Isabulin 68
68
Ekiruke loka akwap loka akilanya
Nama kalo epolokiit ekiruke. Ekiruke ka Daudi.
1Konyou Akuju, kisiarakinosi ipading'atin keng'.
Komotarosi kama keng' ng'ulu lu ereito nesi.
2Kwape ekutarere apuru, nes ekipone lo ireng'iara nesi kesi;
kwape ecalarere eminaa koking'aren ka akimi,
nes ekipone lo etwakiata lukarokok koking'aren ka Akuju!
3Konye lu edolito elakara kojaasi ka ailel koking'aren ka Akuju;
ecelasi kesi ka ailel ka ekiruke kalakara.
4Kirukokisi Akuju, kiturwoto ekiror keng'; kirukokisi nesi ekiruke, nesi lo itorit odowon.
Erait ekiror keng' Lokapolon.
Kolakara koking'aren keng'.
5Akuju lo iboe kalaro keng' kanakalaunan,
erait papa keng' kaikokioko kiton lo idari apuseru.
6Einanakini Akuju lukapalapalak ere lokibois,
bobo elacanakini nesi lu eyenite ka ainakin kesi apedor naka akitoloto kojokan.
Konye luka ikamenak ebunete akiboi ka akwap kana ewonit.
7Okwai Akuju, na iyaitere ijo itung'a kon,
na ilosia ijo komoding',
8abu akwap kijang'ajang'akin, abutu idowon kobukutu kwap akiru;
kanuka ajaus ka Akuju kaloko Sinai, bobo kanuka ajaus kon Akuju loko Israel!
9Ibu ijo koinak akiru na apolo noi adoore,
ibu ijo kitojokon akwap kon na aronare.
10Apotu itung'a kon kodukoto ireria neni; kajokus kon,
Okwai Akuju ibu ijo koinaki lukapalapalak akiisite kes.
11Abu Lokapolon kolemu acorasia,
kosodete aberu nu ipu akitodiar akiro nukajokak.
12“Ekerete, ekerete, ijakaa nepepe ka ajore kes!”
Apotu aberu nu ajaasi oreria kokorata iboro lukikamite:
13Atikere kideuna kesi katamaujo kamerekekin;
ajaasi aputon nuka aleur nu arapite kepuesa ka abenokoka kes nu imilimiliete erapite kesawabu.
14Na asuria Akuju loka apedor kere ijakaa kang'ina,
abutu akako kodacakinosi moru loko Salmon.
15Okwai emoru lokapolon, emoru loko Basan;
Okwai emoru lo ejaasi kaculurun kanu ipu, emoru loko Basan!
16Inyo kitere ijo kakadakiite emoru lo abu Akuju koseu akiboi kokuju keng'?
Ebuni Akuju akiboi kaneni ikaru kere!
17Ejaasi nesi ka agarin keng' aritai ka aritai nu eritosi afarasin,
kobuni Lokapolon alomun ko Sinai, alaro keng' nakalaunan.
18Edoki nesi kuju omoru, eyarit itung'a lu ikamuute;
idiaunene nesi idutan alomun kotung'a lukamenak.
Ebuni Lokapolon Akuju akiboi kang'ina.
19Kiturwoi Lokapolon, lo edakit alang'iru wok ng'in paaran; erait Akuju ayuuno wok.
20Akuju wok erait Akuju lokayuunan; erait nesi Lokapolon Akuju wok,
lokayuunan oni katwanare.
21Teni ebuni Akuju akipiricanar akwes ka ipading'atin keng',
akwes kang'ulu kalu itolosito korotin kes kalukarokok.
22Abu Lokapolon kotema, “Enyakuni eong' ipading'atin kus alomun ko Basan;
enyakuni eong' kesi alomun kotoma akaren,
23tetere ijo ilosi akejen kon kawokot kipading'atin kon,
tetere ing'okwo kon enyemete ka akimata ka akilesikin.”
24Okwai Akuju, iteete itung'a kere asiirit kon naka akilanya,
asiirit naka Akuju, ejakait kang' eyarit otogo keng'.
25Lukerukok ejaasi king'aren, lukaboliak iboro luka ekurike ejaasi kau,
kokiding' ejaasi aberu nucik iyekete isiman.
26“Kiturwoto Akuju kakiriames kanakapolon naka itung'a.
Kiturwoto Lokapolon, osi auri naka Yakobo!”
27Losodit erait Benjamin, loci kama kes;
kotupakinete lukayaitok luko Yuda ka atukot kes,
kotupakinete lukayaitok luka Sabulon nepepe ka Naftal.
28Kitodia apedor kon, Okwai Akuju,
apedor kon na itosoma ijo kanu kosi.
29Kanuka etogo kon ko Yerusalem,
einunenete ijakaa ijo idutan.
30Kiretak ityeng' ng'ulu lu iboyete kotoma abwa, ikorwa ka imong'in,
akitodolo nama kiyong'iata ijo akwapin ng'un ka ainakin ijo emusolo.
Kisiarak itung'a ng'ulu lu eminasi ejie!
31Elomunete ikiyakia ko Misiri;
einunete itung'a luko Itopia Akuju abara kes.
32Kirukokisi Akuju, osi ajakaanun nuka akwap,
kiturwoto Lokapolon,
33nesi lo itorit kuju, akujun nu mojong'.
Kopupokisi nesi irurumae ka agogong'.
34Kisiarasiarata kuju ka apedor ka Akuju; ejii akipugaa keng' Israel,
ejii apolou keng' kuju.
35Itukuriani Akuju kalaro keng' kanakalaunan, teni erait nesi Akuju loko Israel!
Einanakini nesi itung'a keng' agogong' ka apedor. Kiturwoi Akuju!
Currently Selected:
Isabulin 68: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
