MAKABAYO 14
14
Alikimo Yanyeka Yudasi
(1 Mak 7:1-21)
1Mihika chivaka nichimali khuvira, Yudasi nende vandu veve vahulila makhuva ndi Demeturio mwana wa Selehuko yali umali khwinjila havundu hi tsimeli tsisinjilanga khuluchinga lwi inyanza mu litaala lia Tripoli, halala nu mukaanda kwa vasikali veve vi tsingulu nende shituma shi tsimeli. 2Yavoolelwa khandi makhuva ndi Demeturio yali wayiira Mwami Antioko, halala nu mundu wewe wamulindanga wali ni lira Lisia; khandi neye wamihanga shivala shienesho.
3Khwaliho nu mundu walaangwangwa Alikimo, wali niyakholakhu muhinzilu ku khuva Mukali wa vasalisi voosi; navutswa wali niyamenya khulondokhana khu mwiima kwa Vaguriki mumatukhu ka mahingani. Lwa yamanya ndi litukhu lindi livulakhuho lia aliitsa khuva Mukali wa vasalisi voosi, khandi naria khulondokhana khu ka Vayahudi vanyala khumukhola, 4yasimukha natsia khulola Mwami Demeturio khumuhika kwi imia indala makhomi karanu na mulala. Khulitukhu lienelo, yavukula itaachi yalombwa khu itsahabu nende lusia lu musala kwa mashindu, halala ni tsisia tsiu musayituni, tsia vali nivahaanakhu khale khuli mwiima kwavo mu Litempeli, navutswa shindu shivulakhuho shia yavoola khulondokhana khu ka yenyanga khukhola. 5Navutswa khali ndio, matukhu mati nikamali khuvira, yanyola vwiyangu vu khukhola vindu vievie vitamanu. Mumatukhu kenako, Demeturio yali nashelenyinyanga na vandu vamukhonyanga inganakani. Yalaanga Alikimo mu shikhaalo shia vandu, namureeva amuvoolele ka Vayahudi vali nivenyi khukhola.
Nalwo lwa Alikimo yavoola, 6“Vayahudi valaangwangwa Vahasidi, vimililwangwa na Yudasi Makabayo, vatsuvanga vandu khukwana nu khuraanjitsa shileeche. Khali shivenyanga khulolakhu vwamihi vwi shivala nuvuli mu milembe tawe. 7Vutamanu vwavo navwo vuchilanga nimbula khuva mu vwiyangu vwanje vu khuva Mukali wa vasalisi voosi, nukuli muhinzilu kwandushili khuva nikholanga khuraanjila khulitukhu liu khwivulwa. Khali ndio, mali khutukha hanu, 8lukhuraanga shichila ni kilikali, mbendelanga mwoyo shia shindu shiosi shia yivi Mwami Antioko wu kholanga, khandi shia khavili shichila vandu vaanje va inzi nivulwamu, shichila shivala shieru shiosi shinyakhananga shiamali khukwa mu vutiinyu khurulana khu mihinzilu chiu vuyiingwa, chia Yudasi nende valondi veve vakholanga. 9Lwa yivi Mwami Antioko wamanya vulahi vwene makhuva khulondokhana khu kenako, nuyaanza urunishitse kakholekhanga mu shivala shieru shiachila nu khukhola mihinzilu nu khuchemulila, khurulana khu tsimbavasi tsiotsio tsiu vukhumi, tsia ulolelanga vandu voosi. 10Khumatukhu koosi ka Yudasi aliitsa khutsililila khuva nashili mwoyo, shivala shieru shiliitsa khuvula khuva mu milembe.”
Demeturio Yaruma Nikanori Khukwana Yudasi
11Lwa Alikimo yali niyakhamala lilomoloma lielie, valina vandi vu Mwami Antioko, vali nivahima Yudasi vatsuva Demeturio khukwana Yudasi. 12Nalwo lwa yarovola vwangu Nikanori, wali mwimilili wi tsinzeku, manamuha vunyali vu khuva gavana wa Yudeya. Yamuruma khutsiayo 13na malako khutsia khwiira Yudasi, khusalanyinya valondi veve, nu khuhaamikha Alikimo khuva Mukali wa vasalisi voosi mu Litempeli li tsingulu tsinyishi mu shivala. 14Vandu vacheni voosi mu Yudeya, vali nivilukha Yudasi khuvula khuvakwana, viyunga nu mukaanda kwa vasikali va Nikanori, shichila vali ninganakani vanyala khumenya vulahi, niiva Vayahudi valiitsa khukuurwa inoho matiinyu khuvakwila.
15Vayahudi vavoolelwa ndi Nikanori yali nakwananga, khandi ndi vandu vacheni mu shivala shiavo vamukhonyanga. Nalwo lwa visiuvila lukuushi nivasaala khu Nyasaye wavo, wali niyarovola shivala shiavo khuva shieshie mwene mihika ni mihika, khandi wali nashili khukhaywa khuvakhonya mumatukhu ku vutiinyu vwa vakwilanga. 16Nalwo lwa Yudasi, shichila neye wali mwimilili wavo yahaana lilako. Varulaho vwangu nivaroonjela khutsia khukwana mutsiku muliihe himbi mu muchitsi kwalaangwangwa Adasa. 17Simoni, wali nali amwavo wa Yudasi, yali nakwananga Nikanori, navutswa yali nakuurwangwa kalaha vuchila khumanyakhu shindu shiosi khulondokhana khu ka mutsiku yali nakholi. 18Khali ndio, lwa Nikanori yahulila makhuva khulondokhana khuli Yudasi yali mucheli khandi ni ikholo halala na vandu veve vakwanilanga shivala shiavo, yaviritsa khuvula khukwana navutswa khulera milembe khuvirila munjila yindi. 19Nalwo lwa yaruma Posidonia, Tseodota nende Matatsia khutsia khukhola lilakano liu khulera milembe na Vayahudi.
20Lwa vali nivamali khukhola lilakano lienelo, khandi mwimilili navoolele vandu veve, nu khulolekha ndi vahuchilitsane, nalwo lwa vahuchilila khukhola lilakano. 21Vimilili varovola litukhu lia vene valiitsa khwakana halala khulomoloma makhuva kavo. Likaare li liihe liarula mu mukaanda kwa vasikali mu shia mukaanda. Visoko viu luyali viarecheshitswa vulahi vwene; 22Yudasi yali mucheli, shichila yali urele khale mukaanda kwa vasikali veve shia havundu hosi, ha yali namali khulola vutiinyu vunyala khuraanjila; khandi khwikalila vatsiku khumukwana. Navutswa vimilili vavili venavo vakana nivalomoloma munjila indahi. 23Nikanori yatsililila khumenya khumatukhu kandi mu Yerusalemi. Shindu shivulakhuho shitamanu shia yakhola Vayahudi, navutswa yakhunganyinya vandu vali nivitsa khwiyunga naye. 24Shia isaa yosi yali wamenya nalolanga Yudasi ave nali himbi khuye, khali namuyaanza muno.
Nikanori Yakwana Yudasi
25Nikanori yavoolela Yudasi ahile mukhali nu khuva na vaana veve va mwene yivula. Khulwa yako, Yudasi yakhola ndio, manamenya limenya lilahi li milembe. 26Lwa Alikimo yalola khuli Yudasi nende Nikanori vatsilililanga vulahi mu limenya liavo, yanyola ibarwa indala yene khuli yi lilakano lia vali nivakhola, yasimukha natsia khulola Mwami Demeturio. Yamuvoolela ndi Nikanori nu mutamanu khu vwamihi vwevwe, shichila yali warovola mundu mutsami Yudasi khuva mulondi wewe niyakhutsa. 27Makhuva ku vuvehi kenako kachila Mwami Demeturio nava nu vurima, khali nahandichila Nikanori, namuvoola ndi yali umali khusiinyikha shichila lilakano. Yahaana lilako liu khutsia khukumila Yudasi Makabayo nu khumuhila mu litaala lia Antiokia.
28Lwa Nikanori yahulila likhuva lienelo, yasalila mu mwoyo, manavula khumanya kanyala khukhola, shichila yali waleka khumeneka lilakano nu mundu wa yali nashili khukholelakhu shindu shitamanu. 29Khali ndio, yali nashili khuhinganyinyakhu Mwami Demeturio, navutswa yachelitsa khukhava vwiyangu vu khukumila Yudasi mu mureeko. 30Navutswa Yudasi Makabayo yamanya ndi Nikanori umali khulolekha khuva mundu mululu khandi muhingani khuye, manalola ndi liiva lienelo ni shimanyilu shitamanu. Nalwo lwa yalaanga halala valondi veve vanyishi, natsia khwivisa.
31Lwa Nikanori yamanya ndi Yudasi numucheli muno khumuvira, yarulaho natsia khwinjila mu Litempeli li tsingulu khandi litakatifu mumatukhu ka vasalisi vali nivakholanga misango; navavoolela valakhuli Yudasi mu makhono keke. 32Navutswa vasalisi visuuha nivavoola ndi shivanyala khuva nivamanyikhu havundu ha Yudasi yali natsile khwivisa tawe. 33Nalwo lwa Nikanori yachinguula ikulu mukhono kwekwe musatsa, naheenzi khuluveka lwi Litempeli. Yisuuha navoola, “Numwambakhane khura Yudasi mu makhono kaanje khuli muvohe, niitsa khulekhanyinya Litempeli lia Nyasaye, sambulanyinyi vwaali yuvu, nu khumbakha hanu litempeli liu vukhumi khu Dionisi.” 34Namali khuvoola makhuva kenako, yarulaho natsia. Nalwo lwa vasalisi vachinguula makhono kavo mwikulu, nivasaala khu Nyasaye, uli Mulindi musuuvilwa wi shivala shiavo. Vavoola, 35“Mwami Nyasaye wamihanga shia shindu shiosi, shindu shivulakhuho shia wenyanga. Khali ndio, nivi walola nu vulahi Litempeli nilili hanu, ma yivi mwene umenye na khutsi. 36Nivi wonyene uli mutakatifu, khandi Litempeli liolio lianihitswa vwangu yuvu. Khulwa yako, ulilinde lwa lili litakatifu mihika ni mihika.”
Razi Yakhutsila Shivala Shieshie
37Mulala khu vimilili va Yerusalemi, mundu walaangwangwa Razi yayaalwa khu Nikanori. Kavoolekhana ndi Razi, yali wakhonyakhu vandu veve mu tsinjila tsinyishi, khandi ndi vandu vali vamuha luyali, khali vamulaanganga “Tata wa Vayahudi.” 38Mumatukhu kali nikavira, lwa Vayahudi vali nivambakhana khusanga na vandu vi tsimbia tsindi, khali niiva vamuyaala shichila yasanganga mu idini ya Vayahudi, yali wayirulitsa khukwanila idini ya Vayahudi. 39Khwenya khumanyinya katoto khuli yali yasiinyishila Vayahudi, Nikanori yaruma vasikali tsimia tsiranu khutsia khukumila Razi, 40shichila yali ninganakani ndi lwa yali namali khukumilwa, Vayahudi valiitsa khusalilitswa vululu muno. 41Vasikali vali nivali himbi khukumila munaara kwa Razi yali niyatsiamu. Khali vamunikanga khuvikulila shilivwa shi ilwanyi, khandi vali nivahaani lilako ndi vasambe nu mulilu miliango chienecho. Razi yalola ndi havundu havulakhuho hanyala khwilukha, manakanakana khuli anyala khwiyiira ni shivavi shieshie, 42khulola nu vulahi khukhutsa niyaheelwa luyali, khuvira vandu vatamanu khumukumila nu khunyola tsisoni tsiatushili khuvula khunyola khurula niyivulwa.
43Navutswa lwa yali nashinyakhananga vululu muno, Razi yakhaywa khwirotsa ni shivavi shieshie, manavula khukhutsa. Lwa vasikali vali nivilukhakanga khwinjila mu inzu yeneyo, yilukhachila khu lisisi manasila khuli musikali wi tsingulu mu vandu vali nivaliho. 44Vandu venavo vakalukha inyuma vwangu, manakwa mu vwiyangu vwa vali nivaleshi. 45Lwa yali nashishili mwoyo, nali nu vurima, yasinjila, navutswa masahi nako karoonyanga nikarula mu tsinguma tsietsie. Yilukhaka navirila hakari ha vandu, nanina khu lwanda luraambi, manasinjila. 46Lwa masahi koosi kali nikamali khukhamulukha mu mmbili kwekwe, yanyiilanyinya maala ku munda mwemwe na makhono keke, nakasiuva mu vandu. Lwa yali nakholanga ndio, yasaalanga khu Mwami Nyasaye uhaananga vulamu nende miuya khumukalushitsila vindu vienevo. Razi yakhutsa munjila yeneyo.
Currently Selected:
MAKABAYO 14: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013