Isaya 5
5
1 #
Mat 21.33; Mar 12.1; Luk 20.9 Haga anini sirba kana sirbe
jaala kiyyaafi oobru isaa ta zabibu faarsu,
na ch'aqasa:
Jaali kiyya oobru zabibu qaba,
ta gaara dansa gubba jirtu.
2Inni lafa qote, d'akha keesaa baase,
mukha zabibu dadansa keesati oobre.
Inni doofi eeganini iti jaare,
fulla mid'aani zabibu iti ch'ach'arasani mid'aase.
Inni mid'aani zabibu miyao eegate,
ammo mid'aani ch'ufti bushao tahani.
3Duuba amma jaali kiyya waan jed'u, Isani worri Yerusalemufi Yuda keesa tau, anaafi oobru tiyya ta zabibu wolti nu ilaala. 4Wonti nami tolchu ka anini intolchinifi jirti? Yo akasi taate, isiini maanifi mid'aani miyao anini heregad'e imbaasini, mid'aani bushao baafti?
5Waan anini amma oobru tiyya ta zabibu suni tolchu ch'aqasa; anini dallaa isiini jaarani guure, d'akhaa jaaraninile ch'ufa ch'ach'abse, bineensa alaa iti lakisa, aka inni nyaate ira ejaanjate balleesu. 6Anini isiini ha danqara taatu jed'e, akusumati lakisa. Anini mukha isii inkolkolu, yokhaani inharamu; mogoreefi qoraatiti iti baha. Anini dumansaleeni iti irroobiini jed'a.
7Worri Israeli oobru zabibu AABBO Waaqa guddati.
Worri Yudaleeni mukha zabibu ka inni oobrate.
Inni d'uga worra ira barbaade,
ammo d'iiga jissani ch'alla irati arge.
Inni qajeeluma worra ira barbaade
ammo boha laalala ch'alla d'agaye.
Waan hamtu nami tolchu
8Isani la baddaani; worra mana heddu bitate ammalle oobru d'ibile iti daratu. D'iotu nami d'ibiini fulla qubatu d'abe, isani ch'allaani lafa keesa teetani. 9Anini AABBO Waaqa gudda, ka dubbi tana jed'u, d'agaye: Maneeni gugurdoni tunini ch'ufti ona taati. 10Zabibuni lafa eeka kud'ani irati baatu daad'i galeeni lama ch'alla baafti. Mid'aani d'ebbe kud'ani, ka fach'aasani, d'ebbe toko ch'alla d'alani.
11Isani la baddaani! Isani ganama kaatani, farsoti oritani, halkani ch'ufa machaa bultani. 12Hojja jila tolfatani, isani, kiraariifi dibbeefi fulludo d'ooftani — daad'ile d'uddani. Ammo isani waan AABBO Waaqi tolchu womatu indaartani, 13tanaafi qaqabani isani boojiani. Worra keesani gugurda garaachi hobaase, biyyiti taani d'ibileeni d'eebuuni raawati. 14Booliti Ekheraa worrati beelofte, afaani iti baante nyaati. Isiini worra gugurda Yerusalemutifi gumi farso d'udde machoofte taani liqimsiti.
15Nama diqaafi guddale ch'ufa ch'eersani, nama ufi guddisu ch'ufa diqeesani. 16Ammo AABBO Waaqi guddaani waan d'uga tolche, guddinna ufii garsiise, gumi ufii qore, akasiini qulqullooma ufii mullisa. 17Dira bade ona tahe kaani keesa hooliyeeni marra d'eedde laleesileeni achi tikhata. 18Isani ya baddaani! Worra ch'ubbu lakisuu dide ufi gula hirkise yauuni, 19ka AABBO Waaqaani, Atini waan tolchu feetu hurrisi tolchi aka nu arginu. Waaqi Israeli qulqullooni ha herega ufi guutu; eegi waan inni tolchuu fed'u ilaala jed'u.
20Isani ya baddaani! Worra waan hamtuuni dansa jed'e, waan dansaani hamtu jed'u; ka dukana ifsa tolche, ifsa dukana tolchu. Ka waan had'aa mieese waan miaa had'esu.
21Isani ya baddaani! Worra qaroo ufi seehe, Nu qalbi qamna ufiini jed'u,
22Isani ya baddani! Worra d'ugaati daad'iti janna tahe, d'ugaati farso gosa hedduti d'iira tahu! 23Ka nama wollaala qabu gumbo iraa fud'ate galakise, nama woma iyyakini dabsu. 24Tanaafi amma tana akuma okhayafi buuyooni godduuni ibida keesati gubatu, akasuma hiddi keesani shame, daraaraani keesani goge bubbeeni fud'atti, waan isani, waan AABBO guddaani, Waaqi Israelii, qulqullooni nu barsiise, diddaniifi. 25Duuba amma AABBO Waaqi yayu gumi isaati dallane, harka d'eerefate, balleesaa iti kaye. Gaareeni chochoote, reefi nama hobae aka huura kara dira keesa ch'iisa. Ato akasile taate, dallansuuni AABBO Waaqa isa ira ingaltu, ammalle harka d'eerefate nama d'aanu fed'a.
26AABBO Waaqi gosa fago jirtu akheekha garsiise, worra muumme lafa jiru fiiquuni yaama. Duuba gochiti sunini hurifte utaalte d'ufti! 27Worra nami tokoleeni indad'abu, yokhaani ingufatu, tokoleeni imugu, yokhaani irafu. Gurdaani worraa infuratu, yokhaani seemsaani kobe worraleeni inch'itu. 28T'iyiti worraa qara qabdi, guubeeni worraleeni had'iisa kurfo jirti. Koteeni fardo worraa akuma d'akhaa jabaati, miili gaari worraa akuma bubbe utaala. 29Askartini worraa akuma nyeench'a bineensa ijeese, fulla nami dandae ira imbuumnetiini baqate itanu itanti.
30Hojja guyyaani sunini gahe, worri akuma bisaani galaana dibbise Israeliti baafata. Nami lafa tana ilaale, dukanaafi gaargala ch'alla arga! Ifsa ya dukanti liqimsite.
Aka Waaqi Isaya yaame
Borana Bible © Bible Society of Kenya, 2019.