1 VAKORINZO 11

1Mulonde mwiima kwanje, khuli lwa nondanga mwiima kwa Kristo.

Khuvoha Vitambaya khu Mirwi mu Lisaala

2Shia khase khosi mwitsominyanga, shichila munzitsushitsanga mu shia shindu shiosi, khandi mulondanga mechitso ka namwechitsa. 3Navutswa nyenyanga mumanye ndi Kristo neye wimililanga shia mundu musatsa wosi. Mundu musatsa neye wimililanga mukhali wewe, khandi Nyasaye neye wimililanga Kristo. 4Khulwa yako, shia musatsa wosi usaalanga inoho khuprofeta navohi shitambaya khu murwi kwekwe, aheetsanga Kristo tsisoni. 5Shia mukhali wosi usaalanga inoho khuprofeta, vuchila khuvoha shitambaya khu murwi kwekwe, aheetsanga musatsa wewe tsisoni. Mukhali khuli mwenoyo halala nu mukhali uveechi liswi lielie voosi ni shilala. 6Niiva mukhali aliitsa khuvula khuvoha shitambaya khu murwi kwekwe, khutukha aveche liswi lielie. Navutswa niiva ni tsisoni khu mukhali khukhalaka liswi lielie inoho khuveka, yenyekhanga khuvoha shitambaya khu murwi kwekwe. 7Musatsa aliitsa khuvula khuvoha shitambaya khu murwi kwekwe, shichila aloleshitsanga likoondo nende vukhumi vwa Nyasaye. Navutswa mukhali aloleshitsanga vukhumi vu musatsa; 8shichila musatsa shiyali waloongwa khurula khu mukhali tawe, navutswa mukhali yalombwa khu musatsa. 9Inoho shikali musatsa yaloongwa shichila mukhali tawe, navutswa mukhali yalombwa shichila musatsa. 10Khulondokhana khu shivune yishi, khandi shichila tsinjelosi, mundu mukhali yenyekhanga avohe shitambaya khu murwi kwekwe, khumanyinya ndi musatsa wewe neye umwimililanga. 11Khali ndio, mu limenya lieru mu Mwami, mundu mukhali aliitsa khuvula khwimenyela wonyene, vuchila musatsa; khandi mundu musatsa, shialiitsa khwimenyela wonyene, vuchila mukhali tawe. 12Khuli mundu mukhali yalombwa khu musatsa, nindio khandi musatsa yivulwangwa khurula mu mukhali. Navutswa shia shindu shiosi shirulanga khu Nyasaye.

13Vene kanakanikhu mulole, niiva nu vulahi khu mundu mukhali khusaala khu Nyasaye havulavu, vuchila khwivohakhu shitambaya khu murwi kwekwe. 14Liiva li vindu liechitsanga ndi niiva musatsa wayumbitsa liswi liraambi, liliitsa khumuha tsisoni, 15navutswa niiva mukhali wayumbitsa liswi liraambi, nu vukhumi vwevwe mwene? Waheelwa liswi liraambi khuli shindu shiu khumukhunikha khu murwi. 16Navutswa niiva mundu alikhuho wenyanga khuhinganyinya kamboli koosi; koosi ka nyenyanga khuvoola kali ndi khutsi inoho makanisa ka Nyasaye khuvulakhu mwiima kundi kwosi mu lisaala.

Shiukhulia shiu Khumalilikha shiu Mwami

(Mat 26:26-29; Mk 14:22-25; Luka 22:14-20)

17Navutswa shinzitsanga khumwitsominya khali hati hene mu mivaalo ka muheetsanga; shichila lwa mwakanilanga halala, shikali mukholanga kali malahi tawe; navutswa mukholanga vindu vitamanu. 18Lukhuraanga lwene, mbulilanga ndi lwa mwakanilanga halala khuli likanisa, liavukhana lili hakari henyu, khandi suuvilanga nindio kali. 19Ni kilikali, nu vulahi liavukhana nilivele hakari henyu, khu vandu vakholanga ku vulunji vamanyikhane havulavu. 20Lwa mwakanilanga halala, shikali ni shiukhulia shiu khumalilikha shiu Mwami shia muliitsanga tawe. 21Lwa muliitsanga shiukhulia, shia mulala khu munyi, aliitsanga shiukhulia khulwelwe, vuchila khulia halala, makalomba valala khuva ni inzala, na vandi khutanda. 22Kanyala khuva munyi muvula tsingo tsienyu, wa munyala khulia nu khung'welelayo? Inoho munyala khuva muchayanga likanisa lia Nyasaye, khandi muvikha vamanani mu tsisoni? Ni makhuva shina ka mwenyanga muvoolele khulondokhana khu kenako? Mwitsominye? Ni kilikali, mbulakhu khuli nyala khumwitsominya!

23Ka nanyola khurula khu Mwami, nako ka namwechitsa: ndi vutukhu, khulitukhu liu Mwami Yesu yali niyakhatsamwa, yavukula mukati, 24nasanditsa Nyasaye, natong'olanyinya, navoola, “Yuku nakwo mmbili kwanje, kumali khuhaanwa shichila munyi. Mukhole ndio, khulu khunzitsushitsa.” 25Munjila indala yeneyo, lwa vali nivakhamala khulia shiukhulia shiu khulukolovo, yavukula shikombe shialimu ni divai, navoola, “Shikombe yishi ni lilakano liyia lia Nyasaye, lia masahi kaanje kahambanyinyanga. Isaa yosi ya mung'wetsakhu, mukhole ndio, khulu khunzitsushitsa.”

26Lwa muliitsanga mukati nu mung'wa idivai mu shikombe, mulanditsanga likhutsa liu Mwami, khutukha lwa aliitsa khukalukha. 27Khulwa yako, mundu uliitsa khuliakhu mukati inoho khung'wa mu shikombe shi idivai munjila indamanu, aliitsa khuva nakholanga vwoni khu mmbili khandi khu masahi ku Mwami. 28Nu vulahi mundu khwirunishitsa, nashili khulia mukati nu khung'wakhu mu shikombe shi idivai. 29Mundu uliitsanga nu khung'wa, vuchila khumanya vulahi shivune shiu mmbili ku Mwami, yikhalachilanga mwene lwa aliitsanga nu khung'wa. 30Nako kachilanga valala khu munyi vali vateteshele, khandi valwala, na vandi vakhutsa. 31Niiva khunyala khwirunishitsa vene munjila yatoto, khuliitsa khuvula khukhalachilwa. 32Navutswa lwa Mwami akhukhalachilanga, khusalilitswangwa khulu khuvula khukhalachilwa na vandu vu mu shivala.

33Vasuuvili vashianje, lwa mwakanilanga halala khulia shiukhulia shiukhumalilikha shiu Mwami, mulindane vene khuvene. 34Niiva mundu ahulilanga inzala, yenyekhanga alii shiukhulia ingo wewe, khu Nyasaye alivula khumukhalachila, lwa muliitsa khuva numwakanili halala. Navutswa ningalukha, niitsa khumuvoolela makhuva kandi kamulonda.

Currently Selected:

1 VAKORINZO 11: LLLCATHOLIC

Highlight

Copy