Tito 3
3
1Gumi teetiini, Dubbi jara lafa fidutiifi ta worra gugurda ch'aqasa, guuta, waan dansa ch'ufa tolcha jed'i qaabsiisi. 2Hameenna nama tokole indubbatiina, ammo hojja ch'ufa nagayafi jaalafi adaba dansaani nama ch'ufa woliini taa jed'iini. 3Wonti akanatiifi nuleeni duri daalle, dubbi inch'aqamne, ta wollaala tolchitu. Nu tissele d'araa nafatiifi gammada gosa ch'ufaa taane. Jireenna keenna ch'ufa daallumafi d'iibi keesa teenne. Nami hedduuni nu jibbe, nuleeni worra jibbine. 4Ammo naasufi jaalalti Waaqa Qarqaarsa keenna mullannaani, 5inni nu baase. Maro huji dansa nu hojannefiniti, ammo maro naasu isaatiifi nu baase, Lubbu Qulqullooni nu d'iqe, isiini d'aloota hareesafi jireenna haraa nuu kennite. 6Wonti akanatiifi Waaqi guddiseti Lubbu ufi nura buuse, maro Yeso Kristo Qarqaarsa keennatiifi, 7aka maro eeba isaatiifi nu Waaqaani wolti araaramne jireenna hegeri ka nu abdannu argannu. 8Jechi kunini ka d'ugaati.
Anini sii waan kana aka dansa jabeesitu fed'a, aka worri Waaqa d'ugefatu ch'ufti huji dansa jabeese hojatu. Wonti kunini waan dansa, nama ch'ufayu ira jirti. 9Ammo wolmormiti daallumatiifi maqa heddu ka ababootatiifi woldidiisafi had'iisa waan seera lakisi. Wonti kunini ch'ufti woma tokole imbaatu. 10Nama gargari nama baasu maro lama gorsi, duuba iti deebite maqale ind'aiini. 11Nami akana kunini hama, dabi isaatu aka inni wollaala qabu agarsiisa.
D'aamsa nagaya
12 #
Huji 20.4; Efs 6.21-22; Kol 4.7-8; 2 Tim 4.12 Yo anini Artema yokhaani Tikiko siti ergu, jabaad'u, Nikopoliti nati kooti, anini ya aka haga bulti qabanna achi tau heregad'e. 13#Huji 18.24; 1 Kor 16.12 Zena, nama seeratiifi Apolo haga dandeetu qarqaari, aka worri imaltu ufi yau, waan worri fed'u ka woreega ch'ufa kenniifi. 14Biyya teenna aka huji dansa tolchani aka waan fed'ani argatani barsiisi, ufuma intataiina jed'iini. 15Jari na woliini jiru ch'ufti nagaya d'aama. Jaalaani teenna ta d'ugefatte nagaya nu fuud'i.
Eebiti Waaqa isani ch'ufa woliini jiraatiinna.
Borana Bible © Bible Society of Kenya, 2019.