Awaragasia 1
1
Ajokus ka awaragasia
1Nu kes awaragasia ka Solomon, okoku ka Daudi, ejakait loko Israel.
2Ejaasi ne awaragasia nu ing'arakinete ijo ajenun acoa ka acorasia nukajokak,
nepepe ka ajenun awaragasia nu ejaasi ka apolou na ikiara noi.
3Ebeikinete akisisianakin ijo ekipone loka akijar ipiriana,
ka ekipone loka amunokina, ka adolite nepepe ka ajokun.
4Ebeikinete akitocoun itwan ni mam kejeni ibore,
ka akisisianakin lukatumunak ayong'ara.
5Ebeikinete awaragasia nu akiyatakin akijen nama kani eco, ka ayaite ni isisiate,
6tetere ejenunete kesi apolou na eng'opit kotoma awaragasia,
nepepe ka ican lu ikieunenete acoa.
Acorasia namaka lukatumunak
7Ayong'ite Lokapolon nes ageun ka akijen;
ibang'aisik enwang'ito acoa ka akisisianakino.
8Okoku kang', kopup acorasia ka papa kon,
bobo mam aking'er nu esisianak toto kon ijo.
9Akisisianakino kes itojokoni ekipone kon
bala ekitamba lo imilimili, kere erikot itojokon ajaus kon.
10Okoku kang', na etamiata ijo lukarokok, mam acamun.
11Kelimokisi kesi ijo ebe, “Kobuni, kakoutu itwan kaarata!
Kalomikisi itung'a lu emam akiro!
12Kelikosi kesi ejarete kwape ka ates,
kwape kang'ul kalu edacakinosi adwi!
13Idumunete oni abara kere,
ka akileleb itogoi wok kiboro kalukokouna.
14Kobu kimorikikinosi ka siong',
ibunete oni atyakatyaka lu ikokounete oni.”
15Okoku kang', mam aupa ka itung'a bala ng'ulu.
Kolwanikin kama kes cut.
16Mam kesi kidarakinete asoma ibore nikaronon.
Elokokina kesi ng'ini pak akiyara.
17Emam ajokun apede aterar eregi
itee ni ikote ijo akikamun,
18konye itung'a bala ng'ulu elokete eregi,
eregi lo ebuni akiyara kesi ikulopek.
19Akideme ng'ini pak ari nikademan
nu nes isomakinosi kamaka ng'in kere kani edemi ka aturub.
Enyarit acoa
20Kopupokisi! Iworoe acoa korotin; ka osokonin,
21enyarit koporoto kaloko kuju ka arwatan;
inera acoa ko orutei kalu elomere ireria lukapolok.
22“Ibang'aisik! Ikotosi osi ayaari akolong' na etia ai ibang'aaka osi?
Iyarete osi apak na etia ai ilakara osi akwenare akijene?
Mam osi kisisiaunete cut?
23Kopuputu na eretakina eong' osi;
ainakini eong' osi acorasia nu ejooka bobo ka akimor akijen kang' ka osi.
24Naarai anyarau eong' osi, kong'erete osi apupun,
arwau eong' akani kang', konye emam itwan ipede ni apupu.
25Ing'eroto osi acorasia kang' kere,
bobo mam osi kikotosi karwaa eong' osi.
26Kanuka ng'unu, na ilomiata osi ocan, abuni eong' de akwenare osi.
Abuni eong' akwenare osi na idumunata osi ican,
27na edolokina osi akurianu bala ang'atunet,
eyauti ekuwam lo ededeng' loka ican,
ijaasi osi apipilu ka akituur.
28Kaneni ibunete osi anyarite acoa, konye mam eong' keikini.
Ibunete osi akote eong' ng'olo wai, konye mam osi kidumunete eong'.
29Mam osi apelem cut kaanyuto adumunete ka akijen,
bobo ng'in pak ing'eroto osi akiyong' Lokapolon,
30mam osi apelem cut kikotosi acorasia kang',
kere de apupun na arwaara eong' osi.
31Kanuka ng'unu, idumunete osi nu itemokina osi adumun,
bobo asomisio kus ka ikulopek nes kiinakinete osi adeka.
32Etwakete itung'a lu mam kejenete, naarai eng'erito kesi acoa.
Itung'a lu ebang'aaka emudiari abang'anut kesi.
33Konye ni epupi eong' idario nesi.
Ejaikinosi nesi ka aipuc, emam atenikina naka akurianu.”
Currently Selected:
Awaragasia 1: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
