Isaya 45
45
1AABBO Waaqi yayu Koreshi fohate hayyu tolche!
Wonti inni fohateefi,
aka inni gosa ch'ufa dabsate,
hayyoota ch'ufa miha isii iraa fuud'u,
AABBO Waaqileeni balbala dira ch'ufa isa dura bana.
Ammalle inni waan Koreshini jed'u,
2Anumati si dura deeme,
gaareenifi kubilele balleese,
lafaani woliqit'eesa.
Anini balbala fullo ta sibiila diimani mid'aasani ch'abse
sibiila isiile ch'ufa bulleesa.
3Anini fulla d'ossa, ta dukana keesaa,
waan dansa sii kenna;
akanaani aka anini AABBO Waaqa beete,
aka Waaqi Israeli maqa keetiini si yaame hubata.
4Maro hojatu tiyya Yakobo
yokhaani Israeli anini fohad'eefi
maqa keetiini si yaame guddinna sii kenna
ato atini na beekhu baatele.
5Anini AABBO Waaqa,
ana male waaqi d'ibiini tokoleeni injiru.
Ato atini na beekhu baatele,
anini irre sii kenna.
6Wonti anini akasi tolchufi,
aka nami lafa keesa jiru ch'ufti,
aka ana AABBO Waaqa male waaqi d'ibiini injirre, beekhu.
7Anini ifsa mid'aase dukanale uume
gaargalaafi nagayale namaatiini d'ufa.
Waan kana ch'ufa ana AABBO Waaqa tolcha.
8Ee gubba, d'uga aka bokaya ga roobi,
duumansi ha d'uga sunini d'ufu;
lafti ha banamte baafami gadi yauti;
d'ugaleeni ha woliini gadi baatu.
Nami waan kana tolchu ana AABBO Waaqa.
Abba uumamatifi ka waan lafa keesati tahe
9 #
Rum 9.20
Okoteeni faara, ta okote ch'ufaani wolifakatu,
dandeete nama isi mid'aaseeni woi imoromti?
D'oqeeni faara nama isii mid'aasuni,
Atini maani hojata injetti?
Okoteeni faara nama isii mid'aasuni dandeete,
Atini woma mid'aasu imbeetu injetti?
10Nami dandae abba ufitini, Atini maani d'alte?
Yokhaani haad'a ufitini,
maaniti garaa kanke keesaa si bahe injed'a?
11AABBO Waaqi qulqullooni Israeli,
ka worra uume waan jed'u:
Isani waan ilmaani tiyya na gaafatani
yokhaani huji anini harka kiyyaani hojad'e nati himtani?
12Nami lafa mid'aase nama isi irati uume anuma.
Harka kiyyaani anini gubba dirirse
aduufi jiaafi urjileeni harka kiyya keesa jirti.
13Anumati Koreshi kaase,
aka inni fed'i tiyya guute wo mid'aasu.
Anini kara inni gula deemule ch'ufa inqajeelchaafi.
Duuba inni dira kiyya jaare,
gumi tiyya ta boojiani tisse tolchanile balchoomsa.
Nami aka inni waan kana tolchu hori isaa kenne
yokhaani isa gumbeese injiru.
14AABBO Waaqi waan Israeliini jed'u,
Horiini lafa Misiritiifi ka lafa Kushi keesani tahe,
worri d'ed'eeraani lafa Seba tisse isanii taha:
worri suni ka sansalatani hid'aani isani gula yaa.
Worri isani durati jilbifate waan jed'u,
D'uguma Waaqi isani woliini jira,
isa male waaqi d'ibiini injiru.
15Waaqi Israeli, ka gumi ufi baasu, Waaqa ufi d'ossu.
16Worra akheekha boch'ani waaqa tolfatu ch'ufa ch'eersani, worri ch'ufti ch'eeraani bada.
17Ammo AABBO Waaqati baafama haga jiru jireennatini
worra Israeli baase,
haga worri jiru ch'ufa ch'eeru d'owa.
18AABBO Waaqi gubba uume — Waaqi isuma!
Inni lafa supe mid'aase,
jabeese waan ind'umanne tolche.
Inni lafa duwa imid'aasine,
ammo fulla nami iti galu tolche.
Ammalle inni waan jed'u,
Anini AABBO Waaqa,
waaqi d'ibiini injiru.
19Anini d'ossani indubbanne,
yokhaani herega kiyya nama ind'ofanne.
Anini worra Israelitini,
lafa duwa keesa na barbaada injenne.
Anini AABBO Waaqa, ka d'uga dubbate
waan qajeela namati himu.
Waaqa lafa ch'ufatiifi akheekha waaqoota d'ara ka worri Babiloni kad'atu
20AABBO Waaqi waan jed'u,
gumi gosa ch'ufaa wolti koota,
isani ka nyaapa keesani jalaa baatani, wolti baha!
Worri mukha boch'e waaqa tolfate sunini yau,
ka waaqa dandae nama imbaamne kad'atu, worra wo beekhuniti!
21Koota, dubbi teesani gaadisati himad'a;
nami dubbi qabu ha wolgaafatuti.
Eenuti waan taha kana duri fage?
Ana AABBO Waaqaniti?
Waaqi gumi ufi baase anuma, ka d'ibiini injiru.
22Nati deebia, baafama argad'a,
isani gumiini lafa ch'ufa keesa jirtu!
Waaqi anuma, na male kad'ibini injiru.
23 #
Rum 14.11; Fil 2.10-11 Anini yayu kakhu jabdu kakhad'e,
dubbini tiyya gara ingaltu:
nami ch'ufti d'ufe, na durati jilbifate,
aka naa saalfatu nati kakhata.
24Worri na baane,
AABBO Waaqa ch'alla keesa d'ugaafi jabeenni jira jed'a.
Nama isa jibbu ch'ufti yo isati d'ufu ch'eera argata.
25Anini, AABBO Waaqi, d'aloota Yakobo ch'ufa baase,
duuba worrileeni na faarsa.
Borana Bible © Bible Society of Kenya, 2019.