1 MAKABAYO 5
5
Liihe Hakari Havo nende Tsimbia Tsindi
1Lwa vandu vi tsimbia tsindi vamenyanga himbi navo vahulila ndi vwaali vumali khulombwa vuyia, khandi ndi Litempeli limali khutakaswa khuva khuli liavetsanga, vali nu vurima vunyishi; 2khali nivirulitsa khutivitsa vitsukhulu va Yakobo vamenyanga muvo. Vamanya nivaraanga khuviira nu khuvativitsa ha vamenyanga mu vandu.
3Navutswa Yudasi yakwana vitsukhulu va Esau mu litaala lia Idumeha, khandi havundu halaangwangwa Akurabateni, shichila vali vamenya nivakonekhanga Vaisraeli. Yudasi yavakuura, khandi navativitsa, khutukha lwa vateteshela; khali nayaaya miandu chiavo. 4Yitsushitsa khandi vindu vitamanu via vandu varulanga Bahehani vali nivakhola, viali viu khurishitsa Vaisraeli, shichila va vakonekha khu muhaanda, nivavaseera. 5Yudasi yavikalila mu minaara chiavo; Yudasi yisuuha khuli avakwana nu khuvativitsa, nasamba nu mulilu minaara chiavo halala na vandu voosi vali nivivisamu. 6Nalwo lwa yambukha natsia khukwana Vaamoni, wa yanyola mukaanda kwa vasikali vi tsingulu khandi vandu vanyishi, halala nu mwimilili wavo Timoteo. 7Yudasi yatsililila khumatukhu manyishi khukwana mukaanda kwa vasikali venavo; navakuura ni tsingulu. 8Yavukula khandi litaala lia Yazeri, halala ni michitsi chialio; nakalukha mu shivala shia Yudeya.
9Vandu vi tsimbia tsindi vamenyanga mu lusomo lwa Gileadi vivunjelitsa halala, khukwana nu khutivitsa Vaisraeli vamenyanga mu lusomo lwavo; navutswa Vaisraeli venavo vilukha, nivatsia khumenya mu imbinga ya Datsema. 10Vaisraeli varuma khu Yudasi nende vamwavo veve ibarwa yavoolanga, “Vandu vi tsimbia tsindi va khumenyanga navo vamali khwivunjelitsa halala khukhutivitsa khutsi. 11Valoshitsanga khuli vanyala khwitsa khuvukula ni tsingulu imbinga ya khwilushilamu; khandi Timoteo neye mwimilili wu mukaanda kwa vasikali venavo. 12Khulwa yako, hambi mukhuhonyinye khurula khuvo, shichila vandu veru vanyishi vayiirwa, 13khandi viikho veru voosi vamenyanga mu shivala shia Tobi vayiirwa. Vatsiku vamali khukumila khale vakhali vavo halala na vaana, nende miandu chiavo nu khutivitsilayo vandu iheelefu indala.”
14Lwa ibarwa yeneyo yali nishisomwangwa, varumwa vandi, vali nivarandushi tsinguvu tsiavo nivali nu vuveleli mu mioyo vatukhaho, nivakharula mu lusomo lwa Galilaya, nivavoola makhuva malala mele. 15Vavoola ndi vandu vi litaala lia Putolemi, Tiro nende Sidoni, halala na vandu vi tsimbia tsindi vamenyanga mu lusomo lwa Galilaya vivunjelitsi khukhutivitsa.
16Lwa Yudasi nende vandu vahulila makhuva kenako, shikhaalo shikali shialaangwa khulola khuli vanyala khukhonya vandu va matiinyu kali nikamali khukwila khandi va vatsiku vaseeranga. 17Yudasi yavoolela amwavo wewe Simoni, “Rovola vandu vovo ma utsi khuhonyinya Vayahudi veshie mu lusomo lwa Galilaya. Inzi nende amwavo wanje khulatsia mu lusomo lwa Gileadi.” 18Navutswa Yudasi yarika Yosefu mwana wa Zekaria, halala nu mundu wimililanga vandu walaangwangwa Azaria, halala nu mukaanda kwa vasikali vu khulinda mu lusomo lwa Yudeya. 19Yudasi yavavoolela, “Lindi vandu yava, navutswa muvuli khukwanakhu na vandu vi tsimbia tsindi, nishili khukalukha.” 20Nalwo lwa Simoni yaheelwa vandu tsiheelefu tsivaka khutsia mu lusomo lwa Galilaya, khandi Yudasi naheelwa vandu tsiheelefu munane vu khutsia navo mu lusomo lwa Gileadi.
21Simoni yasimukha natsia Gileadi, nakwana khumatukhu manyishi na vandu vi tsimbia tsindi, navakuura mu liihe. 22Yavahitsanyinya khali khutsia khutukha mu litaala lia Putolemi; maniyiira vandu tsiheelefu tsivaka khu vandu vi tsimbia tsindi. Yayaaya khandi miandu chiavo. 23Nalwo lwa yavukula Vayahudi vamenyanga mulusomo lwa Galilaya, khandi havundu halaangwangwa Arabata, vakhali vavo nende vaana, halala ni miandu chiavo chiosi, nivatsia mu shivala shia Yudeya ni likhoya linyishi.
24Mumatukhu kenako, Yudasi Makabayo nende amwavo wewe Yonatsani, vambukha Muchela kwa Yorodani, manivachenda luchendo lwa matukhu kavaka khutsia mushiangalangwi. 25Vakana na Vanabateha, ni vavinjilitsa ni milembe, khandi ni vavavoolela shia shindu shiosi shiali nishikholeshe khu vamwavo vavo mu lusomo lwa Gileadi. Vavavoolela, 26“Vayahudi vanyishi vamali khuvohwa mu mataala ki imbinga ka Bozira nende Bosori, Alema, Kasifo, Makedi nende Karanahimu. 27Valala vavohelwi mu mataala kandi mu lusomo lwa Gileadi; mutsiku umali khwirechekha khukwana tsimbinga tsienetso mukamba, nu khutivitsa shia mundu wosi khulitukhu lilala.”
28Nalwo lwa Yudasi nende vasikali veve vakomokha vwangu nivashiamila khu muhaanda kwinjilanga mushiangalangwi khutsia mu litaala lia Bozira. Yavula ni tsingulu litaala lienelo, nasinza shia mundu musatsa wosi. Yayaayo shia shindu shiosi nasamba nu mulilu litaala lienelo. 29Yarula havundu henaho mu vutukhu, nivatsia khutukha khu imbinga yili havundu halaangwangwa Datsema. 30Lwa mu mavwevwe katukha, vavukha mu tsindolo nivalola mukaanda kwa vasikali vanyishi, va vakhaywa khuvalitsa. Vasikali venavo vali vachinji tsingasi, nende vindu viu khukwanila khutsia khuvukula ni tsingulu imbinga yeneyo, nu khukwana na Vayahudi vamenyanga muyo. 31Lwa Yudasi yahulila liyooko, khandi khuli vandu valaanjililanga, khandi visiliva ni vihulilikhananga khurula mu litaala likali, nalwo lwa yamanya ndi liihe limali khuraanjitswa. 32Yudasi yavoolela vandu vu mukaanda kwekwe, “Kwanili nunundi Vayahudi veshie!”
33Yudasi yavoolela vasikali veve vachenda mu mikaanda chivaka, khukwana mutsiku khuraanjila inyuma. Lwa visuundanga imbeli, vakhuvanga visiliva nivasaala nu mwoyo mukali muno. 34Lwa mukaanda kwa vasikali va Timoteo vahulila ndi ni Yudasi Makabayo, vakomokha nivilukha. Yudasi yavakuura, niyiira vandu tsiheelefu munane khulitukhu lienelo.
35Yudasi yakomokha natsia khukwana khandi litaala lia Alema. Yalivukula ni tsingulu, niyiira vandu voosi mulio, nayaayayo shia shindu shiosi. Yalisamba nu mulilu. 36Yaroonjela narulayo, navukula ni tsingulu mataala ka Kasifo, Makedi, Bosori nende mataala kandi mu lusomo lwa Gileadi.
37Vindu vienevo niviakhamala khwikholekha, Timoteo yalaanga halala mukaanda kwa vasikali vandi, manasimiikha maheemo ku khumenyamu khuluveka lundi lwa havundu halaangwangwa Rafoni, khuluveka lundi lu muchela. 38Yudasi yaruma vandu khutsia khurunishitsa havundu ha vatsiku vamenyanga. Varunishitsi vitsa khumuvoolela, “Vandu vi tsimbia tsindi vamenyanga himbi na khutsi vamali khwiyunga naye; nu mukaanda kwa vasikali vanyishi. 39Vasamulitsa khandi Vaharabu khuvakhonya khukwana, navo nivasimiikha maheemo kavo ku khumenyamu khuluveka lundi lu muchela, khwirechekha khukwana.”
40Lwa Yudasi halala nu mukaanda kwa vasikali veve vali nivali himbi khutukha khu muchela, Timoteo yavoolela vimilili vi mikaanda chia vasikali veve, “Nikava alawambukha khuraanga khwitsa wa khuli yinu, shiukhunyala khuva ni tsingulu tsiu khumukwana tawe; shichila ni kilikali, alakhukuura. 41Navutswa niiva aliitsa khuria, nu khutsia khusinjila khuluveka lundi lu muchela yoko, khulambukha wa aliitsa khuva nali nu khumukuurilayo.” 42Lwa Yudasi yatukha khu muchela kwa matsi kwenoko, yavikha vimilili vi mikaanda chia vasikali ha muchela kwenoko. Yavavoolela,
“Muvuli khuhuchililakhu mundu khusinjila, navutswa muvakhole khukwana mu liihe.” 43Yudasi neye waraanga khwambukha natsia ha vali nivali, ma vasikali voosi nivamulonda. Yakuura vandu vi tsimbia tsindi tsiosi. Vasiuva viuchi viavo nivilukha khutsia khutukha khu litempeli liali niliumbakhwa havundu halaangwangwa Karanahimu. 44Navutswa Yudasi yavukula litaala lienelo nasamba litempeli liumbakhwamu nu mulilu, halala na vandu vali nivivisamu. Nindi litaala lia Karanahimu liavukulwa ni tsingulu; khandi vandu vamenyayo shivali vanyala khukwana Yudasi tawe.
45Nalwo lwa Yudasi yalaanga halala Vaisraeli voosi vamenyanga mu lusomo lwa Gileadi, vakali khu vati, vakhali vavo nende vaana, halala ni miandu chiavo khutsia mu shivala shia Yudeya. 46Vatukha havundu halaangwangwa Efuroni. Efuroni nalio liali litaala likali khandi liali ni tsingulu khu muhaanda. Mundu avulakhuho wali wanyala khulivotokhana mu tsimbeka tsiosi. Navutswa vakhalakanyilanga mulio. 47Nikhali vandu vamenyanga Efuroni vikalila ilwanyi Vayahud, nukhwikalila namachina miliango chiu mu litaala lienelo. 48Khu Yuda navarumila makhuva kuvulina ndi, “Leshi khu khalakanyinyikhu mu shivala shienyu khukalushi mu shivala shieru. Avukhuho mundu umutsalilitsa tawe; khulavira vutswa khu vilenje nukhutsia khweru.” Navutswa vambakhana khwikula miliango.
49Nalwo lwa Yudasi yavoolela vandu voosi vali nivalondi mukaanda kwa vasikali veve khusimiikha maheemo ku khumenyamu havundu ha mwene yali nasinjile. 50Vasikali veve vavukula vwiyangu vwavo, khandi nakwana litaala lienelo mbasu nu vutukhu. Yakuura litaala lienelo, nalivukula ni tsingulu. 51Yudasi yiira ni shivavi shia musatsa wosi, nalekhanyinya litaala lienelo, khandi nayaayamu shia shindu shiosi. 52Vambukha Muchela kwa Yorodani, nivatsia mu lwomera injelekha wi litaala lia Betsi shani. 53Yudasi yatsililila khulaanga halala vandu nu khuvatinyilitsa nivali khu luchendo lwavo khutukha lwa vatukha mu shivala shia Yuda. 54Vatikulukha nivatsia khu Shikulu shia Sayoni nivasangala khandi nivali nu vuyaanzi. Vakholayo musango kwi vihanwa viu khusambwa, shichila mundu avulakhuho khali mulala khuvo, wali niyakoritsa vulamu vwevwe, nivashili khukalukha mu milembe.
55Lwa Yudasi nende Yonatsani vali nivali mu lusomo lwa Gileadi, khandi Simoni amwavo wa Yudasi nali mu lusomo lwa Galilaya nakwananga litaala lia Putolemi, 56mwana wa Zakaria walaangwangwa Yosefu, mwimilili wu mukaanda kwa vasikali Azaria vahulila makhuva khulondokhana khu vikholwa viavo viu vucheli, khandi makhuva khulondokhana khu maahe ka vali nivakwana, nivakuura. 57Khulwa yako, vavoola, “Leshi khali khwilombele lira lieru vene; chendi khutsi khukwana vandu vi tsimbia tsindi vamenyanga himbi ha khwamenya.” 58Nalwo lwa vahaana malako khu vandu vi mikaanda chia vasikali va vali navo; khandi nivaroonjela khutsia khukwana litaala lia Yamunia. 59Gorigia nende vandu veve vasimukha nivarula mu litaala lienelo khwitsa khuvakwana mu liihe. 60Yosefu nende Azaria vakuurwa, khandi nivahitsanyinywa khutsia khutukha khu mupaka kwa Yudeya. Vaisraeli vanyishi himbi tsiheelefu tsivili, navo viirwa khulitukhu lienelo. 61Khulwa yako, vandu vakuurwa, shichila vambakhana khuhulishitsa Yudasi nende vamwavo veve. Vali ni inganakani yu khukhola shikholwa shiu vucheli. 62Navutswa shivali nivivulwa mu lwivulu lwa vandu vachila Vaisraeli nivahonyinywa tawe.
63Yudasi nende vamwavo veve vali vaheelwa luyali lunyishi muno shia havundu hosi mu Israeli khandi mu vandu vi tsimbia tsindi tsiosi, shia havundu hosi ha lira liavo liahulilikhananga. 64Vandu viyunga navo, khali nivavitsominya.
65Nalwo lwa Yudasi nende vamwavo veve vasimukha nivatsia khukwana vitsukhulu va Esau, vali nivamenya mu shivala shi ikuvanda. Yakwana litaala lia Heburoni nende michitsi chialio, nasambulanyinya tsimbinga tsialio, khandi nasambila hasi minaara chiali nichialivotokhana. 66Nalwo lwa yaroonjela natsia mu shivala shia Vafilisti, khandi nakhalakanyila havundu halaangwangwa Marisa. 67Khulitukhu lienelo, vasalisi valala vali ni lienya liu khukhola shikholwa shiu khwenya khuheelwa luyali, vakhutsila mu liihe shichila vatsia khukwana vuchila khuva nu vusitsa. 68Navutswa Yudasi yakalukhana natsia mu shivala shia Vafilisti havundu halaangwangwa Ashidodi. Yasambulanyinya vwaali vwavo, khandi nasamba vifwanani vwa vanyasaye vavo. Yayaaya shia shindu shiosi mu mataala kavo, khandi nakalukha mu shivala shia Yudeya.
Currently Selected:
1 MAKABAYO 5: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013