Yakobo 1
1
1 #
Mat 13.55; Mar 6.3; Huji 15.13; Gal 1.19 Maqaani kiyya Yakobo, anini hojattu Waaqatiifi ka Aabbo Yeso Kristo. Anini isani gosa kud'ani lama ta gargari firfirfamtani nagaya fuud'a.
D'ugefachaafi qalbi
2Oboleyaani tiyya, yo gaargala aka heddu argattani, aka gammada heregad'a; 3wonti akanatiifi isani imbeetani, aka hojja d'ugefacha teesani laalatani iti gamani obsafi jabeenna argattani. 4Ammo qorqorad'a aka obsi suni aka dansa huji ufi guute, isani qit'ooftani woma imfitanne. 5Yo nami tokoleeni isani keesa beekha d'abe, ha Waaqa kad'atu, duuba Waaqi naaso, hifacha male waan ch'ufa namaa kenna. 6Yo kad'ate inni d'ugefachu male, diqole rinch'ich'u himmalle; wonti akanatiifi nami rinch'ich'u ch'ufti aka d'awa galaana ka bubbeeni d'ooftu jira. 7Nami akana kunini waan Aabbo ira wo argatu insehiini, 8waan garaani isaa lama tahe ejatta aka dansa imbeenneefi.
Hiyyuumafi durooma
9Oboleesi hiyyeesi, yo Waaqi wo kenneefi, ha gammadu; 10#Isa 40.6-7 oboleesi dureesileeni ha akasuma tolchu, yo Waaqi wo d'owe. Wonti akanatiifi dureesi aka daraara buuyo goga. 11Aduuni balaliite buuyo gubde, daraaraani isii gogoge, mid'aagumti isii baddi. Akuma suni dureesa ch'ufa balleesani, ato inni tae huji ufi hojatu.
Ilaalacha
12Ayyaana nama gaargala obsuuti; eegi ilaalacha dabsate, eebafi jireenna argata, ta Waaqi nama isa jaalatu d'aamate. 13Nami tokoleeni, yo ilaalatani, Waaqati na ilaalate injed'iini. Wonti akanatiifi hameenni dandae Waaqa inilaalatu, Waaqileeni nama tokole inilaalatu. 14Ammo nama ch'ufa d'araa isaa hamtuti ilaalata, hojja hirkifte isa sobdu. 15Duuba d'araani isaa hamtuuni taani garaachoofte daba d'alti; ammalle dabi, eegi guddate duisa d'ala. 16Insobamiina bada, oboleyaani tiyya! 17Galati dansaani ka namaa kennanifi ka namaa baasani ch'ufti gubba gadi d'ufa, fulla Waaqa, ka ifsa gubba uume. Inni injijiramu yokhaani garingalu. 18Fed'i isatiini inni dubbi d'ugatiini nu uume, aka nu uumama isa ch'ufa keesa angafa taanu.
Dubbi Waaqa guuta
19Waan kana qaabad'a, oboleyaani tiyya! Nami ch'ufti ha hure wo d'agaye, laanuma dubbate, miira guddatu. 20Wonti akanatiifi dalansuuni namaa fed'i Waaqa ta d'ugatiini ind'uftu. 21Adaba t'uritiifi huji hamtu ch'ufa lagad'a. Dubbi garaa keesani keesati fach'aasani, ta dandeete lubbu teesani baaftu, kara laanatiini fud'ad'a.
22Dubbi isaa ch'aqaftani ufi indaallesiina, ammo dubbi suni guuta. 23Wonti akanatiifi nami dubbi ch'aqase, ammo inguunne, nama dawiti keesa ufi ilaale, aka jiru ufi argu fakaata. 24Inni maro toko ufi ilaale, achii deeme, jennaani aka jiru ufi ded'a. 25Ammo nami seera qit'e ka nama balchoomsu jabeese, ilaale, ch'aqase, ded'u dide ammo guutu, nama suni Waaqi waan ch'ufa keesati ineebisaafi.
26Nami nama aada guutu ufi sehu eennu? Yo inni araba ufi intissine, inni ufi sobe, aadaani isaa woma imbaatu. 27Aadaani Aabbo Waaqi d'ugaafi qajeeltu jed'u tana: aka ijoolle abbaafi haad'a inqamneefi nad'eeni d'iirsi iraa due qorqoratani, ufile hameenna lafa iraa ufi d'owani.
Nama tuffattani imfiliina
Borana Bible © Bible Society of Kenya, 2019.