VAKOLOSAI 2

1Nyenyanga mumanyekhu shindu khulondokhana khuli kholanga muhinzilu kwanje ni tsingulu ninjemulila, khandi khuli kholelanga vandu vi litaala lia Laodikia muhinzilu, khandi yavo voosi vashili khumanyakhu shia shindu shiosi khulondokhana khwinzi. 2Kholanga ndio, khu vave ni ikholo indinyu; khandi vahambane halala khuvirila mu vuyaanzi; khandi vanyole miandu minyishi chi lisuuvilitswa chinyolekhanga khurulana khu limanya liatoto. Nivakhola ndio, nalwo lwa valiitsa khumanya munjila indahi likhuva liaviswa lia Nyasaye, nilili Kristo mwene. 3Kristo neye wi livishilu liosi liu vusitsa nende vucheli viaviswa muye.

4Khulwa yako, muvoolelanga ndio, khulu khuvula khwenya mundu khumukaata na makhuva ku khuhangalitsana ku vuvehi, khali kave kalolekha khuva malahi khu munyi. 5Khali niiva ndi ihale wene khurula khu munyi mu mmbili; navutswa ndi na munyi mu mwoyo. Ndi nu vuyaanzi khulola khuli mwilindanga munjila indahi, vuchila khuhaya haya, khandi khuli mwasinjila ni tsingulu mu lisuuvila lienyu mu Kristo.

Vulamu Vwatoto Vurulanga khu Kristo

6Lwa mwahuchilila Yesu Kristo uli Mwami, mutsililile khumenya muye. 7Musinjile ni tsingulu muye, khandi limenya lienyu liumbashwi khuye, khu muve ni tsingulu mu lisuuvila lienyu, khuli mwechitswa. Mutsililile khusanditsa mu vunyishi.

8Khulwa yako, muheenze mulole ndi mundu avulakhuho wu mukholanga khuva varukwa khuvirila mu makhuva ku vusitsa vwi shikhaya vwa vandu, karulanga khu mechitso khulondokhana khu miima chia vandu nende vwimilili vwa matimoni kamihanga likulu nende lilova, khandi shikanyala khuva karulanga khu Kristo tawe; 9shichila makhuva koosi khulondokhana khu Nyasaye kali mu Kristo, lwa ali mundu; 10khandi munyi mwaheelwa vulamu vwatoto khuvirila muye. Kristo ali nu vunyali vunyishi khuvira vwamihi vwosi vuliho nende vu vunyali.

11Khali munyi mwashevwa khuvirila mu Kristo; shikanyala khuva ni vandu navo vamusheva tawe. Navutswa khushevwa khwakholwa na Kristo, makhuva khulondokhana khulu khuvohololwa khurula mu tsingulu tsi liiva liu mu mmbili liu vwoni. 12Lwa mwabatiswa, kali khuli mwayeveelwa mu shilindwa na Kristo; khandi khuvirila mulibatiswa, mwayisimushitswa khurula mu likhutsa na Kristo khuvirila mu lisuuvila lienyu, likholanga muhinzilu khuvirila mu tsingulu tsia Nyasaye, wisimushitsa Kristo khurula mu likhutsa. 13Matukhu kandi, mwali khuli mwakhutsa shichila vwoni vwenyu vwa mwakholanga; khandi shichila mwali khuli vandu vi tsimbia tsindi vavula Malako ka Musa. Navutswa Nyasaye wakhukhola khuli mwoyo na Kristo, lwa yakhusemeha khurula mu vwoni vweru vwosi. 14Nyasaye warulitsaho shitabu shia makoovi keru kahandikwamu halala na malako kali mushio kanyala khukhuvoha; khandi wakononyila khu musalaba khu kavuli khuva ni tsingulu. 15Kristo yikhola khuva muvoholole khurula khu vwimilili vwa matimoni nende vu vunyali; navamanyinya ndi umali khukuura khuvirila khu musalaba.

16Khulwa yako, kenyekhanga mundu avuli khumukhalachilakhu shindu shiosi khulondokhana khu shiukhulia inoho shiu khung'wa inoho matukhu ku khwikhoyela milukha inoho Milukha chiu Mweli Khwilavushitsa Vuyia inoho khulitukhu li Lisabato. 17Vindu khuli vienevo viosi vili khuli shinini shi vindu viliitsa khwikholekha; ni kilikali, Kristo neye wosi. 18Muvuli khuhuchililakhu mundu khumukhalachila, navoola ali nu vunyali khumuvira shichila ali ni shihanwa shia malolo, khandi lwa yechitsanga khulondokhana khu vwichehitsi vu vuvehi nu khusaala khu tsinjelosi. Mundu khuli mwenoyo yichinjililanga khulondokhana khuli mwene akanakananga, vuchila shivune shiosi; 19khandi walekha khuhaanda khu Kristo uli khuli murwi ku mmbili. Mmbili kwosi kuliishitswangwa vulahi, khandi kwahaambana ni vikuumba nende miishi chiakwo, khuvirila mu vwimilili vwa Kristo; khandi Nyasaye neye uchilanga nu kuhindila.

Khukhutsa nende Khuva Mwoyo na Kristo

20Mwakhutsa na Kristo, nu mukholwa khuva vavoholole khurula khu vwimilili vwa matimoni kamihanga likulu nende lilova. Shichila shina mumenyanga khuli vandu vu mu shivala shinu? Shichila shina mumenyanga khulondakhana na malako khuli yaka: 21“Muvuli khukumilakhu yishi, muvuli khuliakhu yeshio, khandi muvuli khutiilakhu yeshio!” 22Malako yaka koosi kaliho khulondokhana khu vindu vivetsanga nivimali khurumishilwa, khandi vivula khurumishilwa; ni mivaalo nende mechitso ka vandu vilombela vene. 23Malako khuli kenako, kalolekhanga khuli ni kilikali kali nu vusitsa, lwa vandu vanikwangwa khusaala khu tsinjelosi, khandi khuva nu vwichehitsi vu vuvehi, nu khusalilitsa mmbili vutamanu; navutswa kavula tsingulu tsiosi, khulu khwikalila likomba liu mmbili liosi.

Currently Selected:

VAKOLOSAI 2: LLLCATHOLIC

Highlight

Copy

Compare