Yona 3
3
1AABBO Waaqi maro lameeso Yona yaame waan jed'eeni, 2Kai, dira Ninawi, dira gudda suni, d'aqi, dubbi anini siti himu tana diideesi nama ch'ufati odeesi. 3Jennaani Yonaani akuma AABBO Waaqi jed'eeni kaani kae dira Ninawi d'aqe. Diri sunini aka male gudda, ballinni isaa deema guyya sadi fud'ata. 4#Mat 12.41; Luk 11.32 Yonaani deema guyya toko dira suni keesa deeme lalabe waan jed'e, Guyya afurtama keesati Ninawi imballeesani!
5Jennaani worri Ninawi diqafi guddaleeni Waaqa d'ugeefate ufi agabse ch'arqi naqad'a woliini jed'e, aka akasiini wollaala iraa deebiti garsiisu.
6Hayyuuni Ninawi qonqo tana d'ageennaani barch'uma isaa ka hayyuma iraa kae, woya isaa ta hayyuma baafate, ch'arqi naqate daara keesa tae. 7Duuba inni qonqo tana nama ch'ufati labse waan jed'e, Tunini dubbi hayyufi jara isaa gugurda iraa d'ufte: Namafi loonifi reeleeni woma sooratte bisaanile ind'ugiini. 8Ammo namafi horileeni ha ch'arqi naqate bohe Waaqa kad'ate, kara isaani hama iraa deebie, ch'ubbu worri tolche lakisuti. 9Hegeri Waaqi herega ufii jijire, dallansu ufii hamtu galfate badu nu d'owa fa!
10Waaqi waan worri tolcheefi ammalle aka worri kara isaani hama kaani iraa deebiele arginaani herega ufii jijire, worraa nahe, badi sila worra balleesu taani lakise.
Dallansu Yonatiifi naasu Waaqaa
Borana Bible © Bible Society of Kenya, 2019.