Isaya 30
30
1AABBO Waaqi waan jed'u, Nami lafa Yuda mohatu waan na dideefi ya bade. Worri mala anini worraa ind'aini gula deeme, fed'i tiyya male wold'ageeti woliini tolfate, akanaani dabi worraa guddate. 2Worri ka mala naraa infud'atini lafa Misiri d'aqe, qarqaarsa fed'ata. Worri aka Faraoni worraa kalchu abdate, lafa Misiri d'aqe qarqaarsa kad'ata. 3Ammo Faraoni jabeenna worraani qarqaaru inqabu, qarqaarsi worri Misiri worra qarqaaru muummeeni isaa badiini buufatti. 4Ato nami worri ergatu dira Soanifi Hanesi qara gahele, 5worri Yuda imaaga, waan worri gosa suni, ta hojja worri qarqaarsa fed'u ch'eersite qarqaaru dad'abde, d'ugeefateefi.
6Tunini d'aamsa AABBO Waaqi waan bineensa lafa aloo ka bita d'aamate: worri ergani sunini lafa d'ipufi gaargala gudda qabdu keesa deema, ta nyeench'afi bofafi jaweeni aka male oriitu iti galtu. Worri harreefi gaala miha dadansa iti fae, gosa worra qarqaaru indandeenne geese. 7Qarqaarsi worri Misiri namaa kennu woma imbahu, tanaafi anini worra Misiri Jawe woma keesa injirre jed'e, maqa iti baase.
Gumi Waaqa didu
8Waaqi waan nani jed'e, woraqata fuud'i, aka gumiini tunini jirtu irati t'aafi aka akasiini ch'ubbu worraa tana bara ch'ufa qaabatani. 9Worri kunini hojja ch'ufa Waaqa dide d'ara dubbate barsiisa AABBO Waaqa gula deemu dida. 10Worri waan raagootani jed'u, woma infagina, afaani qabad'a, waan d'uga nuti inhimina, dubbi nu d'aguyu feenu ch'alla nuti hima, d'aruma teennati nu lakisa, 11nu duraa gora, kara nuti induuchina waan Waaqa qulqullo Israeli nuti inhimina.
12Ammo wonti Waaqi qulqullooni Israeli jed'u tana: Isani waan anini isaniini jed'u diddani nama dabsitani sobdani, 13Tanaafi amma wollaala qabdani. Isani naabo d'akhaa ta old'eeresani jaarani ta ammalle jidduti gargari baqate, ta ato nami imbeenne tassa jiddu, fakaatani. 14Akuma okote faara ta ch'ach'abt'e bulloofte, ch'abi isiileeni ch'ile ibida namaa fuud'u dad'abde, yokhaani bisaani bute keesaa namaa infuune fakaatani.
15AABBO Waaqi guddaani qulqullooni Israeli, waan biyyaani jed'u, hojja ch'ubbu iraa deebitani na d'ugeefattani baafamafi jabeenna argattani, ammo isani akasi diddani, 16Waan nani jettani, Hiyo! Akasiniti nu nyaapa keenna dura fardaani baqanna. Inuma baqattani! Mala keesani, fardi keesani guddo oria, ammo worri isani reebu fardooleeni worraa hagasi ira oriiti. 17Isani nami kunki toko yo nyaapa keesani toko ch'alla agartani imbaqattani. Nyaapi keesani nami shani isani ch'ufa imbaqachisa. Duuba baandera keesani, ka gaara gubba ejaanju male, nami tokoleeni ka hafu injiru. 18Ammo taatule, AABBO Waaqi guddo isani nahu fed'a, waan inni guyya ch'ufa waan d'uga tolchufi inni kurfo jira aka naasu ufi isani garsiisu. Ayyaana isaani, ka obse hojja ch'ufa AABBO Waaqa eegatu.
Aka Waaqi gumi ufi eebisu
19Isani, worri Yerusalemu keesa tau, deebitani imbootani. AABBO Waaqi naaso. Hojja qarqaarsa isa kad'atani inni isani qarqaara. 20Aabbo Waaqi d'ipufi gaargala hama isanitini d'ufa, ammo isumati d'ufe isani barsiisa, isani waan deebitani isa barbaaddanifi inqabdani. 21Hojja mirgaafi bita kara iraa gortani, qonqo isani duubaa dubbatu, ta karaani kana, gula deema, jettu d'ageetani. 22Duuba waan isani harkaani boch'ani kad'atani, ta qarsifi worqiini mid'aasani, aka waan t'uri qabaati gadigatani waan jettani, Na biraa bada, nara fagaad'a! 23Hojja mid'aani fach'aaftani, AABBO Waaqi bokaya isani erge mid'aani suni isanii baase sagale guddo isanii kenne, horiini keesanileeni marra guddo argata. 24Qotiyofi harreeni ta oobru teesani qottu okhaya dansa ch'alla nyaati. 25Guyya maneeni jajabdu nyaapa keesani ch'ach'absani worra suni hobaasani, lagi gaareenifi kubilele ch'ufa ufuma dibbise iraa yaa. 26Jii akuma adu ifse, aduuleeni haga duri kaani ira maro torba ifsiti; akanaani ifsaani guyya toko ifsa guyya torba fakaata. Hojja AABBO Waaqi dirmamufi mada gumi isaa hid'e, fayyisu wonti kunini ch'ufti taati.
Aka Waaqi lafa Ashuru gaargalchu
27Me ilaala, jabeennaafi guddinni AABBO Waaqa fago mullachu jira. Ibidaafi aari dallansu isaa garsiise, hojja inni dubbatu dubbini isaa aka ibida wo gubdi. 28Inni bubbe aka fach'aa bisaani, ka waan ch'ufa fud'atu, ufi dura erga. Ammalle inni gosa hafarse balleese bubbeeni sunini gosa ch'ufa wolti harte badi itiini d'ufte mala worraa hamale ch'ufa balleesiti. 29Ammo isani gumiini Waaqa, akuma halkani hojja jila tolfattani gammadaani sirbitani gammadaani. Isani akuma nami hojja fulludo d'ae gammade Mana Waaqa jaba Israeli d'aqu tahu, gammadaani.
30AABBO Waaqi qonqo jabdu nama d'ageesise, irre dallansu isaa nama garsiisa. Ibidaafi bokaya guddaafi bokaya d'akhaani roobufi bokaya muumme inqamneti d'ufa. 31Worri Ashuru qonqo AABBO Waaqa d'ageennaani mudame harka isaatini gaargala argata. 32Akuma AABBO Waaqi worra d'aanuni, gumiini isaa dibbeefi kiraari d'oofte sirbiti. Waaqumati worra Ashuru suni had'e balleesa. 33Duri duri, fulla ibidi guddaani toko hayyu Ashuru iti gubu kurfeesani. Fullaani sunini gadi qile, ammalle ballo, qoraanileeni arti miju. Duuba AABBO Waaqati hafuura isaatini ibida gabaase guba.
Aka Waaqi Yerusalemu qorqoratu
Borana Bible © Bible Society of Kenya, 2019.