Aayubu 2
2
1Guyyaani malaikaani AABBO Waaqa durati mullattu ammalle geennaani Sheet'anileeni worra woliini d'ufe. 2AABBO Waaqi waan Sheet'anani jed'e, Isi, abbo, atini eesaa d'ufte?
Sheet'ani waan jed'eeni, Anini lafuma tana keesa olgadi mara, ato maru armaani bahe.
3AABBO Waaqi waan jed'eeni, Atini aka hojattuuni tiyya Ayubuni nama d'uga qajeela Waaqa sodaate waan hamtu lagatu agarte?
Lafa keesa nami aka isa injiru. Ato atini na sobatte, ka inni woma intahiini akanumati iti na kaaftele, inni akuma kaani na jaalate naa saalfata.
4Jennaani Sheet'ani waan jed'eeni, Nami waan qabu ch'ufa lubbuuni bitata, atini akasi beeta? 5Ammo yo atini amma nafa isaa tut'e, inni fuuluma ke dura eje si abaara! 6Duuba AABBO Waaqi waan Sheet'anani jed'e, Yoosi, anini amma isa siti lakisa, ammo labbu ch'alla keesaa imbaasiini.
7Jennaani Sheet'ani kae, AABBO Waaqa biraa deeme nafa Ayubu mamadaani qabate haguma gana faanati fuud'e gubbe matati d'aabe. 8Ayubuni ch'ach'aba okote faara fuud'e, fulla daara iti harani tae, madaani hoqateeni. 9Jennaani niitiini isaa waan jetteeni Atini akuma kaani Waaqa jaalatte isaa saalfata? Isaa abaarte doote ho? 10Ayubuni waan jed'eeni, Atini aka nad'eeni woma imbeenne dubbata. Nu dansuma ch'alla Waaqa iraa eeganna? Hameennale ineegannu? Gaargala kana ch'ufa keesa Ayubuni taka woma dubbate Waaqa inhaalanne.
Aka jaalani Ayubuu d'ufte
11Jaalani Ayubuu sadeeni, Elifazi, ka worra Temanitiifi Bildadi, ka lafa Shuhitiifi Sofariini ka lafa Naamathi, aka inni gaargale d'ageennaani woligalani, waan inni keesa jiru gaafachu d'aqani. 12Ato fulla isaa ingahiini fagootu argani, fuula wollaalani. Duuba eege, isa hubannaani, laalefatani aka male bohani woya tatarsaasani biyye matati ufi naqani. 13Jennaani halkani torbafi guyya torba isaa woliini lafa tatani, gaargala isa gudda kana argani, iraa laalefatani, afaani qabatani ufuma ch'iisani.
Waan Ayubuni Waaqaani jed'e
Borana Bible © Bible Society of Kenya, 2019.