KHURULA 29

Mivaalo ku Khukhola Haruni nende Vaana Veve Khuva Vasalisi

1“Yaka nako mivaalo kukhola Haruni nende vaana veve, khuvakhola khuva vatakatifu khuva vasalisi vu khukhola muhinzilu kwanje. Uliitsa khuvukula shimoli shihunwa nende makondi mamiiko kavili, vuchila imbala yosi. 2Uliitsa khurumishila vusi vwi inganu vulahi muno, navutswa vuchila mamela. Uliitsa khuteekha mikati milala chia tsukanywa na makura ku musayituni, chindi vuchila makura ku musayituni; khandi chindi khuli visikuti via vekhwakhu makura. 3Uliitsa khuvikha mikati chienecho mu muhinda, ma umbee khuli shihanwa, lwa muliitsa khuva numukholanga musango ku khusinza shimoli shihunwa nende mamiiko kavili kenako.

4“Uliitsa khulera Haruni nende vaana veve mu vwinjililu vwi Liheemo Litakatifu, nu khuvavoola vave nivisinganga khulondokhana khu mulukha. 5Uliitsa khufwala Haruni tsinguvu tsiu vusalisi -- lishiati, ikaanzu yu mukari mwi shiambala, inguvu yu mu shiliru, nende lukhanda. 6Uliitsa khumufwala shilemba khu murwi kwekwe, khandi umuvohe shimanyilu shi itaachi khushio, shiu khukholwa khuva mutakatifu shiahandikwakhu ‘Yakholwa khuva mutakatifu khu Mwami Nyasaye.’ 7Uliitsa khuvukula makura ku mundu avekhwangwa, ukasuundule khu murwi kwekwe; ma umutakase.

8“Nalwo lwa uliitsa khulera vaana veve, nu khuvafwala tsikaanzu; 9uliitsa khuvavoha tsikhanda mu visiindi viavo, nu khuvafwala tsikofia khu mirwi chiavo. Nindi uliitsa khukhola Haruni nende vaana veve khuva vasalisi. Vo vene nende vitsukhulu vavo, valiitsa khundumishila khuli vasalisi mihika ni mihika.

10“Uliitsa khulera shimoli shihunwa imbeli wi Liheemo Litakatifu, ma uvoolele Haruni nende vaana veve vatiile makhono kavo khu murwi kwashio. 11Uliitsa khusinzila shimoli shihunwa shienesho, havundu hanje hatakatifu mu vwinjililu vwi Liheemo Litakatifu. 12Uliitsa khuvukula masahi malala ki shimoli shienesho ma ukamitse khandi khwikulu khu vwaali. Uliitsa khusuundula masahi karikale khu vwalilu vu vwaali. 13Uliitsa khuvukula khandi shivana shi viungu viosi viu munda, shivana shi ingurumani, shivana shiu mu tsimbiko tsiosi tsivili, ma usambile khu vwaali. 14Navutswa uliitsa khusambila inyama yi shimoli shihunwa, liseelo liashio, nende maala kasho ihale wene khurula mu maheemo ka vandu vamenyamu. Yishi nashio shihanwa shiu khurulitsaho vwoni vwa vasalisi.

15“Nalwo lwa uliitsa khuvukula likondi lilala limiiko khu makondi kavili kenako, ma uvoolele Haruni nende vaana veve vavili vatiile makhono kavo khu murwi kwalio. 16Uliitsa khusinzila likondi limiiko lienelo, khandi uvukule masahi kalio nukamitsa mu tsimbeka tsine tsiosi tsiu vwaali. 17Uliitsa khukhalakanyinya likondi limiiko mu vitonye; ma wochitsi murwi nende vitonye vindi yevo. 18Uliitsa khusambila khu vwaali inyama yosi yi limiiko. Mwayu kuhuunyanga, nu kurula khu shihanwa yishi kunyanzitsanga.

19“Uliitsa khuvukula likondi limiiko lindi yelo, khandi uvoolele Haruni nende vaana veve vatiile makhono kavo khu murwi kwalio. 20Uliitsa khusinza likondi limiiko lienelo. Uliitsa khuvukula masahi malala kalio, ma ukuveshe khu shiroyi shisatsa shia Haruni khandi khu shiroyi shisatsa shia mwana wewe, khu vitere viavo vikali viu khu mukhono musatsa nende khu vitere viavo vikali viu khu vilenje visatsa. Mitsa masahi kaliitsa khurikala khu tsimbeka tsine tsiu vwaali. 21Nalwo lwa uliitsa khuvukulakhu masahi malala kali khu vwaali nende makura malala kukhuvekhwa, ma akamitse khu Haruni khandi khu tsinguvu tsietsie nende vaana veve nu khu tsinguvu tsiavo. Ye mwene, vaana veve ni tsinguvu tsiavo tsiliitsa khuva tsikholelwi khuva tsindakatifu.

22“Uliitsa khukhalaaka shivana shi likondi limiiko, shivana shiu musembe, shivana shi viungu viu munda, luveka lulahi lwi ingurumani, shivana shiu mu tsimbiko tsivili nende shi likulu li shilenje shisatsa. (Yili nalio likondi limiiko liu khurumishila khukhola mundu khuva musalisi.) 23Uliitsa khuvukula shia shitonye shiu mukati khurula khu mukati lukanu na lukanu mu muhinda chiahaanwa khwinzi Mwami Nyasaye: Mukati mulala kwalombwa na makura ku musayituni nende kundi kwalombwa vuchila makura kenako nende shisukuti shilala. 24Uliitsa khuvikha mikati chienecho chiosi mu makhono ka Haruni nende vaana veve, ma uvavoolele vachikhole khuva mitakatifu khwinzi Mwami Nyasaye khuli shihanwa shilahi. 25Uliitsa khuvukula khurula mu makhono kavo nu khusambila khu vwaali, ikulu wi shihanwa shiu khusambwa, khuli shihanwa shi shiukhulia khwinzi Mwami Nyasaye. Mwayu kuhuunyanga, nu kurula khu shihanwa yishi kunyanzitsanga.

26“Uliitsa khuvukula tsimbele tsi likondi limiiko lienelo, ma utsikhole khuva tsindakatifu khwinzi Mwami Nyasaye khuli shihanwa shilahi. Shitonye shiu muruku yuku ni shienyu.

27“Lwa musalisi aliitsa khuva nakholelwi khuva musalisi, tsimbele halala nu kukulu kwi likondi limiiko lirumikhanga khumukhola khuva musalisi, viliitsa khukholwa khuva vitakatifu khwinzi khuli shihanwa shilahi. Viliitsa khuvikhwa haluveka khuva via vasalisi. 28Yishi shiliitsa khuva shitonye shia khase khosi, shia Vaisraeli vahaananga khu Haruni nende vaana veve. Nashio shitonye shia Vaisraeli vahaananga khu Mwami Nyasaye, khurula khu shihanwa shiavo shiu khulera milembe.

29“Tsinguvu tsiu vusalisi tsia Haruni, tsiliitsa khuhaanwa khu vaana veve, lwa aliitsa khuva niyakhakhutsa, khu vatsifwale lwa venyanga khukholwa khuva vasalisi. 30Mwana wa Haruni uliitsa khukalukha mu vwiyangu vwevwe khuli musalisi, khandi uliitsa khwinjila mu Liheemo Litakatifu khundumishila Havundu Hatakatifu, aliitsa khwifwala khumatukhu saba tsinguvu tsienetso.

31“Uliitsa khuvukula inyama yi likondi limiiko yelo, yarumikha khukhola Haruni nende vaana veve khuva vasalisi, ma uchiteshele Havundu Hatakatifu. 32Haruni nende vaana veve, valiitsa khulia inyama yi likondi limiiko nende mukati kurikale mu muhinda, mu vwinjililu vwi Liheemo Litakatifu. 33Valiitsa khulia yeshio shiarumikha mu mulukha ku khusemehwa vwoni, lwa vakholwa khuva vasalisi. Ni vasalisi vonyene, vanyala khulia shiukhulia shienesho; shichila ni shitakatifu. 34Niiva inyama iliitsa khurikalakhu inoho mukati kurikale, vuchila khuliilwa khutukha mu mavwevwe, uliitsa khusamba nu mulilu. Shiumuliitsa khulia tawe, shichila ni vitakatifu.

35“Nako ka uliitsa khukhola Haruni nende vaana veve, khuli inzi mwene khuvoolele ukhole. Uliitsa khuvakhola khuva vasalisi khumatukhu saba. 36Shia litukhu uliitsa khusinza shimoli shihunwa khuli musango, khu vwoni vwenyu vusemehwi. Yaka kaliitsa khulomba vwaali khuva vunihu. Uliitsa khuvutakasa na makura ku musayituni, khuvulomba khuva vutakatifu. 37Uliitsa khukhola kenako shia litukhu khumatukhu saba. Vwaali vwenovo, vuliitsa khuva vutakatifu muno; khandi mundu inoho shindu shiosi shilitsa khutiilakhu khuvwo, shilitsa khusalilitswa ni tsingulu tsiu vutakatifu vu vwaali.

Vihanwa via shia Litukhu

(Liv 28:1-8)

38“Shia litukhu khumatukhu koosi kaliitsa khuvaho, uliitsa khusinzila khu vwaali vimeme vivili vi likondi, vili nu muhika mulala khuli musango. 39Uliitsa khusinza shimeme shi likondi shilala mu mavwevwe khandi shimeme shindi halukolovo. 40Halala ni shimeme shi likondi shiukhuraanga, uliitsa khuvukula vusi vulahi vwi inganu ikilo indala vwa tsukanywa ni ilita indala ya makura ku musayituni konyene ma uhaane khuli musango. Uliitsa khusuundula hasi ilita indala yi idivai khuli shihanwa. 41Uliitsa khusinza shimeme shi likondi shia khavili halukolovo; ma uhaane shipimu shilala shiu vusi vwi inganu khuli shiukhuraanga, makura ku musayituni nende idivai khuli lukholi mu mavwevwe. Yishi nashio shihanwa shi shiukhulia khwinzi, Mwami Nyasaye, khandi mwayu kwashio kuhuunyanga nu kunyanzitsa. 42Shihanwa shiu khusambwa yishi, shilitsa khutsililila khuhaanwa imbeli wanje mu vwinjililu vwi Liheemo Litakatifu khumatukhu koosi kaliitsa khuvaho. Naho havundu ha niitsa khwakanila na vandu vaanje, manomolome khu munyi. 43Niitsa khwakana na Vaisraeli havundu henaho, khandi vukhumi vwanje, vuliitsa khukhola havundu henaho khuva hatakatifu. 44Niitsa khulomba Liheemo Litakatifu nende vwaali khuva vitakatifu, nu khwahula haluveka Haruni nende vaana veve, khundumishila khuli vasalisi. 45Niitsa khumenya na Vaisraeli, ninzi niitsa khuva Nyasaye wavo. 46Valiitsa khumanya ndi ninzi Mwami Nyasaye, uli Nyasaye wavo wa varulitsa mu shivala shia Misri, khwitsa khumenya navo. Ninzi Mwami Nyasaye, uli Nyasaye wavo.

Currently Selected:

KHURULA 29: LLLCATHOLIC

Highlight

Copy