Yoshua 2
2
1 #
Ebr 11.31; Yak 2.25 Jennaani Yoshuani, ilmi Nuni, nama lama lafa Shitimuti d'ossaani dooya erge waan jed'eeni, Beena, lafa Kanaani dooyaad'a, keessuma dira Yeriko qorqorad'a. Duuba worri yae, mana sharmut'iti toko ta maqaani Rahabu, bule. 2Jennaani waan hayyu Yerikotini jed'ani, jari Israeli toko ya halkani kana armaani bahe aka lafa dooyaatu. 3Duuba hayyuuni Yeriko qonqo Rahabuti erge waan jed'eeni, worri mana kanke keesa jiru sunini lafa teenna dooyaachu d'ufe hurrisi gayaasi. 4Jennaani Niitiini taani worra lamaani kaani fuute d'ossite waan jette, D'uguma worri ya mana kiyya d'ufe, ammo anini gara worri d'ufeefi imbeekhu.
5Aduuni d'iinaani, ato fullo inch'ufinu baqatani; ammo anini gara worri yae imbeekhu: Hurrisa reeba, ind'aqabdani jette. 6Ammo isiini qara worra kaani guurte, mana guba geesite, aala mana gubbati afteeni d'ossite. 7Duuba jari hayyuuni erge kaani haga malka galaana Yordani worra reebe.
Akuma reebuni worra suni dabarteeni fullo ch'ufani. 8Ato worri dooya kaani gadinch'iisini Rahabuni mana iti korte. 9Waan jetteeni, Anini imbeekha aka AABBO Waaqi lafa tana isanii kenne. Nami lafa tana keesa jiru ch'ufti ya isani sodaate mudame bisaani naqate waan tahu d'abe. 10#Bah 14.21; Hen 21.21-35 Nu ya d'ageenne aka AABBO Waaqi galaana Diima isani durati gosse, gaafa isani lafa Misiri keesa baatani kaani. Ammalle aka isani hayyoota Amori lamaani, Sihonifi Ogu, galaana Yordani gama suniti fit'ani balleesitani ya d'ageenne. 11Nu waan suni d'ageenne jennaani mudamne bisaani naqanne waan taanu wollaale maro teesanifi. AABBO Waaqi keesani Waaqa gubbafi lafale jiru. 12Duuba amma isani maqa AABBOOTINI nati kakhad'a aka isani worra kiyyaa naatani waan dansa tolchitani, akuma anini waan dansa isanii tolche; ammalle akheekha woi ka anini isaniini d'ugeefad'u naa kenna. 13Aka aabboofi aayyoofi oboleyaani tiyyafi fiit'a teenna ch'ufa lubbu baaftani nati kakhad'a, duu nu d'owa.
14Jennaani worri waan jed'eeni, Waaqi nu ijeesinna, yo nu waan atini feetu sii inguutini! Yo atini waan nu yaanufi kana namati inhimini, gaafa AABBO Waaqi lafa tana nuu kenne, sii naane waan dansa si tolchina. 15Rahabuni mana naabo dirati mat'anu keesa teeti, tanaafi isiini haadani worra suni dereshani lafati gabuufte. 16Waan jetteeni, lafa gaareeni d'aqa aka worri reebu teesani yau suni isani ingarre. Haga guyya sadii d'okhad'a, haga reebuni sunini galtuti. Duuba eegi suni kara keesani iti d'aabatani. 17Worri waan jed'eeni, kakhu atini nu kakhachiifte inguunna. 18Waan taatu, hojja nu lafa teesani haanu, haada diima kana deresha nuuni ga buufte kanati hid'i. Abbeeti, hateeti, oboleyaani teeti, worra abba keeti ch'ufa mana kanati wolti guuri. 19Yo nami tokoleeni mana keesaa alati bahe, isumati duani ufi gahe dooti isaa gubba teennaniti. Ammo yo nama mana kanke keesa jiru tokole wotolchani dooti isaa gubba teenna. 20Ammo yo waan nu yaanufi kana nama tokoleti himte, kakhu atini nu kakhachiifte taani nu sii inguunnu. 21Isiini ee, aki isani jettani hataatuti jette, worra gad'iifte. Worri yaanaani isiini haada diima kaani dereshati hiite. 22Worri dooya kaani gara gaareeni yae d'okhate, worri hayyu kaani haga guyya sadi lafa suni ch'ufa keesa worra barbaade woma d'abe, Yerikoti dachae. 23Jari kaani lamaani gaara iraa gabue, galaana Yordani taake gara Yoshua ilma Nuni, deebia waan tahe ch'ufa iti himani. 24Waan jed'aniini, D'uguma, AABBO Waaqi lafa tana ch'ufa ya harka keennati kenne. Maro teennafi worri achi jiru ch'ufti yaa mudame, waan tahu wollaale.
Aka gochiti Israeli galaana Yordani taakite
Borana Bible © Bible Society of Kenya, 2019.