KHURULA 38

Vwaali vu Khusambilakhu Vihanwa

(Khur 27:1-8)

1Bezaleli yumbakha khandi vwaali vwi vihanwa viu khusambwa nu mulilu khu munyenye; vwali vwalekhana tsimbeka tsiosi nu vuraambi tsimita 2.2, vukalamu tsimita 2.2, khutsia ikulu tsimita 1.3. 2Bezaleli yalomba misala chiu khusinjilitsa khwikulu khwa shia luveka khu tsimbeka tsine tsienetso, khu chive shindu shilala nu vwaali. Yavukhunikha nu mukasa. 3Bezaleli yalomba khandi vindu viosi viu khuvikhakhu vwaali: tsinyungu, vuuma, tsibakuli, tsingaka, nende vindu viu khusambilamu mulilu. Vindu vienevo viosi vialombwa khu mukasa. 4Bezaleli yalomba likamata liu khwanzala mulilu liu vwaali khu mukasa, navikha hasi hi likulutumu khu litushi hakari wu vwaali khutsia ikulu. 5Yalomba tsingara tsine tsiu khuchinga misala, manatsira mu tsimbeka tsine. 6Bezaleli yalomba misala chiu khuchinjilakhu khu musala ku munyenye, nachikhunikha nu mukasa, 7manachivikha mu tsingara khu shia luveka lu vwaali. Vwaali vwali nu vwalombwa khu tsimbaho khandi vwali vwayalaama.

Khulombwa khu Lukalayi Khurula khu Mukasa

(Khur 30:18)

8Bezaleli yalomba lukalayi khu mukasa nende lwalilu khu mukasa khu viiho via vandu vakhali vakholanga mihinzilu mu vwinjililu vwi Liheemo Litakatifu.

Lwanyi lwi Liheemo Litakatifu

(Khur 27:9-19)

9Bezaleli yalombela Liheemo Litakatifu lwanyi khurula khu tsimbala tsia naavwa khu machoro malahi. Khuluveka luli ikuvanda lwi tsimbala tsiali nu vuraambi tsimita 44, 10tsitiililwa ni misala makhomi kavili chialombwa khu mukasa mu lwalilu makhomi kavili ku mukasa, ni tsingaka nende vivia vialombwa khu ifetsa. 11Lwanyi lwali shilala khuluveka luli ivuluka. 12Luveka luli imbo lwali ni tsimbala vuraambi tsimita 22, ni misala likhomi, nende lwalilu likhomi halala ni tsingaka nende vivia vialombwa khu ifetsa. 13Luveka luli ivukwi, ha vwinjililu vwavetsanga, lwanyi lwali khandi nu vukalamu tsimita 22. 14Tsimbala khuluveka lulala lu mu vwinjililu tsiali nu vuraambi tsimita 6.9, ni misala chivaka nende vwalilu vuvaka, 15nende tsimbala tsiu khuluveka lundi lu mu vwinjililu vu lwanyi tsiali nu vuraambi tsimita 6.9, ni misala chivaka nende vwalilu vuvaka. 16Tsimbala tsiosi tsiu khundulu khu lwanyi tsiali tsialombwa khu machoro malahi. 17Lwalilu vwi misala lwali lwalombwa khurula khu mukasa, nende tsingaka, vivia, nende shindu shiu khukhunishila ikulu wi misala shiali shialombwa khu ifetsa. Misala chiosi chiu khundulu mu lwanyi chiali chitiilanyinywa ni vivia vialombwa khu ifetsa. 18Luvaala lu mu vwinjililu vu mu lwanyi lwali lwa naavwa khu machoro malahi ki tsimbusi tsia bulu sambarau, nende tsimuuchi tsiasaywa ni timbusi lukanu. Lwali nu vuraambi tsimita 9 khandi khutsia ikulu tsimita 2, khuli tsimbala tsiu mu lwanyi. 19Lwali lwatiilwa ni misala chine mu vwalilu vune. Tsingaka tsialwo, shindu shiu khukhunishila ikulu walwo, halala ni vivia vialwo viali vialombwa khu ifetsa. 20Tsingomu tsiosi tsi Liheemo khandi tsiu mu lwanyi tsiali tsialombwa khu mukasa.

Vivia Viarumishilwa mu Liheemo Litakatifu

21Iyi nayo ikaratasi yahandikwakhu vivia viosi, viarumishilwa mu Liheemo Litakatifu, havundu ha machina kavili kakhongwa, kali nikavikhwa ka Malako Likhomi kali ni kahandikwakhu. Musa neye wahaana lilako ikaratasi yeneyo, ihandichwi na vandu vu lwivulu lwa Levi, vakholanga muhinzilu nivasinjililwi nu mwana wu musalisi Haruni walaangwangwa Itsamari.

22Bezaleli, mwana wa Uri khandi mukuuka wa Huri, warulanga mu vandu vuluhia lwa Yuda, yalomba vindu viosi, khuli Mwami Nyasaye yali namuvoolele akhole. 23Oholiabu mwana wa Ahisamaki, neye wamukhonyanilanga; yarulanga mu vandu vuluhia lwa Dani. Oholiabu yali mukhonji wi vindu, muchori wi vindu khandi munavi wi vindu khu machoro malahi ka bulu, sambarau nende vumuuchi.

24Itsahabu yosi ya yali niyakhola khuva indakatifu khu Mwami Nyasaye, shichila Liheemo Litakatifu yali nu vulitoho tsikilo 1,000, khulondokhana khu shipimu shiahuchililwa mu matukhu kenako. 25Ifetsa yarula mu vandu vali nivavalitswa yali nu vulitoho tsikilo 3,430, khulondokhana khu shipimu shiahuchililwa mu matukhu kenako. 26Vulitoho vwi ifetsa vwenovo, vwalekhana nisavu ya vandu vavalitswa varunga; shia mundu yarunganga shipimu shitushili, khulondokhana khu shipimu shiahuchililwa mu matukhu kenako. Isavu ya vandu vasatsa vavalitswa vali ni mihika makhomi kavili inoho vahindila, vali vandu tsiheelefu tsimia sita na vavaka tsimia tsiranu na makhomi karanu. 27Ifetsa tsikilo 3,400 tsiarumishilwa khulomba lwalilu imia indala lwi Liheemo Litakatifu nende luvaala lwalombwa khu ifetsa, tsikilo 34 khu shia lwalilu lwenolo. 28Bezaleli yalomba vivia, tsingaka tsi misala nende vindu viu khukhunishila ikulu khu ifetsa tsikilo 30. 29Mukasa kwali nu kwakholwa khuva mutakatifu khu Mwami Nyasaye, kwali nu vulitoho tsikilo 2,425. 30Bezaleli yachirumishila khulomba vwalilu vu mu vwinjililu vwi Liheemo Litakatifu, vwaali vwalombwa khu mukasa halala ni tsiwaya tsiavwo khu mukasa, vindu viosi venyekhanga khu vwaali, 31vwalilu vu khundulu khu mu lwanyi nende vu mu vwinjililu vu mu lwanyi, khandi tsingomu tsiosi tsi Liheemo Litakatifu nende khundulu khu mu lwanyi.

Currently Selected:

KHURULA 38: LLLCATHOLIC

Highlight

Copy