KHURULA 24

Vandu Vahuchilila Khulonda Nyasaye

1Mwami Nyasaye yavoolela Musa, “Hambi khu shikulu yishi khwinzi, Mwami Nyasaye, yivi nende Haruni, Nadabu, Abihu, nende vimilili va Vaisraeli makhomi saba; khandi lwa muliitsa khuva numushili ihale wene, muliitsa khusaala khwinzi. 2Yivi wonyene uliitsa khwisuunda himbi khwinzi, navutswa vandu vandi voosi, valiitsa khuvula khwisuunda khwinzi.”

3Musa yasimukha natsia khuvoolelakhu vandu makhuva ku Mwami Nyasaye yali namuvoolele nende malako keke; ma vandu voosi nivavoolela khulala, “Khulakhola shia shindu shiosi, shiu Mwami Nyasaye avooli.” 4Musa yahandika shia shindu shiosi, shiu Mwami Nyasaye yali namuvoolele. Nukushili mu mavwevwe litukhu lialondakhu, Musa yumbakha vwaali hasi hi shikulu; manasimiikha machina likhomi na kavili, shia lichina khu shia luhia, lwa vandu vi tsimbia likhomi na tsivili tsia Israeli. 5Yaruma vayayi vavukha, nivasamba misango khu Mwami Nyasaye, khandi nivasinza tsing'ombe tsindala tsiu musango, khuli shihanwa shiu khulera milembe. 6Musa yavukula inusu ya masahi malala ki miruku chienecho navikha khu tsibakuli; khandi inusu ya masahi kandi namitsa khu vwaali. 7Nalwo lwa yavukula shitabu shi lilakano, mwa makhuva ku Mwami Nyasaye kali nikahandikwa; manasomela vandu ikulu. Vandu nivavoola, “Khutsitsanga khukhola shia shindu shiosi, shiu Mwami Nyasaye atsitsanga khukhuvoolela khukhole khandi khulonde malako keke.”

8Musa yavukula masahi, namitsa khu vandu, navoola, “Yaka nako masahi kahambanyinya lilakano liu Mwami Nyasaye yakhola na munyi, lwa yahaana makhuva yaka koosi.”

9Musa, Haruni, Nadabu, Abihu, nende vimilili makhomi saba va Vaisraeli vanina nivatsia khu shikulu 10nivalola Nyasaye wa Israeli. Hasi ha yasenanga khwaliho ni shindu shiasasanga injila ilenjeli, ya bulu khuli malesi. 11Mwami Nyasaye shiyasalilitsa vimilili va Vaisraeli venavo tawe; navutswa valola Nyasaye, manivalia shiukhulia khandi nivang'wa naye.

Musa khu Shikulu shia Sinai

12Mwami Nyasaye yavoolela Musa, “Hamba khu shikulu handi hanu; khandi lwa uliitsa khuva nuliho, niitsa khukhuha machina kavili kakhongwa ka nahandikakhu malako koosi, kaliitsa khuva mivaalo ka vandu.” 13Musa nende mundu wamukhonyanga muhinzilu walaangwangwa Yoshwa virechekha; ma Musa naraanga khunina khutsia khu shikulu shia Nyasaye. 14Musa yavoolela vimilili, “Mukhulinde hanu khutukha lwa khukalukha. Haruni nende Huri valiitsa khuva na munyi; mundu wenyanga vukhonyi vwosi, aliitsa khutsia khuvo.”

15Lwa Musa yanina natsia khu shikulu, malesi kashikhunikha. 16Vukhumi vu Mwami Nyasaye vwalolekha khu Shikulu shia Sinai; malesi ni kashikhunikha khumatukhu sita; khulitukhu lia saba, Mwami Nyasaye nalaanga Musa khurula mu malesi. 17Vukhumi vu Mwami Nyasaye vwalolekha khu Vaisraeli, khuli mulilu nu kwakhanga khu shikulu. 18Musa yinjila mu malesi, lwa yali naninanga khutsia khu shikulu. Yamenyayo, vutukhu nu mbasu khumatukhu makhomi kane.

Currently Selected:

KHURULA 24: LLLCATHOLIC

Highlight

Copy