Mammaasa 7
7
1Ilma kiyya, dubbi tiyya ch'aqasi, waan anini siti himu inded'ini. 2Seera kiyya jabeesi, duuba injiraata. Barsiisa tiyya akuma ila tante qorqoratu qorqorad'u. 3Barsiisa tiyya jabeesi qaabad'i. Guyya ch'ufa qalbi keesa keeyad'i. 4Qaroomani, atini oboleeti tiyya jed'i hubachaleeni, jaala kiyya jaba jed'i. 5Qaroomafi hubachaani tunini nad'eeni biyyaa, ta afaanuma ufitini si faraatu, ira si fageesiti.
Niiti ch'eera inqamne
6Guyya toko ato anini qaa mana, Kiyyatini ala laalu, 7jara kaima heddu, ka argaa d'ageeti inqamne, arge, ammo worra suni keesa nama tokoti ka nama ch'ufa ira daalle jira. 8Inni kara gula d'aatu mana niiti toko ta sharmut'omani gurra baafate, ta mani isii moga ejuuni bahe. Inni 9galgala eegi lafti dukanoofte d'aatu mana isii bahe. 10Jennaani isiini mala d'aate woyya aka sharmut'a hid'atte isani woldeete. 11Isiini mana keesa inteetu, guyya ch'ufa lalaba, ch'eera foko male, dira keesa deemti; 12yo gari kara dira keesa ejiti, yo toko gabaya keesa ejite nama eeddi. Isiini kara ch'ufa gula marte nama barbaaddi. 13Isiini gurba kaaniti mamarate d'ungate, ila keesa laalte waan jette, 14Anini arra sorio qalad'e, foonile manaa qaba. 15Tanaafi anini si barbaadu deema, amma sini bahe! 16Anini sire tiyya woyya barriti lafa Misiriti mid'aasanini afe. 17Qayya qumbitifi qunch'e birresatifi hargeesa yayu iti naqe. 18Kooti, halkani kana ch'ufa haga quumnuti woliini rafne wolti mamaranna. 19Woma insodaatini, d'iirsi kiyyaleeni worra injiru, ya imaltu fago d'aqe. 20Inni ya beese guddo fud'ate imaltu deeme, torbaani lama asi ingalu. 21Duuba isiini mid'aagumafi dubbi dansaani isa ufiti d'araasifte, innileeni suni gula laafe gula bahe. 22Maro tokotu inni akuma looni qalma geesani kae isii gula deeme, akuma gugufto t'urura fulla 23t'iyaani woraananiti deemtu deeme. Inni akuma simpirre t'urura seentu, ta aka lubbuuni isi gaargala keesa jirtu imbeenne, jira. 24Amma tana ilmaani tiyya, na ch'aqasa, waan anini jed'ule qalbi keesa keyad'a. 25Niitiini akana tunini qalbi si fuute gula indedeemini. 26Isiini qara d'iira heddu galafatte, nama muumme inqamne fit'e. 27Nami mana isii d'aqu seera nama boola ekhera deemu, karaani gabaabani duati nama geesu kana.
Aka qarooma faarsani
Borana Bible © Bible Society of Kenya, 2019.