KHURULA 27

Vwaali vu Khusambilakhu Misango

(Khur 38:1-7)

1“Uliitsa khumbakha vwaali khurula khu musala ku munyenye. Vuliitsa khuva shilala mu tsimbeka tsiosi, vuraambi vuliitsa khuva tsimita 2.2, vukalamu vuve tsimita 2.2, khandi vuve tsimita 1.3 khutsia ikulu. 2Uliitsa khusinjilitsa misala khwikulu khu mu tsimbeka tsine tsiu vwaali. Chiliitsa khulomba shindu shilala nu vwaali, ma vwaali vwosi vuveshwi nu mukasa. 3Uliitsa khulomba tsinyungu tsi likooshe likwamu, majiko, tsibakuli, tsingaka, nende tsinjoo tsiu khwahula mulilu; vindu yivi viosi, viliitsa khulombwa khu mukasa. 4Uliitsa khwevelakhu vindu viu khulinda vwaali vialombwa khu mukasa, nu khuvikhakhu tsingara tsine tsiu khuchinjilakhu tsialombwa khu mukasa mu tsimbeka tsiavwo. 5Uliitsa khwevela ineti hasi khundulu khu vwaali, himbi khutukha hakari wu vwaali. 6Uliitsa khulomba misala chiu khuchinjilakhu vwaali khu musala ku munyenye, nu khuchivekha nu mukasa. 7Misala chienecho chiliitsa khusinjilitswa mu tsingara khu chive khu tsimbeka tsivili tsiu vwaali, lwa vuliitsa khuva nuvuchingwangwa. 8Uliitsa khulomba vwaali vwenovo khu tsimbaho, nu khuvulekha vwalame, khulondokhana khuli nakhumanyinya nuli khu shikulu.

Lwanyi lwi Liheemo Litakatifu

(Khur 38:9-20)

9“Uliitsa khulomba lwanyi lwi Liheemo Litakatifu khu machoro malahi. Khuluveka lwalio luli ikuvanda tsimbala, tsiliitsa khuva nu vuraambi tsimita 44, 10nichitiililwi ni vivia viu mukasa makhomi kavili khu lwalilu lwalombwa khu mukasa makhomi kavili, ni tsingaka nende vivia vialombwa khu ifetsa. 11Muliitsa khukhola malala mele, khuluveka luli ivuluka wu lwanyi lwenolo. 12Khuluveka lwalio luli imbo, khuliitsa khuva ni tsimbala nu vuraambi tsimita 22, ni misala likhomi nende lwalilu likhomi. 13Khuluveka lwalio luli ivukwi, ha vwinjililu vuli, lwanyi luliitsa khuva khandi nu vukalamu tsimita 22. 14Tsimbala nu vuraambi tsimita 6.6 tsiliitsa khuva khuluveka lu mu vwinjililu, ni misala chivaka nende vwalilu vuvaka vwalio. 15Khuluveka lundi, tsimbala tsiliitsa khuvakhu nu vuraambi tsimita 6.6, misala chivaka nende vwalilu vuvaka vwalio. 16Mu vwinjililu vu lwanyi lwenolo, khuliitsa khuvamu nu luvaala lu vuraambi tsimita 9, lwa naavwa khu tsimbusi tsia bulu, sambarau, nende tsimuuchi, tsiasiaywa ni isindani. Vuliitsa khutiilwa ni misala chine mu vwalilu vune vwalio. 17Misala chiosi chevwa lwanyi, chiliitsa khuhabanywa ni vivia vialombwa khu ifetsa khandi tsingaka tsialwo, tsiliitsa khulombwa khu ifetsa khandi vwalilu vwalwo vuliitsa khulombwa khu mukasa. 18Lwanyi lwenolo luliitsa khuva nu vuraambi tsimita 44, vukalamu tsimita 22, nende tsimita 2.2 khutsia ikulu. Tsimbala tsiliitsa khulombwa khu machoro malahi, nu vwalilu vwalombwa khu mukasa. 19Vindu viosi viliitsa khurumishilwa mu Liheemo Litakatifu, khandi tsingomu tsiosi tsi Liheemo Litakatifu khandi tsiu mu lwanyi, viliitsa khulombwa khu mukasa.

Makura ku Khwashitsa Itaaha

(Lev 24:1-4)

20“Voolela Vaisraeli vakhulerele makura malahi ku musayituni ku mu itaaha, khu itaaha yashitswi shia halukolovo. 21Haruni nende vaana veve, valiitsa khwashitsa itaaha yeneyo mu Liheemo Litakatifu, ilwanyi wu luvaala luli imbeli wi Lisanduku li Lilakano. Iliitsa khutsililila khwakha hawenaho khutukha mu mavwevwe. Lilako yili, liliitsa khutsililila khulondwa na Vaisraeli nende vitsukhulu vavo khumatukhu koosi.

Currently Selected:

KHURULA 27: LLLCATHOLIC

Highlight

Copy