Mammaasa 12
12
1Nami gorsa didu woma imbaratu, gorsa diditileeni daalluma.
2Nami dansaani AABBO Waaqa ira eeba argata, ammo inni nama waan hamtu namati malatu wollaala iti mura.
3Nami hamani jireenna isaa keesa jajabaate ineju, ammo nami d'ugaa inchochou, jajabaateti eja.
4Niitiini dansaani gaad'a d'iirsaati, ammo niitiini hamtuni d'iirsaa inch'eere d'ukuba hama lafa keesati.
5Heregi nama d'ugaa kama d'ugaati, ammo heregi ch'ubbicha waan d'araati.
6Dubbini ch'ubbicha waan nama ijeesati, ammo dubbini d'ugaa lubbu namaa baafti.
7Ch'ubbichi indua, daarale inhoratu, ammo nama d'ugaa worri isaa haguma jiru ch'ufa injira.
8Nama qaroomuma isaatini saadani, ammo daalle daallumuma isaatini tufatani.
9Nama nama gudda ufi sehu, ka ammo garaacha imbulle, ira, nama guddinna inqamne ka harka ufitini hojate buluuti gooma.
10Nami dansaani hori ufi qorqorata, ammo hamaani dabse balleesa.
11Nami oobru qotatu sagale ind'abu, ammo nami waan woma keesa injirre gula deemu woma imbaratu.
12Nami hamaani woma hamtu tolchu ch'alla barbaada, ammo nami d'ugaa d'uga iraa inchochou.
13Ch'ubbichi afaanuma ufitini t'urura seena, ammo nami d'ugaa afaanuma ufitini waan hamtu keesaa ufi baasa.
14Nami woma jed'ufi woma tolchu gula waan maleefi argata.
15Daalleeni yo ch'ufa qaro ufi seeti, ammo qarooni gorsa ch'aqasa.
16Daalle dallansuuni yoosu iraa mullati, ammo nami woi beekhu arabale inobsa.
17Nami d'uga dubbatu dubbi jirtu d'ugeesa, ammo ka d'ara dubbatu dubbi injirre d'ugeesa.
18Dubbini herega male dubbatani akuma woraana nama woraanti, dubbini heregaani dubbatani nama fayyifti.
19D'arti yoosu dabarti, ammo d'ugaani haguma jirtu indabartu.
20Nami hameenna malatu herega namaani sobu garaa keesaa qaba, ammo ka waan dansa malatu gammada argata.
21Wonti hamtuni nama d'ugaa inqabatu, ammo ch'ubbichi gaargala male waan d'ibi inqabu.
22AABBO Waaqi kiyyiba jibba, ammo nama dubbi ufi guutu iraa gammada.
23Nami woi beekhu beekha ufitini ch'allisa, ammo daalleeni afaani inqabatu.
24Nami woi hojatu jabeenna argata, nami woi inhojanne tisse taha.
25Yaadoni nama ijeefti, ammo dubbini dansaani nama gammachiifti.
26Nami d'ugaa jaala ufi qajeelcha, ammo karaani ch'ubbicha worra balleesa.
27Nami woma inguunne waan barbaadu inargatu, ammo nami jabaate hojatu woi horata.
28D'ugaani kara jireennati, ammo ch'ubbuuni kara duisaati.
Borana Bible © Bible Society of Kenya, 2019.