KHURULA 19
19
Vaisraeli ha Shikulu shia Sinai
1Khumweli kwa khavaka lwa Vaisraeli vali nivakharula mu shivala shia Misri khulitukhu lienelo -- vatukha mu Shiangalangwi shia Sinai. 2Lwa vali nivakharula mu litaala lia Refidimu, vinjila mu Shiangalangwi shia Sinai, Vaisraeli vasimiikha maheemo kavo ku khumenyamu imbeli wi shikulu shienesho. 3Nalwo lwa Musa yanina shikulu khutsia khulola Nyasaye; ma Mwami Nyasaye namulaanga khurula mu shikulu navoola, “Uvoolele vitsukhulu va Yakobo, 4‘Munyi vene muloli ka nakhola mu shivala shia Misri, khandi khuli namuchinga khuli shilitsa shichinganga viminyoli viashio mu tsimbaha manimulera mwene hanu khwinzi. 5Niiva muliitsa khulonda makhuva kaanje viashio khandi mutsililile khumenya khulondokhana khu lilakano lianje, muliitsa khuva vandu vaanje mwene. Vandu voosi mu shivala ni vaanje, navutswa muliitsa khuva vandu vaanje va narovola, 6nivali vandu vakholwa khuva vatakatifu khwinzi wonyene. Muliitsa khundumishila khuli vasalisi.’ ” 7Nalwo lwa Musa yakalukha hasi, nalaanga halala vimilili va Vaisraeli, navavoolela shia shindu shiosi, shiu Mwami Nyasaye yali namuvoolele. 8Vandu voosi vavoolela khulala, “Khulakhola shia shindu shiosi shiu Mwami Nyasaye avooli,” ma Musa navoolela Mwami Nyasaye makhuva kenako.
9Mwami Nyasaye yavoolela Musa, “Niitsa khwitsa khu yivi, khuvirila mu malesi malitoho, khu vandu valihulila ninomolomanga nivi, khandi vakhusuuvile khumatukhu koosi.”
Musa yavoolela Mwami Nyasaye, ka vandu vali nivavooli; 10ma Mwami Nyasaye namuvoolela, “Tsia khu vandu, ma uvatakase nunundi khandi mukamba. Uvavoolele vafuye tsinguvu tsiavo 11khandi virecheshe shia litukhu lia khavaka. Khulitukhu lienelo, niitsa khwikha hasi khurula khu Shikulu shia Sinai, ha vandu voosi valiitsa khundolela. 12Uliitsa khusimiikha lwakho khundulu khwi shikulu, khu vandu vavuli khulusila. Uliitsa khuvavoolela vavuli khunina khu shikulu inoho khali khwisuunda himbi khushio. Niiva mundu aliitsa khutiila khu shikulu, aliitsa khwiirwa; 13khali aliitsa khuleswa na machina inoho nu vura, vuchila mundu khumutiilakhu. Yaka kaliitsa khwikholekha, khali khu vandu inoho miruku. Navutswa lwa shisiliva shilitsa khukhuvwa, nalwo lwa vandu valiitsa khunina khu shikulu.”
14Lwa Musa yali niyakhakholomokha hasi khurula khu shikulu, khutsia khulola vandu, yavakasitsa, ma vandu nivafuya tsinguvu tsiavo. 15Musa yavoolela vandu, “Mwirecheshe vene khulitukhu lia khavaka; shia mulala khu munyi avuli khukonakhu nu mundu mukhali.”
16Khwali ni likulu nende luheni khulitukhu lia khavaka mu mavwevwe; malesi malitoho kalolekha khu shikulu, khandi liyooko likali li shisiliva liahulilikhana muvunyishi muno. Vandu voosi vamenyanga mu maheemo vatechela nivaria. 17Musa yarulitsa vandu venavo mu maheemo ha vamenyanga, khutsia khwakanila Nyasaye; nivasinjila hasi hi shikulu. 18Mwooshi kwakhunikha Shikulu shia Sinai shiosi, shichila Mwami Nyasaye yikha khushio khuvirila mu mulilu. Mwooshi kwatuuma ikulu, khuli nu mwooshi kurulanga mu lijiko liu mulilu likali; ma vandu voosi nivatechela vutamanu muno. 19Liyooko li shisiliva liatsililila khuhulilikhana ikulu muno. Musa yalomoloma, ma Nyasaye namuchipa ni likulu. 20Mwami Nyasaye yikha ikulu wi shikulu shia Sinai, nalaanga Musa khwitsa ikulu wi shikulu. Musa yanina ikulu 21ma Mwami Nyasaye namuvoolela, “Yikha hasi uchelihitsi vandu vavuli khusila lwakho, khwenya khwitsa wandi; niiva valiitsa khukhola ndio, vanyishi khuvo valiitsa khukhutsa. 22Khali vasalisi, vitsanga himbi khwinzi Mwami Nyasaye, valiitsa khwinihitsa vene, inoho niitsa khuvasalilitsa.”
23Musa yavoolela Mwami Nyasaye, “Vandu shivanyala khunina khu shikulu shia Sinai tawe, shichila yivi mwene wa khuvoolela khuvukule shikulu khuva shitakatifu, khandi khusimiishi lwakho khundulu khwashio.”
24Mwami Nyasaye yavoola “Kholomokha hasi mwitsi halala na Haruni. Navutswa uvuli khuhuchililakhu vasalisi inoho vandu khusila lwakho, khwitsa khwinzi Mwami Nyasaye. Niiva valiitsa khukhola ndio, niitsa khuvasalilitsa.” 25Nalwo lwa Musa yakholomokha, natsia hasi khu vandu. Yavavoolela makhuva ku Mwami Nyasaye yali navooli.
Currently Selected:
KHURULA 19: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
