Faaru 71
71
1Ee AABBO Waaqa, anini siti baqad'a,
ch'eeru na d'owi!
2D'uga teetiini na qarqaari na baasi,
na d'agayi na baasi!
3Siida anini iti baqad'uufi
fulla jabdu na baaftu naa tahi;
atini siida kiyya ka anini iti baqad'u.
4Ee Waaqa kiyya, harka worra ch'ubbuu,
ka naasu inqamne,
ka hameenna gula yau, keesaa na baasi,
5Ee AABBO Waaqa, anini si abdad'a.
haguma d'aloota kiyyati siuma d'ugeefad'a.
6Anini haguma d'alad'e si d'aabad'e;
haguma d'aloota kiyyati asi
atini ya na qorqorate,
tanaafi anini guyya ch'ufa si faarsa.
7Waan atini aka jaba na qorqorateefi,
jireenni kiyya yayu akheekha nama hedduu tahe.
8Guyya ch'ufa anini si faarse,
guddinna kanke odeesa.
9Anini amma ya jaare, na illakisiini;
anini amma ya irre d'abe,
lafa na imbuusini.
10Nyaapi kiyya mala nati d'aate
waan kiyya dubbate na ijeesu fed'a.
11Worri waan jed'u Waaqi ya lafa isa buuse;
koota, yaane isa qamna,
nami isa baasu injiru.
12Ee Waaqa, naraa imfagaatini;
ee Waaqa kiyya,
hurrisi kooti, na qarqaari!
13Nama na had'u ha dabsatani balleesani.
Nama na gaargalchu fed'ule
ha ch'eersani gurra balleesani.
14Anini hojja ch'ufa si abdad'e,
haga qara ira si faarsa.
15Anini dansuma tante odeese,
hojja ch'ufa waan baafama keeti dubbad'a,
ato dandae waan isii hubachu baad'ele.
16Ee AABBO Waaqa gudda,
anini irre tante faarse,
dansuma tante ch'alla odeesa.
17Haguma ijoolluma tiyyaati asi,
siumati na qarqaara,
anini arrale waan dansa atini naa tolchite odeesumati jira.
18Anini amma ya jaare,
rifeensi kiyyaleeni ch'ufti ya arrae,
Ee Waaqa, na illakisiini!
Hojja anini jabeenna kanke
d'aloota ch'ufati odeesu naa wahelchi.
19Ee Waaqa, atini yayu waan mama tolchite,
d'ugaani teetileeni guddo,
gubbale ind'aqabdi.
Nami aka keeti tokoleeni lafa keesa injiru.
20Atini yayu d'ipufi gaargala nati ergite,
ammo siumati ammalle irre tiyya naa deebise,
boola duaa keesaa na fuud'a.
21Atini haga duri ira guddinna naa kennite
ammalle na jabeesita.
22Anini kiraari d'ae,
maro d'uga teetitiifi si faarsa,
Ee Waaqa kiyya.
Anini dibbe d'ae sirbe si faarsa,
Ee Qulqullo Israeli.
23Anini hojja sii sirbu,
guddise gammadaani sirba;
garaafi qalbi tiyya ch'ufaani
anini waan atini na baafteefi sii sirba.
24Anini waan d'uga teeti guyya ch'ufa dubbad'a,
wonti akanatiifi jara na balleesuu fed'u kaani
yayu dabsatani ch'eersani.
Kad'acha hayyu kad'atani
Borana Bible © Bible Society of Kenya, 2019.