Jaallaboota 4
4
1Eegi Ehudini due, worri Israeli ammalle AABBO Waaqa durati waan hamtu tahe. 2Tanaafi AABBO Waaqi Yabini, hayyu Kanaani, ka dira Hazori keesa tau, worrati lakise. Guddaani Askarti isaa gaafasi Sisera, ka Harosheth-Hagoimu tau. 3Yabinini gaari sibiila d'ibba sagali qaba, duuba inni worra Israeli ganna diddama dabse, naasu male mohate. Jennaani worri Israeli AABBO Waaqati bohe qarqaarsa kad'ate.
4Duuba Deborani, niitiini Lapidothi, raaga, ammalle gaafasi isiini jaallaba worra Israeliti. 5Isiini meet'i toko jala teete jiddu Ramafi Betheli, lafa gareeni ta Efraimu keesa, worri Israeli achiti dubbii iti yaa. 6Guyya toko isiini Baraka, ilma Abinoamu, dira Kadeshi ka lafa Naftali keesa yaamte waan jetteeni, AABBO Waaqi Israeli waan sini jed'u, Beeni, nama kunki kud'ani gosa Naftalitifi ta Zabuloni keesaa fuud'i, gaara Taboriti wolti baasi. 7Anini Sisera, gudda askarti Yabini, d'ufeeni, fulla galaana Kishoniti si haasisa. Inni gaarifi askarti ufiitini d'ufa, ammo sumati dabsata.
8Jennaani Barakani waan jed'eeni, Anini yo atini na woliini deemte male indeemu. 9Isiini waan jetteeni, Haye, woliini yaana, ammo huji tana keesa atini diqole ulfinna inargattu, wonti akanatiifi AABBO Waaqi harka niiti d'altititi Sisera keenna. Jennaani Deborafi Baraka kaani Kadeshi woliini yaani. 10Barakani gosa Zabulonitifi ta Naftali Kadeshiti wolti yaame, nami kunki kud'ani isa gula yae, Deboraleni isa woliini deemte.
11Duuba hojuma suni Heberini, ka gosa Keni, waaro ufi, d'aatu Kadeshi mukha gudda toko birati, fulla Saananimu d'aabate, inni qara worra gosa Keni kaani, ka ilmaani Hobabu, ka sodda Musa, biraa godaane.
12Siserani aka Barakani gaara Tabori kore d'agaye jennaani 13gaari isaa ka d'ibba sagali ka sibiila kaanifi askarti isaa ch'ufa ta Harosheth-Hagoimu jirtu wolti yaame, galaana Kishoniti erge.
14Jennaani Deborani waan Barakani jette, Beeni, AABBO Waaqati sini deema! Arra Sisera harka kanketi kennani. Duuba Barakani gaara Tabori ira nama kunki kud'ani ka duula woliini bue. 15Hojja Barakani duula ufiitini worra had'e, AABBO Waaqi Siserafi gaari isaatifi duula isaa ch'ufa worerse baqachise. Siserani gaari ufi iraa bue, miilaani baqate. 16Barakani gaarifi duula worra haga Harosheth-Hagoimu reebe duula Sisera ch'ufa hobaasani; nami tokoleeni ka hafe injiru.
17Siserani baqate waaro Yaeli, niiti Heberi ta gosa Kennitini bahe; wonti akanatiifi hayyichi Yabini, ka Hazori, worra Heberitiini wolijaala. 18Yaelini gabaate, Sisera yoyifate waan jetteeni, Aabbo waaro tiyya olseeni, insodaatini. Duuba inni olseene, isiini isa golla duubati d'ossite. 19Inni waan isiini jed'e, Bisaani d'ugu naa kenni, d'eebu qaba. Isiini okhole qadaada buqifte aanani kenniteefi, duuba ammalle isa golla duubati d'ossite. 20Jennaani inni waan jed'eeni, Balbala waaro dura eji, hojja nami d'ufe, Nami arma jira? jed'e sigaafate injiru jed'iini.
21Siserani guddo dad'abe aka male rafe. Jennaani Yaelini burrisafi d'isa waaroo fuute, laanuma gara isaa d'at'e, d'isa suni madditi d'oofte fulansite lafati hod'ite isa ijeefte. 22Barakani Sisera barbaadu d'ufe jennaani, Yaelini fuula keesa deemte, yoyifate waan jetteeni, kooti, nama atini barbaadu si garsiisa. Duuba inni isi gula olseene Sisera ka due ch'iisu, ka d'isani mata isaa keesa eju arge.
23Duuba guyya suni AABBO Waaqi Yabini hayyicha Kanaani harka worra Israeliti kenne, 24worri isa had'uma had'e balleese.
Faaru Deboratifi Baraka
Borana Bible © Bible Society of Kenya, 2019.