Matayo 13
13
1Guyyuma suni, Yesoni mana keesaa bahe d'aatu galaana tae. 2#Luk 5.1-3 Gumiini guddooni wolti baanaani inni hobolo keesa seene achi tae, duuba gumiini ch'ufti afaani galaana ejaanjite. 3Inni mammaasaani waan heddu worrati hime waan jed'e, Namichi toko mid'aani fach'aasu d'aqe.
4Ato inni fach'aasu mid'aani gari d'aatu karaa jigani, simpirreeni d'ufte nyaatte. 5Mid'aani gari d'akha gubbaa jigani, fulla biyyeeni guddooni injirre. Yoosu biqilani, ammo waan biyyeeni gadi fago intahiniifi, 6aduuni baanaani qanch'ooratani, duuba waan hidda inqamneefi qanch'arani. 7Mid'aani gari qoraati keesa jigani, qoraatiini woliini baate ukaamsite. 8Mid'aani gari biyye dansa gubbaa jigani; mid'aani d'alani, hagi toko d'ibba d'alani, ka gari jaatama d'alani, ka gari sodoma d'alani. 9Yo gurra qabaattani d'agaya.
Waan mammaasaani dubbataniifi
(Mariko 4.10-12; Luka 8.9-10)
10Jari Yeso gara isaa d'ufe waan jed'eeni, Atini maafi mammaasaani worrati dubbatta? 11Yesoni waan worraani jed'e, waan Finna gubba ka d'ossani ya isani barsiisani, ammo worra imbarsiimne. 12#Mat 25.29; Mar 4.25; Luk 8.18; 19.26 Nama waan guddo qabu iti daraniifi, duuba inni quufeti hambisa; ammo nama woma inqamne diqo inni qabule iraa fuud'ani. 13Maro waan kanatifi anini mammaasaani worrati dubbad'a. Ato ilaalanile inargani, ch'aqasanile ind'agayani, yokhaani imid'aafatani. 14#Isa 6.9-10 Tanaafi wonti raagi Isayani jed'e ya guutamte. Inni waan jed'e:
Inuma ch'aqaftani ammo inhubattani;
inuma ilaaltani ammo imid'aafattani.
15Garaani gumi tana ya daallae.
Gurri worra yayu duude,
ilaale ya dunuunfatani,
aka woma ingarre,
aka gurraleeni woma ind'ageenne
aka garaani woma inhubanne,
aka nati deebiani,
anini imfayimne.
16 #
Luk 10.23-24
Ammo ayaana keesani ka ilti teesani lafa gartu, gurri keesanileeni woi d'agayu. 17D'uguma, waan anini isaniini jed'u, raagafi nami d'uga hedduuni waan isani agartani kana argu fed'e, ammo argu dad'abe; ammalle waan isani d'ageettani kana d'agayu fed'e, ammo d'agayu dad'abe.
Mammaasa abba oobru diigani
(Mariko 4.13-20; Luka 8.11-15)
18Yoosi mammaasa nama mid'aani fach'aasu d'agaya. 19Yo nami dubbi Finna d'agaye inhubatiini, hamaani kaani d'ufe, waan garaa isaa keesati fach'aasani kaani keesaa fuud'a. Kunini mid'aani d'aatu kara jige. 20Mid'aani lafa d'akha gubba jige sunini nama dubbi d'agaye hurrise gammadaani fud'atu fakaata. 21Ammo hidda inqabu, haga diqa obse, hojja d'ipufi gaargali maro dubbi tanaatiifi d'ufu yoosu gufata. 22Mid'aani qoraati keesati fach'aasani suni nama dubbi d'agaye, ammo herega lafatiifi sobi durooma dubbi taani ukaamse, mid'aani d'alu d'owu fakaata. 23Mid'aani biyye dansa gubbati fach'aasani suni nama dubbi d'ageennaani mid'aafate, duuba mid'aani d'alu fakaata; toko d'iba toko, ka d'ibiini jaatama, ka gari sodoma d'ala.
Mammaasa raafuuti
24Yesoni mammaasa d'ibi worrati hime waan jed'e: Finni gubba nama sanyi dansa oobru ufi keesati oobre fakaata. 25Ammo ato abbaani rafu, nyaapi isaa d'ufe, raafu jiddu dargayeti fach'aase, kae iti d'aabate. 26Dargayeeni biqillaani mid'aani d'alte, jennaani raafuleeni woliini bat'e. 27Garbooti abbaati d'ufte waan jetteeni, Aabbo, atini sanyi dansa oobru tante keesati imfach'aamne? Akamiini raafu qabdi re? 28Abbaani oobru waan jed'eeni, Nyaapa kiyyati waan kana tolche. Garbooti waan isaani jette, Nu d'anne haramnu feeta? 29Abbaani oobru waan jed'eeni, Hiyyo; hegeri ato haramtanu dargayele woliini bubuqiftani. 30Lachu ha woliini baatu, haga muraansi gahuuti. Gaafa muraansa, anini waan worra muruuni jed'u, Qara raafu wolti guura, wolti hid'a aka gubani, ammo dargaye khod'o tiyyati galcha jed'aani.
Mammaasa guma dambifi bukho
(Mariko 4.30-32; Luka 13.18-19)
31Mammaasa d'ibi Yesoni worrati hime waan jed'eeni, Finni gubba waan aka guma dambi fakaata, ka nami toko fuud'e oobru ufi keesati fach'aase. 32Inni mid'aani ch'ufa ira diqa ammo eegi bahe mid'aani ch'ufa ira guddate mukha gudda taha. Duuba simpirreeni d'ufte dame irati mana jaarati.
Mammaasa bukho
(Luka 13.20-21)
33Ammalle inni mammaasa d'ibi worrati hime, Finni Waaqa ka gubba bukho fakaata, ka niitiini fuute; dargaye d'ebbe lama ta jiisaniti nat'e, haga ch'ufti bukhofte olbatuti.
Yesoni mammaasani dubbi haasa
(Mariko 4.33-34)
34Yesoni mammaasaani waan kana ch'ufa worrati hasae, mammaasa male woma tokole namati inhasoomne. 35#Far 78.2 Tunini aka wonti raagi jed'e guutamtu:
Anini afaani kiyya banad'e mammaasaani dubbad'a,
anini waan haga lafti uumamte d'ossani hima.
Mammaasa raafu diigani
36Jennaani gumi biraa deeme manati gale. Jari isaa gara isaa d'ufe waan jed'eeni, Mammaasa raafu oobru keesa diideesi nuti himi. 37Yesoni waan jed'eeni, Nami mid'aani dansaa fach'aasu Ilma Namaati; 38oobruuni lafa tana; mid'aani dansaani ilmaani Finna Waaqati; raafuuni ilmaani Hama Kaani; 39nyaapi isi fach'aase Sheet'ana. Muraansi waan eegi tana. Worri muruleeni malaika. 40Akuma raafu wolti guurani ibidaani gubani, akasuma eegi tanale taati. 41Ilmi Nama malaika ufi erge, isiini Finna isaa keesa waan daba ch'ufaafi worra hameenna tolchu ch'ufa wolti guurte, 42ibida balaliu keesaa gati; achiti bohani ilkaani qarani. 43Gaafasi jari d'uga aka adu Finna Abba worraa keesati ifsa. Yo gurra qabaattani, d'agaya.
Mammaasa hori d'ossaniifi dooqa
44Finni gubba aka hori oobru keesati d'ossani jira, ka nami argate, biyye irati deebise biraa deeme. Gammada ufi keesa waan qabu ch'ufa gurgure oobru suni bitata.
45Ammalle Finni gubba daldaltu dooqa mid'aadu barbaadu fakaata. 46Dooqa toko ta gati guddo arginaani deeme waan qabu ch'ufa gurgure bitata.
Mammaasa t'urura
47Ammalle Finni gubba t'urura galaana keesa buusani, qurt'umi gosa ch'ufa wolti guuraniini fakaata. 48Yo guutame, afaani galaanati hirkisani, tataani qurt'umi gargari filani: dadansa olkeyatani, hamamtu gadigatani. 49Eegi tanale akasuma taati: malaikaani d'ufte nama hamamafi dadansa gargari baafti. 50Ibida balaliuti guurti, achiti bohani ilkaani qarani.
51Waan kana ch'ufa hubattani? Worri, Ee jed'eeni. 52Yesoni waan worraani jed'e, Tanaafi nami seera beekhu ka waan Finna gubba barate, aka abba worraa ka subba ufi keesaa waan hareesafi dullacha baasu fakaata.
Aka Yeso Nazareti keesa tuffatani didani
(Mariko 6.1-6; Luka 4.16-30)
53Yesoni mammaasa kana hobaamnaani achi kae deeme 54lafa ufi d'aqe, Mana Waaqa iti kad'atani keesati nama barsiise. Nami isa ch'aqase ch'ufti maadefate waan jed'e, Namichi kunini qalbi tanaafi humna waan mama kanaani tolchu eesaa argate? 55Kunini ilma namicha wo boch'u kaaniiniti? Maqaani haad'a isa Mariamuniti? Oboleyaani isaa Yakobofi Yusufufi Simonifi Yudaniti? 56Oboleyaani isaa ta dubra nu woliini jirtiniti? Namichi kunini jabeenna kana ch'ufa eesa argate re? 57#Yoh 4.44 Duuba isa quufu didani jennaani Yesoni waan worraani jed'e, Fulla ch'ufati raaga guddisani, ollafi worra isaa keesa male. 58Inni waan mama achiti intolchine, maro worri d'ugefacha inqamneefi.
Duisa Yohana nama batisu
(Mariko 6.14-29; Luka 9.7-9)
Currently Selected:
Matayo 13: BOR
Highlight
Share
Compare
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.
