Isaya 38
38
1Bara suni Hezekiani fayya d'abe duu gahe. Raagi Isayaani, ilmi Amozi, isa argu d'aqe waan jed'eeni, AABBO Waaqi waan siini jed'u waan kanke ch'ufa mid'aafad'u, d'aamad'u atini d'ukuba kana iraa inhaftu, indoota.
2Jennaani Hezekiani fuula manati deefate Waaqa kad'ate waan jed'e, 3Ee AABBO Waaqa aka anini garaa tokooni si hojad'e si saalfad'e woma atini feetu ch'alla tolche qaabad'u akasi jed'e aka hama bohe.
4Jennaani AABBO Waaqi waan Isayaani jed'e, 5Deebii, waan Hezekiani jettu, Anini, AABBO Waaqi, Waaqi ababo kanke Daudi, yayu kad'acha tante d'agaye imimaani kanke arge. Amma ganna kud'ani shani guyya kanketi sii dara. 6Anini ammalle siifi dira Yerusalemu kana harka hayyu Ashuru keesaa baase, dira sunile jabeese, nyaapa iraa d'owa.
7AABBO Waaqi akheekha kana sii kenne akanaani kakhu isaa guuta. 8Faano hayyu Ahazini jaare gubbaa AABBO Waaqi gaandidu ejata kud'ani dudda duubati deebisa. Duuba gaandiduuni ejata kud'ani dudda duubati deebite.
9Hezekiani fayya d'aba fayye jennaani faaru tana t'aafe waan jed'e,
10Anini ch'imuma tiyya keesa ato jaare ufi injibbaatini
waan due fulla ekheraati deemu ufi sehe,
11waan jed'e,
Lafa tana irati deebie AABBO Waaqafi
nama lubbu qabu inargu.
12Akuma waaro buqisani fuud'ani
lubbu tiyya naraa fuud'ani,
akuma woya naraa kutani wolti dachaasani.
Anini waan Waaqi lubbu nara fuud'u sehe.
13Anini halkani ch'ufa aka waan nyeench'i
lafe na ch'absu jiru d'ukubsad'e bohe,
waan Waaqi lubbu nara fuud'u sehe.
14Qonqooni tiyya laafte
qallatte qonqo sabalisa fakaate.
Waan anini hojja ch'ufa tae Waaqa ilaalufi
ilti na aarte.
Aabbo, gaargala kana ch'ufa keesaa na baasi.
15Ammo anini maani jechu dandaa?
AABBO Waaqati waan kana na tolche.
Garaani na hamate,
hiribi ila keesa na bade.
16Aabbo, anini si male woma inqabu,
jireenni kiyya siuma;
na fayyisi, na jireesi.
17Garaani kiyya ka qara hamate garagale,
amma nagaya horata.
Atini lubbu tiyya waan hamtu ch'ufa duraa baafte,
ch'ubbu tiyya dudda iti galte na araaramte.
18Nami fulla Ekhera jiru
tokoleeni dandae si infaarsu,
ekheraani dandeete si d'ugeefatte si inabdattu.
19Nama lubbu qabuti dandae si faarsa,
akuma anini amma tae si faarsu kana.
Abbootini d'uga tante ilmaani ufii barsiifti.
20AABBO Waaqa, atini la na fayyifte.
Nu ammatana haga jiru kirari d'oofne
Mana kanke keesati si faarsina.
21Duuba Isayaani qara waan jed'e, Mid'aani oda fuud'a, d'ulla isaati mat'ansa, duuba inni infayya. 22Wonti inni akasi jed'eefi hayyu Hezekiani qara, Akheekhi anini Mana Waaqatini seenu kami? Jed'e isa gaafate.
Nama Babiloni d'aamsani d'ufe
(2 Hayyoota 20.12-19)
Borana Bible © Bible Society of Kenya, 2019.