma vukhumi vu Mwami Nyasaye nu vwitsula mulio. 35Musa yakhaywa khwinjila mu Liheemo Litakatifu lienelo, shichila malesi kalikhunikha, khandi vukhumi vu Mwami Nyasaye vwitsula mulio. 36Vaisraeli visuunda nivatsia khusimiikha maheemo ku khumenyamu havundu handi, lwa malesi karulanga khu Liheemo Litakatifu. 37Lwa malesi katsililila khuva khu Liheemo Litakatifu, Vaisraeli valekha khusuundakhu maheemo kavo. 38Mu luchendo lwavo lu khuhuya huya shia havundu hosi, valola khu Liheemo Litakatifu malesi mbasu, khandi mulilu nu kwakhanga khu Liheemo Litakatifu lienelo mu vutukhu.

Currently Selected:

KHURULA 40: LLLCATHOLIC

Highlight

Copy