KHURULA 33

Lilako liu Khurula ha Shikulu shia Sinai

1Mwami Nyasaye yavoolela Musa, “Ruli havundu hanu, yivi nende vandu va warulitsa mu shivala shia Misri; ma mutsi mu shivala shia nalaaka, niitsa khuha Aburahamu, Isaka, nende Yakobo, halala na vitsukhulu vavo. 2Niitsa khuruma injelosi khukhwimilila imbeli wowo; khandi niitsa khukhunga mu shivala shienesho Vakanaani, Vaamori, Vaahitse, Vapeerizi, Vaahivi, nende Vayeebusi. 3Mutsitsanga mu shivala shili ni lilova lilahi khandi shinuulu. Navutswa inzi niitsa khuvula khutsia na munyi; shichila muli vandu vahaaka; khandi nyala khumumulula numuli khu luchendo.”

4Lwa vandu vahulila ndio, varaanga khwikhula khandi mundu avulakhuho wifwalakhu khandi matemba. 5Mwami Nyasaye yali uvoolele Musa avavoolele, “Muli vandu vahaaka. Niiva nyala khutsia na munyi khali hatititi hene, nakhamutivitsi munyi voosi. Fwaluli nunundi matemba kenyu ka mwifwali, manganakane kanyala khumukhola munyi.” 6Lwa vasimukha nivarula ha Shikulu shia Sinai, vanavula vindu via vali nivifwali.

Liheemo Litakatifu

7Isaa yosi ya Vaisraeli vumbakhanga maheemo ku khumenyamu, Musa yahilaho Liheemo Litakatifu, khandi nalivikha ihale wene khurula mu maheemo ka vandu vamenyamu. Liheemo lienelo lialaangwangwa Liheemo Litakatifu. Mundu wenyanga khureeveshitsa khu Mwami Nyasaye, yatsitsanga khulio. 8Isaa yosi ya Musa yatsitsayo mu Liheemo Litakatifu, vandu voosi vasinjililanga, shia mulala mu vwinjililu vwi liheemo lielie; ma aheenza Musa khutukha lwa yinjila mu Liheemo Litakatifu. 9Lwa Musa yali niyakhinjilamu, malesi malitoho kikhanga hasi, makasinjila mu vwinjililu vwi Liheemo Litakatifu; ma Mwami Nyasaye alomoloma khu Musa khurula mu malesi. 10Lwa vandu voosi valola malesi malitoho nikasinjile mu vwinjililu vwi Liheemo Litakatifu, vandu voosi vasinjila nivasaala khuye, shia mulala mu vwinjililu vwi liheemo lielie. 11Mwami Nyasaye yalomolomanga khu Musa moni namoni, khuli mundu alomolomanga mwene nu mulina wewe. Nalwo lwa Musa yakalukha mu maheemo ka vandu vamenyamu; navutswa mukhonyani wewe muvukha Yoshwa, mwana wa Nuni, wali muvukha, shiyarulanga mu Liheemo Litakatifu tawe.

Mwami Nyasaye Yalaaka Aliitsa khuva Halala na Vandu Veve

12Musa yavoolela Mwami Nyasaye, “Ni katoto umbolele ndi nzimilili vandu yava khutsia mu shivala shienesho; navutswa shiumbolelekhu mundu wa uliitsa khuruma khutsia ninzi tawe. Uvooli wamanya Inzi vulahi muno khandi uyaanzitswang'wa ninzi. 13Khu, niiva nakhuyaanzitsa, mbolela ka ukanakananga khukhola, khu nzililile khukhurumishila khandi khukhuyaanzitsa. Kenyekhanga khandi umanye ndi wamala khurovola luhia lukali yulu khuva lwolwo mwene.”

14Mwami Nyasaye yavoola, “Inzi mwene niitsa khutsia nivi; khandi niitsa khukhuha tsingulu tsiu khukuura.”

15Musa yavoolela Mwami Nyasaye, “Niiva uliitsa khwambakhana khutsia na khutsi, lekha khukhurulitsa havundu ha khuli hanu. 16Mundu yakhamanya munjila shina, wayaanzitswa na vandu vovo khandi wayaanzitswa ninzi, niiva unyala khwambakhana khutsia na khutsi? Khuvaho khwokhwo na khutsi khunyala khwavukhanyinya khutsi khurula khu vandu vandi voosi khulilova.”

17Mwami Nyasaye yavoolela Musa, “Niitsa khukhola vutswa, khuli lwa ureevi; shichila nakhumanya vulahi vwene, khandi nivi unyanzitsanga.”

18Musa yavoolela Mwami Nyasaye, “Nuyaanza umanyinye nunundi vukhumi vwovwo.”

19Mwami Nyasaye yavoola, “Niitsa khuchila vindu vianje viosi vilahi khuvira imbeli wowo, nu khulanditsa lira lianje litakatifu imbeli wowo. Inzi Mwami Nyasaye niitsa khulolela tsimbavasi mundu wa niitsa khurovola, khandi khuvela tsimbavasi mundu wa niitsa khurovola. 20Navutswa shiuliitsa khulolakhu mu moni mwanje tawe; shichila mundu avulakhuho unyala khundola, khandi atsililile khuva mwoyo, 21nikhali, khuli hanu na havundu hali himbi khwinzi, ha unyala khusinjila khu lwanda. 22Lwa vukhumi vwanje vuliitsa khuva nu vuviranga, niitsa khukhuvikha munduhu mu lwanda, khukhunishi nu mukhono kwanje khutukha lwamala khuviraho. 23Nalwo lwa niitsa khurulitsaho mukhono kwanje; ulole mukongo kwanje, navutswa mu moni mwanje tawe.”

Currently Selected:

KHURULA 33: LLLCATHOLIC

Highlight

Copy