Yoshua 22
22
1Jennaani Yoshuani worra gosa Reubenitifi ta Gaditifi ta Manase ta ilaboru wolti yaame. 2#Hen 32.20-32; Yos 1.12-15 Waan jed'eeni, isani waan hojattuuni AABBO Waaqa Musani tolcha jed'e ya tolchitani, ammalle dubbi tiyya ch'ufale ya guutani. 3Haga arra isani oboleyaani teesani ta Israeli biraa indeemne, ammalle isani dubbi AABBO Waaqa keesani ya aka dansa guutani. 4Ammo akuma inni iti kakhate, AABBO Waaqi keesani yayu oboleyaani teesani ta Israeli nagaya kenneefi. Tanaafi beena lafa isani teenna jettani, ta galaana Yordani ilaboru jirtu ta hojattuuni AABBO Waaqa Musani isanii kenneti gala. 5Seera hojattuuni AABBO Waaqa Musani isanii kenne jabeesa guuta: AABBO Waaqa keesani jaalad'a, fed'i isaa tolcha, seera isaa guuta iraa ingorina, garaafi qalbi teesani ch'ufaani isaa hojad'a. 6-8Yoshuani eebaafi dubbi taanaani worra galche waan jed'eeni, waan horattani kanani worra keesaniti gala: loonifi qarsiifi worqifi sibiila diimafi guraachafi woya heddu argattani. Waan nyaapa keesani iraa boojitani oboleyaani teesaniini gaha. Inni jecha kana buufannaani worri kae gale. Musani yayu gosa Manase ta gariti lafa Yordani ilaboru kenne, ammo gosa Manase taani d'ibi Yoshuani yayu lafa galaana Yordaniti ila adu gosa d'ibi woliini kenneefi. 9Akanaani worri gosa Reubenitifi Gaditifi ka Manase ka ila boru kae gale. Worri gumi Israeli taani Shilo lafa Kanaani keesati biraa yae, lafa isaani ta Gileadi ta, akuma AABBO Waaqi Musani jed'e worri argateti dachae.
Fulla sorio irati qalani ta Yordani
10Worri gosa Reubenitifi ka Gaditifi ka Manase ka ilaboru Gelilothi, ka Yordanini ila adu jiru gahe, arti d'aatu galaanati fulla ballo toko ta sorio irati Waaqaa baasani jaarani. 11Duuba qonqoni gara d'ibii worra Israeliti d'ufte waan jette, Me d'agaya! Worri Reubenitifi ka Gaditifi ka Manase ka ilaboru yayu Gelilothi Yordani gama kaaniti fulla Waaqaa sorio iti baasani jaare. 12Worri Israeli waan kana d'ageennaani, gumiini ch'ufti Shiloti wolti baate, aka worra suni haatu.
13Jennaani worri Israeli Finehasi, ilma qaallicha Eleazari, gara worra gosa Reubenitifi ka Gaditifi ka Manase ka ilaboru, lafa Gileadi keesa erge. 14Jaaroleeni gugurdooni, nami kud'ani, gosa ila adu keesaa toko tokooni, ammalle ta isiini ch'ufti namu balbalafi worraleti mataa, Finehasi woliini yaani. 15Lafa Gileadi, fulla worri Reubenitifi ka Gaditifi ka Manase ka ilaboru jiruni d'ufani waan jed'aniini, 16#Qab-Ser 12.13-14 gumiini AABBO Waaqa waan jettu, isani maafi waan hamtu kana Waaqa Israeliti tolchitani? Waan isani fulla sorio Waaqaa baasani jaartanifi ya AABBO Waaqa diddani, isani ya gargaltani AABBO Waaqa gula yau diddani! 17#Hen 25.1-9 Daba keenna ka nu lafa Peoriti tolchine, gaafa AABBO Waaqi d'ukubaani nu balleese inqaabatani? Nu ammalle ufiftu waan sunifi gaargalu jira, dabi sunini nuu ingeenne? 18Ammalle isa gula yau diddani? Yo isani arra AABBO Waaqa diddani, inni borifa worra Israeli ch'ufati dallana. 19Amma duuba yo lafti teesani qulqullo intahini lafa Kanaaniti fulla Waaroni isaa ejituti taaka, nuti koota, gama keennati lafa fud'ad'a. Ammo AABBO Waaqa indidina, yokhaani fulla sorio Waaqa iti baasani teenna tana male ta d'ibi jaaratani, nama Waaqa didu nu intolchina. 20#Yos 7.1-26 Aka Akaniini ilmi Zera seera waan balleesu malani ch'abse ammalle gumi Israeli ch'ufa waan suni jed'ani gaargalchani inqaabatani? Nami gaafasi maro daba isaatiifi due isa ch'allaniti.
21Worri Reubenitifi ka Gaditifi ka Manase ka ilaboru waan jaarole mataa worraa ta gosa ila adutini jed'e, 22Jabaani Waaqa! Inni AABBO! Inni waan nu akana taanefi imbeekha nuleeni aka isani beetani feena! Yo nu AABBO Waaqa d'ugefachu lakimne isa gula yau dinne, arruma nu hobaasa! 23Yo nu AABBO Waaqa dinne, fulla sorio gubani yokhaani ta mid'aanifi ta wold'ageeti ta Waaqa baasani jaarre, ha innumani nu balleesuti. 24Hiyo akananiti! Wonti nu akasi tolchineefi aka taka tana ilmaani teesani, isani AABBO Waaqa Israeli maani iraa qabdani ilmaani teennaani injenne. 25Inni galaana Yordani seera jiddu teennafi isani worra Reubenitifi worra Gadi tolche. Ammalle isani AABBO Waaqa qooda womatu iraa inqabdani. Akasiini hegeri ilmaani teesani ilmaani teenna AABBO Waaqa kad'achu d'owarti. 26Tanaafi nu fulla sorio Waaqaa baasani jaarre, aka sorio gubani yokhaani Waaqa wo baasaniniti, 27ammo aka fullaani suni akheekha worra keennafi keesanifi yokhaani d'aloota taka tanale taatu, aka nu d'uguma AABBO Waaqa durati sorio teenna gumne waan Waaqa baasu malani ta wold'ageetile baamnu. Woni nu akasi taanefi aka taka tana ilmaani teesani, ilmaani teennaani isani, qooda womatu AABBO Waaqa iraa inqabdani injenne. 28Waan nu herenne, yo taka tana woni kunini taate, ilmaani teenna sila dubbi akana tanafa jetti: Me ilaala! Abbootini teenna fulla sorio Waaqa baasani ta aka teesani ijaarte. Fullaani sunini aka sorio gubani yokhaani waan Waaqa baasaniniti, ammo aka akheekha worra keennafi keesanile taatu. 29AABBO Waaqi nu ijeesinna, yo nu isa dinne, yokhaani isa lakimne, fulla sorio gubanifi yokhaani ta mid'aanitifi yokhaani waan d'ibi Waaqa baasani ijaare. Nu fulla d'ibi sorio AABBO Waaqa irati baasani iniijaarru, ta Waaro Woyyuma dura ejitu male.
30Qaallicha Finehasifi jaaroleeni gumi Israeliti, mata ta isa woliini jirtu, ta isiini ch'ufti namu mata gosa ila adu teetu, waan worra gosa Reubenitifi ka Gaditifi ka Manase ka ilaboru jed'e d'ageennaani, dubbi worra quufani. 31Finehasini, ilmi qaallicha Eleazari, waan worraani jed'e, Nu arra ya argine aka AABBO Waaqi nu woliini jiru, isani isa diqole indinne tanaafi isani worra Israeli harka Waaqaa jala baaftani.
32Jennaani Finehasifi jaaroleeni taani worra gosa Reubenitifi ka Gadile, lafa Gileaditi lakisani biraa deemani, lafa kanaaniti gara worra Israeli galani, dubbi suni ch'ufa iti himani. 33Worri Israeli dubbi suni quufe Waaqa faarse, deebie aka lafa worri Reubenitifi ka Gadi keesa qubate had'e balleesu maqa ind'oomne. 34Worri Reubenitifi ka Gadileeni waan jed'e, fullaani sorio Waaqaa baasani tunini ha d'uga nu taatu, aka AABBOONI d'uguma Waaqa d'ugaa. Duuba fulla suni maqa iti baasani d'uga jed'aniini.
Aka Yoshuani nagaya biyyati d'aamate
Borana Bible © Bible Society of Kenya, 2019.