1 MAKABAYO 7
7
Mukali wa Vasalisi Voosi Alikimo nende Liihe lia Nikanori
(2 Mak 14:1-36; 15:1-36)
1Khumuhika kwi imia indala makhomi karanu nu mulala, Demeturio mwana wa Selehuko yasimukha narula Roma, halala na vandu valala nivambushila mu inyanza khutsia mu litaala liali himbi khu inyanza; naraanga khwamihayo. 2Lwa yali niyinjilanga mu inzu yu vwami yali ya vakuuka veve, vasikali vakumila Mwami Antioko wa Kharanu nende Lisia khuvalera khuye. 3Navutswa lwa yavoolelwa shikholwa shienesho, yavoola, “Shinyenyikhu khuvalola tawe!” 4Vasikali venevo viira Mwami Antioko wa Kharanu nende Lisia; ma Demeturio niyikhala khu shisoko shieshie shiu vwami mu shivala shieshie shia yamihanga.
5Nalwo lwa Vaisraeli valala vatamanu vakorwa Nyasaye khandi vamulechelitsanga, vasimukha nivatsia khumulola. Vimililwa na Alikimo, wali ni lienya liu khuva Mukali wa vasalisi voosi. 6Vililila khulondokhana khu Vaisraeli veshie nivavoola, “Yudasi nende vamwavo veve vayiira valina vovo voosi, khandi vakhukhunga khurula mu shivala shieru. 7Nuyaanza, rumayo mundu wa yivi mwene wasuuvilila; muvoolele atsi khulola khuli Yudasi yativitsa shia shindu shieru shiosi khandi shivala shiu Mwami Antioko yamihanga. Lekha avasalilitse halala na vandu voosi va vakhonyanga khukwana.” 8Mwami Demeturio yarovola mundu walaangwangwa Bakide, wali nali mulala khu vandu vamukhonyanga inganakani, wali niyarovolwa khuva gavana wu lusomo lu Muchela Kwiluchelekha. Bakide yali mundu wi tsingulu mu shivala shienesho khandi yali musuuvilwa khu Mwami Demeturio. 9Mwami Demeturio yaruma Bakide halala na Alikimo, wali nali mundu mutamanu wakorwa Nyasaye, wa Mwami Antioko wa Kharanu yali niyarovola khuva Mukali wa vasalisi voosi. Alikimo yavoolelwa atsi khuvanzila Vaisraeli. 10Varoonjela nivarulaho nivatukha mu shivala shia Yudeya nu mukaanda kwa vasikali vanyishi. Bakide yachelitsa khukaatilitsa Yudasi nende vamwavo veve, lwa yaruma khuvo varumwa vu khutsia khureeva milembe. 11Navutswa shivasuuvilakhu ka vavoolelwa tawe, shichila valola mukaanda kwa vasikali vanyishi vavitsa navo.
12Nalwo lwa mukaanda kwa veechitsi va Malako vitsa khulola Alikimo nende Bakide, nivenyanga khukholelwa katoto. 13Vahasidi venavo, navo vali vu khuraanga khuchelitsa khwenya milembe khu Alikimo nende Bakide; 14shichila vavoola, “Musalisi warula mu vandu vu lwivulu lwa Haruni witsi halala nu mukaanda kwa vasikali vanyishi; khandi shianyala khukhusalilitsa tawe.” 15Alikimo yalomoloma navo makhuva ku khulera milembe, niyisuuha navoola, “Shiukhutsitsanga khusalilitsa munyi, inoho valina venyu tawe.” 16Vara muye lisuuvilitsa; navutswa yakumila vandu makhomi sita khuvo, naviira khulitukhu lilala, khulondokhana khuli kali nikahandikwa,
17“Masahi ka vandu vovo vali ni vasuuvilwa kasuundulwa,
mivili chiavo chiakhutsa chiasalanyinywa
shia havundu hosi mu Yerusalemi;
mundu avulakhuho wali wachiyeveela mu shilindwa.”
18Vandu voosi varaanga khuria Alikimo nende Bakide khandi nivatechela, shichila vavoola, “Vwatoto nende vulunji vuvula muvo, shichila vamali khumeneka lilakano nende lilaaka, lia vali nivisuuha valiitsa khulonda.”
19Nalwo lwa Bakide yilukha mu Yerusalemi natsia khumenya mu maheemo havundu halaangwangwa Betsi-zaitsi. Yaruma vandu khutsia khukumila vandu vali nivamwilukha. Yiira vandu valala na vandi nasiuva mu vwina vukali. 20Yarovola Alikimo khusinjilila vindu viakholekhanga mu shivala shienesho, manarika mukaanda kwa vasikali vanyala khumukhonya. Nalwo lwa Bakide yakalukha khulola Mwami Demeturio.
21Alikimo yachelitsa ni tsingulu khutsililila khuva Mukali wa vasalisi voosi; 22khandi vandu vanyashitsanga vandu vavo viyunga naye. Vasinjilila shivala shia Yudeya, nivakhola vindu vitamanu mu shivala shia Israeli. 23Yudasi yalola shia shiosi shitamanu shia Alikimo yali nakholi mu Vaisraeli. Yakhola vindu vinyishi vitamanu khuvira via vandu vi tsimbia tsindi vali nivakhola. 24Nalwo lwa Yudasi yasimukha natsia shia havundu hosi mu shivala shia Yudeya, navanzilanga vandu vamwilukha, nu khwikalila yavo vamenyanga mu litaala khwinjila mu shivala. 25Lwa Alikimo yalola Yudasi nali na vandu veve, nivatsilililanga khumeetekha tsingulu, nalola avula tsingulu tsiu khuvakuura, yakalukha khu Mwami Antioko, manalomoloma makhuva matamanu ku khuvayaala.
26Nalwo lwa Mwami Antioko yaruma Nikanori, mulala khu varumishi veve, wali niyachiaya khandi wasinyishila Vaisraeli, ni lilako liu khutsia khuvativitsa. 27Nikanori yatukha mu Yerusalemi nu mukaanda kwa vasikali vanyishi. Yaruma mundu ni likhuva liu khutsia khukaata Yudasi nende vamwavo veve ndi milembe chiliho, 28navoola, “Liihe livuli khuvakhuho hakari hanje nende munyi. Niitsa khwitsa halala ni isavu indititi ya vandu khwitsa khumulola moni na moni khulomoloma makhuva ku khulera milembe.”
29Nikanori yatukha khu Yudasi, nivashelenyinya mu milembe; navutswa mutsiku yali wirecheshe khukumila Yudasi. 30Lwa Yudasi yamanya ndi Nikanori yali witsi ni inganakani yu khumukholela vindu vitamanu, Yudasi yamuria niyambakhana khwenya khumulolakhu khandi. 31Lwa Nikanori yamanya ndi inganakani ya Yudasi yali imanyikhane, yarula Yerusalemi khutsia khukwana Yudasi himbi havundu halaangwangwa Kafarasalama. 32Himbi vasikali tsimia tsiranu va Nikanori viirwa; ma vandi nivilukha nivatsia mu litaala likali lia Daudi.
33Vindu vienevo ni viakhikholekha, Nikanori yatikulukha khu Shikulu shia Sayoni. Valala khu vasalisi nende vimilili va vandu vasimukha nivatsia khumwinjilitsa, nu khumumanyinya shihanwa shiu khusambwa shia vali nivakholelanga Mwami Antioko. 34Navutswa Nikanori yavachaya, navalechelitsa khandi nalomoloma khuvo mu vwichinjililu, 35maniyisuuha khuvirila mu vurima, navoola, “Yudasi nende vasikali veve nivakhilakhuli khwinzi nunundi, nzitsanga khuhaambitsa mulilu khu Litempeli yili lwa ningalushi ninakhakuura liihe.” Yarulaho nu vurima.
36Khulwa yako, vasalisi venavo vinjilamu nivasinjila imbeli hakari wu vwaali nende Litempeli; valila nivavoola,
37“Mwami Nyasaye, nivi warovola Litempeli yili khulaangwa khuvirila khu lira liolio,
khuva inzu yi lisaala khandi havundu ha vanyala khusaalilanga.
38Khulwa yako, vanzila mundu uyu halala na vasikali veve;
nu vulahi nivakhutsile mu liihe.
Yitsushitsa manyeko kavo,
uvakhole khuvula khutsililila khuva mwoyo.”
39Nikanori yarula mu litaala likali lia Yerusalemi, manasimiikha liheemo lielie liu khumenyamu havundu halaangwangwa Betsi horoni, ma vasikali va Siria niviyunga naye. 40Mumatukhu kenako, Yudasi yasimiikha liheemo lielie liu khumenyamu havundu halaangwangwa Adasa; yaliho halala nu mukaanda kwa vasikali tsiheelefu tsivaka. Nalwo lwa Yudasi yasaala navoola, 41“Lwa varumwa vu Mwami Antioko varaanga khunyekana, injelosi yoyo yasimukha nimulula vasikali tsiheelefu imia indala makhomi munane na varanu va Ashuria. 42Khulwa yako, tivitsakhu nunundi khandi vasikali vali imbeli weru yava. Leshi vandu vandi voosi vamanye ndi Nikanori asalilitswangwa shichila yalomoloma vindu vitamanu khulondokhana khu Litempeli litakatifu. Asalilitswi khulondokhana khuli kenyekhanga.”
43Vasikali venavo vakwana khulitukhu li likhomi na kavaka liu mweli kwa Adari. Mukaanda kwa vasikali va Nikanori vakuurwa, nikhali neye waraanga khukhutsila mu liihe. 44Lwa vasikali va Nikanori valola khuli Nikanori yiirwa, vasiuva viuchi viavo, nu khwilukha. 45Vayahudi vahitsanyinya mutsiku mwenoyo khulitukhu liosi, khuraanjila mu litaala lia Adasa khutsia khutukha Gazara. Lwa va valondelelanga, vatsililila khukhuva visiliva viu khulaanga liihe. 46Vandu vitsa nivarula shia havundu hosi mu michitsi chia Yudeya chia hahimbi, nivakwana mutsiku. Vakhunganyinya mutsiku khumukalushitsa khu vandu vamuhitsanyinyanga, khutukha lwa mutsiku yiirwa ni shivavi. Shia mundu wosi yiirwa khuluveka lu mutsiku yiirwa.
47Nalwo lwa Vayahudi vavukula miandu chia vali nivayaaya. Vakutuula murwi kwa Nikanori nende mukhono kwekwe musatsa kwa yasalilitsilanga vandi. Vavilera manivavivikha ilwanyi wa Yerusalemi. 48Vandu vali nu vuyaanzi vunyishi muno, nivikhoyela litukhu lienelo; valivukula manya khuli litukhu likali liu khusangala; 49ni lilako ndi litukhu li likhomi na kavaka liu mweli kwa Adari khwikhoyelwa shia khumuhika. 50Milembe chiali mu shivala shia Yudeya khumatukhu mati vutswa.
Currently Selected:
1 MAKABAYO 7: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013