VAEFESO 2

Nyasaye Wakhukhola khuva Mwoyo mu Kristo

1Mumatukhu kavira, mwali mwakhutsa mu mioyo, shichila mahingani ku khwambakhana khulonda malako nende vwoni vwa mwakholanga. 2Mumatukhu kenako, mwamenyanga limenya litamanu khuli vandu vu mu shivala vamenyanga; mwalonda mwamihi wimililanga mu vushindu, vwimilili vuliho nunundi mu vandu vambakhana khulonda malako ka Nyasaye. 3Khali ni kilikali, khutsi voosi khwali khuli vo. Khwamenyanga khulondokhana khu likomba li liiva lieru liu mmbili, nu khukhola shia shindu shiosi khulondokhana khu likomba li mivili chieru nende tsinganakani tsieru. Khulwa yako, khulondokhana khu liiva lieru, khuli vandu vandi voosi mu shivala, khwalolekhanga khuva khuli vandu va Nyasaye anyala khusalilitsa khuvirila mu vurima vwevwe.

4Navutswa shichila tsimbavasi tsia Nyasaye ni tsinyishi, khandi khurulana khu vuyaanzi vwi tsingulu vwa yakhuyaanza; 5khali niiva mumatukhu kavira, khwali khwakhutsa mu mioyo shichila vwoni, khwahonyinywa khuvirila mu tsimbavasi tsia Nyasaye; khandi Nyasaye ya khwisimushitsa khurula mu likhutsa khutsililila khuva mwoyo khuvirila mu Kristo. 6Nyasaye wa khwisimushitsa khurula mu likhutsa na Kristo; khandi wakhulomba khwamiha naye mwikulu. 7Yakhola ndio, khumanyinya tsingulu tsi tsimbavasi tsietsie tsiu khuchenyinya khumatukhu koosi kaliitsa khuvaho khuvirila mu vuyaanzi vwevwe, vwa ya khumanyinya mu Yesu Kristo. 8Mwahonyinywa khuvirila mu tsimbavasi, shikanyala khuva khurulana khu tsingulu tsienyu vene tawe; navutswa ni shihanwa shia Nyasaye khuvirila mu lisuuvila -- 9shikanyala khuva shichila mihinzilu chienyu, khulu khuvula khwenya mundu khwichinjilila. 10Nyasaye neye wa khulomba; khandi khuvirila mu Yesu Kristo, wakhulomba khuva nu vulamu vu khukhola vikholwa vilahi, via yali niyarecheshitsa khukhole.

Kristo Walera Halala Vandu Voosi

11Munyi vandu vi tsimbia tsindi khulondokhana khu lwivulu, va Vayahudi “Vashevwa” valaanganga “Vasoleli” (Kamanyinyanga khushevwa khwi likhanda liu mmbili) -- mwitsushitse limenya lia mwamenyanga mumatukhu kavira. 12Mumatukhu kenako, shiumwali mwamanya Kristo tawe. Mwali vacheni vutswa, nu muvula khuvalitsilwa mu vandu va Nyasaye yarovola. Mwali numushili khuvalitsilwakhu mu lilaaka lia Nyasaye, yali niyalaaka vandu veve. Mwamenyanga mu shivala shinu, vuchila lisuuvilitswa khandi vuchila khumanya Nyasaye. 13Navutswa nunundi, khuvirila mu Yesu Kristo, munyi vamwali numuli ihale wene, mwalerwa himbi khuvirila mu likhutsa lia Kristo. 14Kristo mwene neye wa khulerela milembe, lwa yalomba Vayahudi nende vandu vi tsimbia tsindi khuhaambana khuva shindu shilala. Kristo wapomolanyinya lisisi liali ni lia khwavukhanyinya khandi liachila nu khuva vatsiku nu mmbili kwekwe mwene. 15Yarulitsaho lilako lia Vayahudi halala na mivaalo kalio nende miima chialio, khu khurula mu vandu vi tsimbia tsivili tsienetso, alombe luhia lulala lwa vandu vayia khuvirila muye mwene; khulu khwenya khulera milembe hakari havo munjila yeneyo. 16Kristo yononyinya vutsiku vwavo khuvirila mu likhutsa lielie khu musalaba; nalera halala vandu vi tsimbia tsivili tsienetso, khukwa mmbili mulala, khandi navakalushitsa khu Nyasaye khuvirila khu musalaba. 17Kristo yitsa, maniyilwatsa Ivanjeli yu khulera milembe khu vandu voosi: khu munyi vandu vi tsimbia tsindi, vali vakorwa Nyasaye; khandi khu Vayahudi, vali nivamanya Nyasaye. 18Khutsi voosi, khuve Vayahudi nende vandu vi tsimbia tsindi, khunyala khuhaambana mu Roho mulala khutukha khu Tata khuvirila mu Kristo.

19Khulwa yako, munyi vandu vi tsimbia tsindi, shiumuli khuli vacheni inoho vandu varula mu shivala shindi tawe. Lelo muli vandu vuluhia lulala halala na vandu va Nyasaye; khandi muli vandu vi inzu ya Nyasaye. 20Munyi khandi mwayumbakhwa khu musinji kwraanjitswa na varumwa nende vaprofeti; Yesu Kristo mwene nali khuli lichina liu mukona lili nu vukhonyi muno khuvira kandi koosi. 21Ye mwene neye uchilanga mumbakho kwosi nu kuhaambana halala; khandi akulomba khutsililila khukaliha kukwa Litempeli litakatifu liu Mwami Nyasaye. 22Khali munyi khuvirila mu Yesu Kristo, mumbakhwangwa na vandi voosi havundu ha Nyasaye ali mwoyo khuvirila mu Roho wewe.

Currently Selected:

VAEFESO 2: LLLCATHOLIC

Highlight

Copy

Compare