VAKORINZO 9
9
Vukhonyi khu Vakristayo Vandi
1Mbulakhu shivune shinyala khuchila muhandichili makhuva khulondokhana khu vukhonyi vwa muhaananga khu vandu va Nyasaye vamenyanga mu lusomo lwa Yudeya. 2Manyi ndi muli ni lienya liukhukhonya; khandi nzichinjilila khu Vamekadonia shichila munyi. Navavoolela, “Vasuuvili vamenyanga Akaya vayirechekha khukhonya khurula muhika kwavira.” Mwoyo mulala kwenyu ku khukhonya kwalomba valala khuvo khuva ni lienya liukhukhonya. 3Khulwa yako, ndumanga vasuuvili venavo, khu khwichinjilila khweru khulondokhana khu munyi khuvuli khuva khwa vutswa shichila makhuva ka khuvoolanga. Navutswa, manya khuli navoola, mwirecheshe nu vukhonyi vwenyu. 4Nikhali, niiva khuliitsa na vandu khurula Mekadonia makhunyole shikali mwayirechekha tawe, khuliitsa khuva ni tsisoni -- shiu khuvoolakhu shindu shiosi khulondokhana khu tsisoni tsienyu tawe -- shichila khwamusuuvilila muno! 5Nalola nu vulahi nimbolele vasuuvili vamuchenihi matukhu nikashili khutukha khandi vasolole shihanwa shienyu shiu vukhonyi shiamwalaaka mulahaana. Shilava shirecheshitswi khuli shihanwa shiamuhaani nu mwoyo mulala, navutswa shikali mwanikwa muhaane tawe.
6Nu vulahi khumanya ndi mundu urakanga vitititi aliitsa khunyola lichesa litititi; khandi mundu urakanga mu vunyishi aliitsa khunyola lichesa linyishi. 7Shia mundu ahaane shiakanakane khuhaana, vuchila khuvela mu mwoyo inoho khunikwa khuhaana; shichila Nyasaye wayaanza mundu uhaananga nu mwoyo kukhusangala. 8Nyasaye ali nu vunyali vu khumuha mu vunyishi khuvira via mwenyanga, khu shia khase khosi muve ni shia shindu shiosi shia mwenyanga khandi vinyishi khuvirana shichila muhinzilu mulahi. 9Khuli Mahandiko Matakatifu kavoolanga,
“Nyasaye aheetsanga vamanani nu mwoyo mulala;
vulahi vwevwe vuliho mihika ni mihika.”
10Nyasaye, uheetsanga mumitsi vukuutsa vukhumitsa nende mukati kukhulia, alamuha khandi vukuutsa vwosi vwamwenyanga khandi alavulomba vumele mavwame lichesa linyishi khulondokhana khu vukhonyi vwenyu vwa muhaananga nu mwoyo mulala. 11Shia khase khosi alamulomba khuva vahinda khu muve nu mwoyo mulala ku khuhaana matukhu koosi; khu vandu vanyishi valisanditsa Nyasaye shichila vihanwa vienyu via vanyolanga khurula khukhutsi. 12Muhinzilu kwa mukholanga shiukuli ku khukhonya vandu va Nyasaye vonyene tawe; navutswa kuchilanga vandu vanyishi vasanditsa Nyasaye mu vunyishi muno. 13Khulondokhana khu ka muhinzilu kwenyu kuleranga, vandu vanyishi vatsitsanga khuhaana vukhumi khu Nyasaye khulondokhana khu lisuuvila lienyu liu khulonda Ivanjeli ya Kristo ya mwiyama, khandi khulondokhana khu mwoyo mulala kwa muli nakwo ku khusanga navo, khandi na vandi; 14lwa vali na maluhu ku khulola munyi, nu khumusaalila, shichila tsimbavasi tsiu khuchenyinya tsia Nyasaye yamumanyinya. 15Khusanditsi Nyasaye khulondokhana khu shihanwa shieshie, shia khunyala khuvula khwivaala mu makhuva.
Currently Selected:
VAKORINZO 9: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
