Mammaasa 15
15
1Dubbini laana dallansu qabaneesiti, ammo dubbini lolaa dallansu owifti.
2Dubbini qaroo beekha namaa darti, ammo daalleeni dubbiniti indididdi.
3AABBO Waaqi waan fulla ch'ufati tolchani inarga, inni nama dansaafi hamale waan inni tahu inarga.
4Jechi dansaani nama jireesa, ammo jechi hamani nama ijeesa.
5Daalleeni gorsa abbaa tufati, ammo ka gorsa suni fud'atu beekha qaba.
6Nami d'uga mana ufi keesati woi olkeyata, ammo ch'ubbicha woma inni olkeyatuti gaargalani iti d'ufa.
7Dubbini qaroo beekha nama ch'ufaa kenniti, ammo heregi daalle akasi intolchu.
8AABBO Waaqi sorio ch'ubbicha injibba, ammo kad'achaani nama d'ugaa isa gammachiifti.
9AABBO Waaqi kara ch'ubbicha injibba, ammo nama d'uga gula deemu injaalata.
10Yo atini waan hamtu tolchite, d'iba guddati siti d'ufa; nami qajeeluma didduleeni indua.
11Gaargalafi dootileeni AABBO Waaqa durati ind'offamtu. Nami akami dandae herega ufi Waaqa d'ossa re?
12Kiyyibaani gorsa infud'atu, inni qaroo ira, gorsa imbarbaadu.
13Nami gammachu qabu inqumaada, ammo nami gammada inqamne ingolgolaa.
14Nami hubacha qabu wo barachu fed'a, ammo daalleeni daalluma ufitini teeti.
15Hiyyeesaa guyyaani ch'ufti gaargala, ammo nami gaargala inqamne guyya ch'ufa gammada qaba.
16Hiyyeesi AABBO Waaqa sodaatu dureesa gaargala qabu ira jira.
17Fulla nami woljibbu fooni dansa woliini nyaatu, nama woljaalatu ka raafu woliini nyaatuti ira jira.
18Nami miira diqa yoosu namaani wold'abani, ammo nami miira gudda nageele.
19Karaani nama laafa woma inguunne gufufi qoraati qaba, ammo ka nama qajeela waan balla, gufufi qoraatile inqabu.
20Ilmi qarooni abba gammachiisa, ammo daallichi haad'a ufi tufata.
21Daalleeni daalluma jaalata, ammo qarooni qajeeluma keesati bula.
22Nami mala ufi ch'alla gula deemu inuma wollaala, ammo nami mala nama heddu gula deemu, waan dansaani baha.
23Dubbini qajeeltuni ta fulluma isiini malteefiti dubbatani akami dansa!
24Nami wobeekhu kara jireenna ka gubani d'aqani gula deema, inni kara badi, ka boola duati nama geesu, gula indeemu.
25AABBO Waaqi mana kiyyibaa imballeesa, ammo fulla niitiini hiyyeetini qubatu inqorqorata.
26AABBO Waaqi herega hama jibba, ammo herega dansa injaalata.
27Nami kara dabaatini woi horatu worra ufi balleesa, ammo nami gumbo jibbu injiraata.
28Nami d'ugaa heregeti woi dubbata, ammo nami ch'ubbu herega male lafumaa kae hameenna ch'alla dubbata.
29AABBO Waaqi nama ch'ubbu qabu iraa fago jira, ammo kad'acha nama d'ugaa ind'agaya.
30Fuuli gammada qabu nama d'ibile ingammachiisa, oduuni dansaleeni garaa mid'aasiti.
31Nami gorsa fud'atu qaro taha.
32Nami wobarachu diddu ufumaa ufiti jaalata, ammo nami gorsa fud'atu beekha darata.
33AABBO Waaqa sodaachani qarooma daracha. Nami guddinna barbaadu ufi guddisiti lakisu male.
Borana Bible © Bible Society of Kenya, 2019.