I Yohani 4
4
Ta Moya wa Xikwembu ni wa Antikriste
1Varhandziwa, mingapfumeleni ka mimoya hinkwayu, kambe kambisisani mimoya kutiva lesvaku hakunene i ya Xikwembu; hikuva vaprofeta va mavunhwa vahangalakile misaveni. 2Mitativa Moya wa Xikwembu hi ndlela leyi: Moya wun'wana ni wun'wana lowuvulaka lesvaku Yesu atile misaveni tani hi munhu i wa Xikwembu. 3Kambe moya wun'wana ni wun'wana lowu wungapfumeliki lesvaku Yesu Kriste atile tani hi munhu ahi wa Xikwembu, kambe lowo i moya wa Antikriste, lowu mitweke ta wona lesvaku wata; kutani ni svosvi wu kona laha misaveni.
4Vananga, n'wina mi va Xikwembu, kutani mivahlulile va mavunhwa; hikuva Moya lowunga ka n'wina wutlula hi vukulu moya lowu wunga misaveni.#4:4 Kumbe: Lweyi anga ka n'wina atlula hi vukulu lweyi anga ka vanhu va misava. 5Vona i va misava, hi kolaho vavulavula hi sva laha misaveni, kutani va laha misaveni vavayingisa. 6Hina hi va Xikwembu. Mani na mani lweyi ativaka Xikwembu wahiyingisa, kambe lweyi angaliki wa Xikwembu, angahiyingisi. Hikolaho hina hawutiva Moya wa ntiyiso ni moya wa mavunhwa.
Xikwembu i rirhandzu
7Varhandziwa, ahirhandzaneni, hikuva rirhandzu i ra Xikwembu; hi kolaho mani na mani lweyi anga ni rirhandzu apsaliwile hi Xikwembu, nasvona ativa Xikwembu. 8Lweyi angaliki na rirhandzu, angaxitivi Xikwembu, hikuva Xikwembu i rirhandzu. 9Xilesvo, rirhandzu ra Xikwembu ritikomba ka hina hi ndlela leyi: Hi lesvaku Xikwembu xirhume N'wana wa xona lweyi angapsaliwa ali yexe kuta laha misaveni, lesvaku hitakota kuhanya hikolaho ka yena. 10Leri hi rona rirhandzu ra ntiyiso, hikuva ahi hina hingarhandza Xikwembu, kambe hi xona xihirhandzeke, kutani xirhumela N'wana wa xona lesvaku ava mukutsuli wa svijoho sva hina. 11Varhandziwa, lesvi Xikwembu xihirhandzeke hi ndlela leyi, na hina hifanela kurhandzana. 12#Vona ni: Yoh. 1:18.Aku na munhu ni mun'we lweyi atshamaka avona Xikwembu; loko hina hirhandza Xikwembu, xona xi le ka hina, kutani rirhandzu ra xona rihetisekile ka hina.
13Lesvi svihiyendla hitiva lesvaku hi le ka xona, na xona ka hina, hikuva xihinyikile Moya wa xona. 14Kutani na hina hisvivonile, hiva hiveka vumboni, lesvaku Tatana arhumele N'wana kuva Muponisi wa misava. 15Mani na mani lweyi avulaka lesvaku Yesu i N'wana wa Xikwembu, Xikwembu xi le ka yena, na yena a le ka Xikwembu. 16Hikolaho, hina hasvitiva, nasvona hapfumela ka rirhandzu leri Xikwembu xinganarona ka hina. Xikwembu i rirhandzu, lweyi atshamaka rirhandzwini atshama ka Xikwembu, ni Xikwembu xi le ka yena. 17Xilesvo loko rirhandzu rihetisekile ka hina, hi tatiya nhlana lesvaku ka siku ra kuyavanyisa hitava hitshembekile; hikuva lesvi Kriste anga xisvona na hina hi va svona misaveni leyi. 18Ka rirhandzu aku na kuchava. Kambe, rirhandzu lerihetisekeke rihlongola nchavo, hikuva rirhandzu lerihetisekeke risusa kuchava; hikuva kuchava kufambelana ni xikhatiso, kutani lweyi achavaka angahetisekanga rirhandzwini. 19Hina hamurhandza, hikuva hi yena arhangeke ahirhandza kusungula. 20Loko munhu aku: “Mina nirhandza Xikwembu”, kambe ahambula makwavu, i muhembi; hikuva lweyi angarhandziki makwavu lweyi amuvonaka hi mahlo, angakoti kurhandza Xikwembu lexi angaxivoniki.#4:20 Van'wana vali: Angarhandzisa kuyini Xikwembu lexi angaxivoniki xana? 21Kutani Nawu lowu xihinyikeke wona, hi lesvaku lweyi arhandzaka Xikwembu, afanela nasvona kurhandza makwavu.
Currently Selected:
I Yohani 4: NTC2014
Highlight
Copy
Compare
Share
Want to have your highlights saved across all your devices? Sign up or sign in
Novo Testamento Changana © Bible Society of Mozambique, 2014.
