KHURULA 22

Malako Shichila Shivaso

1“Niiva mundu aliitsa khuhuuva ing'ombe inoho likondi nu khulisinza inoho khulikuulitsa, aliitsa khurunga ing'ombe tsiranu khu tsing'ombe indala ya yahuuva; khandi makondi kane khu likondi lilala lia yahuuva.

2“Niiva mundu aliitsa khukumilwa nahuuvanga munzu vutukhu nu khwiirwa, mundu umwiiri mwenoyo, shialiitsa khuva nakholikhu vutamanu vwosi tawe. 3Navutswa niiva kaliitsa khwikholekha mbasu, aliitsa khuva usuundule shisahi. Shihuuvi shilitsa khurunga shia shindu shiosi shia yahuuva, navutswa niiva avulakhu shindu shiosi, aliitsa khukuulitswa khu ave urunji vindu via yahuuva. 4Niiva aliitsa khunyolekha nu muruku kwa yahuuva nu kushili mwoyo -- ive ichilishi inoho ipunda, inoho likondi -- aliitsa khuvasitswa hali khavili.

5“Niiva mundu aliitsa khuhila miruku chiechie khutsia khwaya mushikuri, inoho mu mulimi kwi misabibu, ma miruku chienecho chitsi khulia viraakwa vili mu mulimi ku wundi, mundu mwene miruku aliitsa khuvasitswa viraakwa vili mu mulimi kwekwe inoho mu mulimi kwi misabibu.

6“Niiva mundu aliitsa khuhaambitsa mwene mulilu mu mulimi kwekwe, ma mulilu kwenoko kulande khuvirila mu shisakha khwinjila mu mulimi ku wundi ma kusambe viraakwa vilimu inoho viakhalakwa nu khurelwa mu vituma, mundu wahaambitsa mulilu mwenoyo, aliitsa khurunga viraakwa viosi viu mulilu kwasamba nu kwononyinya.

7“Niiva mundu aliitsa khuhuchilila khuvishila weshie tsisenti inoho khumuvishila vindu vili nu vukhonyi muno, ma wundi avihuuvi khurula munzu mwemwe, niiva shihuuvi shilitsa khukumilwa, shiliitsa khuvasitswa hali khavili. 8Navutswa niiva shihuuvi shilitsa khuvula khukumilwa, mundu mwene inzu mwenoyo aliitsa khulerwa havundu ha vasaalilanga nu khwisuuhila hawenaho ndi shiyahuuvakhu miandu chiu weshie woyo tawe.

9“Muviyaalo viosi khulondokhana khu miandu, chive ni tsing'ombe, tsipunda, makondi, tsinguvu, inoho shindu shiosi shiakora, vandu vavili vavoolanga miandu chienecho ni chiavo, valiitsa khuhilwa havundu ha vasaalilanga. Mundu wa Nyasaye aliitsa khuvoola neye mutamanu, aliitsa khurunga hali khavili wundi woyo.

10“Niiva mundu aliitsa khuhuchilila khulindila wundi ipunda, ing'ombe, likondi, inoho muruku kundi, ma muruku kwenoko kukhutsi inoho kusalilitswi inoho kuvukulwi na vandu vaseeranga vandi, khandi niiva mushiahidi wosi avulakhuho; 11mundu mwenoyo aliitsa khutsia havundu ha vasaalilanga nu khwisuuha ndi shiyahuuva muruku ku wundi woyo tawe. Niiva muruku kwenoko shiukwali kwahuuvwa tawe, mwene kwo aliitsa khuhuchilila khukoritsa, ma mundu wakulindanga woyo avuli khumurunga. 12Navutswa niiva muruku kwenoko kuliitsa khuva kwahuuvwa, mundu mwenoyo aliitsa khurunga khandi mwene kwo. 13Niiva kwali kwayiirwa ni tsinyama tsiumbulimu, mundu mwenoyo aliitsa khulera vitonye viarikala vi tsinyama tsiu muruku kwenoko khuli shimanyilu; shialiitsa khurunga muruku kwali nukwiirwa ni tsinyama tsiumbulimu tawe.

14“Niiva mundu aliitsa khusava wundi muruku, makusalilitswi inoho kukhutsi lwa mwene kwo avulaho, mundu wasava mwenoyo aliitsa khurunga muruku kundi. 15Navutswa niiva kenako kakholekha mwene muruku kwenoko naliho, mundu wasava mwenoyo shialiitsa khurunga tawe. Niiva muruku kwenoko kwakombolwa, tsisenti tsiliitsa khurungwa lwa vakombola, tsiliitsa khurungwa muruku kwenoko.

Malako Khulondokhana khu Mwiima nende Idini

16“Niiva mundu aliitsa khuvoolitsa mwana wi shikhana muchima, ushili khuselelwa nu khumwononyinya, mundu mwenoyo aliitsa khurunga vukhwi, nu khumuhila ave mukhali wewe. 17Niiva tata wu mwana wi shikhana mwenoyo, aliitsa khukaya mundu umwononyinyi avuli khumuhila, aliitsa khurunga vukhwi, shichila vuchima vwonyene.

18“Mundu mukhali wu kholanga vuloochi aliitsa khwiirwa.

19“Mundu uliitsa khukona nu muruku aliitsa khwiirwa.

20“Muliitsa khwiira shia mundu wosi wu kholelanga vanyasaye vandi misango, navutswa wayambakhana khukholela inzi Mwami Nyasaye.

21“Muvuli khwihonelakhu mundu mucheni inoho khumutambitsa; shichila khali munyi mwali vandu vacheni mu shivala shia Misri. 22Muvuli khwihonelakhu mukhutsakhali inoho mu visandu. 23Niiva muliitsa khukhola kenako, ni kilikali Inzi Mwami Nyasaye, niitsa khuvahulila lwa vandilila vakhonye; 24khandi namulolela vurima. Niitsa khumwiira muliihe. Vakhali venyu valiitsa khukwa vakhutsakhali, khandi vaana venyu vave vavisandu.

25“Niiva muliitsa khwikopitsa mulala khu vandu vaanje vamanani tsisenti, muvuli khukholakhu khuli vandu viikopitsanga vandi tsisenti vakholanga, mavareeva vanyolelekhu vukhala. 26Niiva muliitsa khuvukula inguvu yu wundi, khuli shindu shia mukumila mu makhono shimanyinyanga aliitsa khumurunga, muliitsa khumukalushitsila liuva nilishili khuyeela, 27shichila nayo inguvu yali nayo yonyene, inyala khumuha luya. Ni shina shindi shianyala khwifwala khukona? Lwa mureende wenyu aliitsa khulila khwinzi mukhonye, niitsa khumuhulishitsa shichila ndi wi tsimbavasi.

28“Muvuli khulomolomakhu shindu shitamanu khulondokhana khu Nyasaye, inoho khulaama mwimilili wa vandu venyu.

29“Mumbe vihanwa khurula khu lichesa lienyu, idivai yenyu, nende makura ki misayituni kenyu, lwa muliitsa khuva nu mwakhamala khuchesa.

“Mumbe vaana venyu vakhulundu khwivulwa vi shiyayi.

30Mumbe shimoli shienyu shi ing'ombe shiukhuraanga khwivulwa nende shimeme shienyu shiu khuraanga shi likondi. Lekha shivulwa shisatsa shive na nyina washio khumatukhu saba, mamumbe khulitukhu lia munane.

31“Munyi muli vandu vaanje vatakatifu. Muvuli khuliakhu inyama yosi yi tsinyama tsiumbulimu tsiira. Muliitsa khusiuvila tsisiimbwa inyama yeneyo.

Currently Selected:

KHURULA 22: LLLCATHOLIC

Highlight

Copy