KHURULA 12
12
Litukhu lia Pasaka
1Mwami Nyasaye yavoolela Musa nende Haruni mu shivala shia Misri, 2“Mweli kunu, nakwo kutsitsanga khuva mweli kwenyu ku khuraanga khumuhika. 3Vooleli Vaisraeli voosi ndi khulitukhu li likhomi liu mweli kunu, shia mundu musatsa wosi, aliitsa khurovolela vandu vi inzu yeye shimeme shi likondi inoho shi imbuli, khurula mu shiayo shieshie. 4Niiva aliitsa khuva na vandu vatititi munzu mwemwe, vanyala khuvula khulia inyama yu muruku kwosi, ye mwene nende vandu vi inzu yu mureende wewe, valiitsa khusanga inyama yeneyo; khulondokhana khu vunyishi vwa vandu venavo, khandi khulondokhana khu inyama ya shia mundu wosi anyala khulia. 5Muliitsa khurovola shimeme shi likondi inoho shi imbuli, navutswa viliitsa khuva visatsa nu muhika mulala, vuchila imbala yosi. 6Muliitsa khuchilinda vulahi khutukha khulitukhu li likhomi na khane liu mweli kunu, lwa Vaisraeli voosi valiitsa khusinza miruku chiavo khulukolovo. 7Vandu valiitsa khuvukula masahi, mavakare khu tsifulemu tsiu khu miliango, khandi ikulu hi miliango chiu mu tsinzu tsiu khunyanyilamu inyama. 8Valiitsa khulia inyama isambilwi khu mulilu mu vutukhu vwenovo, halala ni tsingutsa tsindulu tsiumbulimu nende mikati chialombwa vuchila mamela. 9Muliitsa khuvula khuliakhu inyama imbisi inoho iteshelwi na matsi, navutswa muliitsa khulia inyama yosi isambilwi nu mulilu; khali muliitsa khulia murwi, vilenje, nende viungu viu munda. 10Muliitsa khuvula khurikakhu khali inyama indititi khuyo khutukha mu mavwevwe; niiva indititi khuyo, iliitsa khurikala khutukha mu mavwevwe, muliitsa khuchisamba. 11Muliitsa khulia masinjila, shichila muliitsa khwifwala khwirecheshela luchendo, numwifwali vilaro vienyu khandi numuli ni indovoshi yenyu mu mukhono. Kuliitsa khuva Mulukha kwa Pasaka, khulu khumba luyali.
12“Niitsa khuchenda shia havundu hosi mu vutukhu vwenovo mu shivala shia Misri; niitsa khwiira shia shilombe shiukhuraanga khwivulwa, vave vandu inoho miruku. Niitsa khusalilitsa vanyasaye voosi va Vamisri. Ninzi Mwami Nyasaye. 13Masahi kaliitsa khuva shimanyilu shienyu khu tsinzu, tsia mumenyamu. Lwa niitsa khulola masahi, nalwo lwa niitsa khusila tsinzu tsienyu. Niitsa khulekha khumusalilitsa, lwa niitsa khuva nisalilitsanga Vamisri. 14Nalio litukhu lia muliitsa khunzitsushitsilakhu. Muliitsa khwikhoyela litukhu lienelo, khuli mulukha khwinzi Mwami Nyasaye, khumatukhu koosi kaliitsa khuvaho.”
Mulukha kwi Mikati Chivulamu Mamela
15Mwami Nyasaye yavoola, “Muliitsa khulia khumatukhu saba mikati chivulamu mamela. Muliitsa khurulitsa mamela, mu tsinzu tsienyu khulitukhu liukhuraanga; shichila mundu uliitsa khuliakhu mikati chialombwa na mamela khuraanjila khulitukhu liu khuraanga khutukha khulitukhu lia saba, aliitsa khutivitswa mu vandu vaanje. 16Khulitukhu liukhuraanga khandi lia saba, muliitsa khwakanila halala khusaala. Muvuli khukholakhu muhinzilu kwosi mumatukhu yaka, navutswa munyala khuteekha shiukhulia shia muliitsa khulia. 17Muliitsa khutsililila khwikhoyela Mulukha kukhulia mukati kwalombwa vuchila mamela, shichila nalio litukhu lia narulitsa vandu vi tsimbia tsienyu mu shivala shia Misri. Khulwa yako, muliitsa khwikhoyela litukhu yili, khumatukhu koosi kaliitsa khuvaho. 18Khu mweli ku khuraanga, muliitsa khulekha khulia mikati chia tsukanywamu mamela; khali khulukolovo khwi litukhu li likhomi na khane khutukha khulukolovo khwi litukhu lia makhomi kavili na lilala. 19Mamela kaliitsa khuvula khunyolekhakhu mu tsinzu tsienyu khumatukhu saba. Mundu uliitsa khuliakhu shindu shiosi, shia tsukanywamu mamela aliitsa khukhungwa mu Vaisraeli, ave nu mundu mucheni inoho mundu wivulwamu. 20Muliitsa khuvula khuliakhu shindu shiosi, shia tsukanywamu mamela. Havundu hosi ha muliitsa khuva numumenyanga, muliitsa khulia mikati chialombwa vuchila mamela.”
Mulukha Kukhuraanga kwa Pasaka
21Musa yalaanga vimilili voosi va Vaisraeli, navavoolela, “Shia mulala khu munyi, aliitsa khurovola shimeme shi likondi inoho shimeme shi imbuli mashisinzi, khu vandu vi inzu yeye vikhoyele Mulukha kwa Pasaka. 22Muliitsa khuvukula tsisia tsiu musala kulaang'wang'wa hisopu, mamutsinishi mulukalayi lulimu na masahi, nu khuvekha masahi kenako khu tsifulemu tsiu khu miliango, khandi khu mikulu chitiilanga miliango chienyu ikulu. Mundu aliitsa khuvula khurulakhu munzu, nuvushili khu shia mu mavwevwe. 23Lwa Mwami Nyasaye aliitsa khuva nachendanga shia havundu hosi mu shivala shia Misri khwiira Vamisri, aliitsa khulola masahi kali khu tsifulemu tsitiilanga miliango ikulu, khandi khu tsifulemu tsiu khu miliango; nalwo lwa aliitsa khwikalila Injelosi yi Likhutsa khwinjila mu tsinzu tsienyu, nu khumwiira. 24Munyi halala na vaana venyu muliitsa khulonda malako yaka mihika ni mihika. 25Lwa muliitsa khwinjila mu shivala shiu Mwami Nyasaye yalaaka, aliitsa khumuha, muliitsa khutsililila khwikhoyela mulukha yuku. 26Lwa vaana venyu, valiitsa khumureeva, ‘Mulukha yuku kumanyinyanga shina?’ 27Muliitsa khuvavoolela, ‘Nu musango ku Mulukha kwa Pasaka ku khuha Mwami Nyasaye luyali, shichila yasila tsinzu tsia Israeli, lwa vamenyanga mu shivala shia Misri. Mwami Nyasaye yiira Vamisri, navutswa yakhuhonyinya.’ ”
Vaisraeli vinama hasi, nivasaala khu Mwami Nyasaye. 28Nalwo lwa Vaisraeli vasimukha, nivatsia khukhola khuli Mwami Nyasaye yali navoolele Musa nende Haruni vakhole.
Khukhutsa khwi Vilombe Viukhuraanga Khwivulwa
29Muvutukhu hakari, Mwami Nyasaye yiira vaana vakhulundu vi shiyayi voosi mu shivala shia Misri, khuraanjila khu mwana mukhulundu wi shiyayi wu Mwami wa Misri, wali natushili khwamiha Mwami wa Misri niyakhutsa, khutsia khutukha khu mwana mukhulundu wi shiyayi wu mundu muvohe, wali niyavohwa muchela; miruku chiosi chiu khuraanga khwivulwa chiirwa khandi. 30Mwami wa Misri, varumishi va vandu veve, halala na vandu valala Vamisri vavukha mu tsindolo vutukhu. Khwali ni tsikhwili tsinyishi muno, shia havundu hosi mu shivala shia Misri, shichila vuli hango wu mundu Mumisri mwana wi shiyayi, yakhutsaho. 31Muvutukhu vulala vwenovo, Mwami wa Misri yalaanga Musa nende Haruni navoola, “Munyi nende Vaisraeli, ruli munu! Ruli mu shivala shianje. Tsi murumishile Mwami Nyasaye, khuli mwenyanga. 32Vukuli makondi kenyu, tsimbuli tsienyu, halala ni tsing'ombe tsienyu, mamuruli hanu. Musaalilikhu khandi ngasitswi.”
33Vamisri vavoolela Vaisraeli nivayaanza varuli vwangu mu shivala shiavo; vavoola, “Khutsi voosi khutsitsanga khukhutsa, niiva mulavula khurula munu.” 34Nalwo lwa Vaisraeli vitsulitsa vindu viavo viu khukandilakhu mikati nu vusi vwa vali nivatuvuli, vwali nuvushili khutsukanywamu mamela; valinganyila mu tsinguvu, nivitiukha khu maveeka kavo. 35Vaisraeli vakhola khuli Musa yavivaalila vakhole, khandi vali nivareevi Vamisri vavahe vindu vialombwa khu itsahabu, ifetsa khandi tsinguvu tsiu khwifwala. 36Mwami Nyasaye yalomba Vamisri khuha Vaisraeli luyali, nivavaha shia shindu shiosi shia venyanga; Vaisraeli vachinga vuhinda vwa Vamisri, khuvirila munjila yeneyo.
Vaisraeli Varula Misri
37Vaisraeli vachenda khu vilenje khurula mu litaala lia Ramesesi, nivatsia khutukha Sukotsi. Vali vandu vasatsa himbi tsiheelefu tsimia sita, vuchila khuvalitsilakhu vandu vakhali nende vaana. 38Vandu vandi vanyishi vatsia khandi navo, khali makondi manyishi, tsimbuli tsinyishi halala ni tsing'ombe tsinyishi. 39Vakanda mikati chivulamu mamela khurula khu shinochi shia varulitsa Misri. Shinochi yishi shiali vuchila mamela shichila vakhungwa mu shivala shia Misri, vuchila khuva nu vwiyangu vu khuteekha shiukhulia shiavo vene.
40Vaisraeli vamenya mu shivala shia Misri khumihika tsimia tsine na makhomi kavaka. 41Khulitukhu liukhumalilikha li mihika tsimia tsine na makhomi kavaka, vandu vi tsimbia tsiosi tsia vandu vu Mwami Nyasaye, varula mu shivala shia Misri. 42Navwo vwali vutukhu vu Mwami Nyasaye yaheenza, nalola avarulitse mu shivala shia Misri. Vutukhu vulala vwenovo, vwakholwa khuva vutakatifu khu Mwami Nyasaye khumatukhu koosi kaliitsa khuvaho, khuli vutukhu vwa Vaisraeli venyekhanga vatsililile khuheenza khumatukhu koosi kaliitsa khuvaho.
Miima chiu Mulukwa kwo Pasaka
43Mwami Nyasaye yavoolela Musa nende Haruni, “Yichi nachio miima chilondokhananga nu Mulukha kwa Pasaka: mundu mucheni aliitsa khuvula khuliakhu shiukhulia shia Pasaka; 44navutswa shia murukwa wosi, wa mwakuula ni tsisenti tsienyu anyala khulia shiukhulia shienesho, niiva muliitsa khuraanga khumusheva. 45Mundu uli khu luchendo inoho wasamulitswa khukhola muhinzilu khulitukhu lilala, aliitsa khuvula khuliakhu. 46Muliitsa khulia shiukhulia shiosi mu inzu indala ya valombelamu. Shiumuliitsa khushirulitsa munzu tawe. Muvuli khumenekakhu shikuumba shiu muruku kwosi. 47Vaisraeli voosi valiitsa khwikhoyela mulukha kwenoko; 48navutswa mundu ushili khushevwa, aliitsa khuvula khuliakhu shiukhulia shienesho. Niiva mundu mucheni wamenya mu munyi khandi yenyanga khwikhoyele Mulukha kwa Pasaka, khuha Mwami Nyasaye luyali, lukhuraanga muliitsa khusheva vaana vi shiyayi voosi vali munzu mwemwe. Nalwo lwa aliitsa khuvukulwa khuli mundu Muisraeli, masanje mu Mulukha kwa Pasaka. 49Miima milala miele, chiliitsa khurumikha khu vandu vivulwa mu Vaisraeli khandi khu vandu vacheni vamenyanga mu munyi.” 50Vaisraeli voosi vakhola khuli Mwami Nyasaye yali navoolele Musa nende Haruni vakhole. 51Khulitukhu lienelo, Mwami Nyasaye yarulitsa vandu vi tsimbia tsiosi tsia Israeli mu shivala shia Misri.
Currently Selected:
KHURULA 12: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
