Isaya 3
3
1Amma tana AABBO Waaqi guddaani yayu namaafi waan diri Yudatifi ka Yerusalemu jiruuni ch'ufa iraa fuud'uu gahe. Inni sagaleefi bisaani, 2worra jajabaafi askartiifi jaallabootaafi raagootafi yuubaafi jaaroleefi, 3worra gugurda askartitifi worra gurra qabuufi worra nama dura yaufi falfaltule ch'ufa iraa fuud'a. 4AABBO Waaqi ijoolle didiqo worra mohachisa. 5Nami ch'ufti woldabsa, kaimi jaarole insaalfatu, nami seseegi ufitu woma keesa injirre gudda ufiti saalfachuu dida.
6Guyyaani ind'ufa, ka nami balbala gosa toko nama balbala ufi toko fohate waan jed'uuni, Atini waan keeyatu qabda, kai lafa badde ona taate tana gudda iti tahi.
7Ammo inni waan jed'uuni, lakisa, anini indandau, anini sagaleefi woyale inqabu, gudda keesani na intolfatina!
8Yerusalemuni ya badde, Yudaleeni jiguu jirti! Worri waan hojatufi waan dubbatu ch'ufa keesa Waaqaani morka; worri diiduma keesa Waaqa didu jira. 9Fuuli worraleeni aka worri ch'ubbu tolche ingarsiisa; akuma worri Sodoma duri ch'eera d'abe ch'ubbu tolche, worrileeni akasuma tolche. Tunini baddi worrati, ka worri ufiitini d'ufe.
10Nami d'ugaa ingammada, wonti ch'ufti intoltifi. Worri waan hojate iraa wo argata, 11ammo worri ch'ubbu imbada, badiini worraa inooltu. Waan worri duri nama tolche amma worra tolchani.
12Ijoolleeni gumi tiyya dabsite, nad'eeni worra mohatti.
Gumi tiyya, jari isani dura deemu ya kara iraa isani gorse, duuba isani gara yaatani wollaaltani.
Aka AABBO Waaqi gumi ufii qoru
13AABBO Waaqi ya gumi isaa himachu d'ufe; inni aka worra qoru kurfo jiru. 14AABBO Waaqi jaaroleefi jara gumi isaa dura yaule ya qorsumatiini d'ufe; wonti inni worra himatu tana: Isani oobru zabibu saamtani. Mana keesanile ya wonti isani hiyyeesa iraa guuratani guute. 15Isani maanifi gumi tiyya dabsitani hiyyeesa balleesitani? Dubbi tana, ana, AABBO Waaqa guddati, jed'e.
Aka nad'eeni Yerusalemu gorsani
16AABBO Waaqi waan jed'e, me aka nad'eeni Yerusalemu kiyyibdu ilaala! Isiini funnaani, d'aabde ilaani d'iira barbaada yaati. Worri shoobaa yae, faayi worri miilati naqatu qiqilisa. 17Ammo anini ch'ito worrati buuse, mata worraa haade qulqulleese lakisa.
18Guyyaani ind'ufa, ka AABBO Waaqi waan nad'eeni Yerusalemu kiyyibduuni iraa yaasu — faaya worri miilaafi matafi mormaafi 19harkati naqatu. Inni hagogoofi 20kofiaafi, qud'aama worri harkaafi hid'aanati naqatufi 21qube worri qubati naqatufi ta funnaaniti mat'anfatufi 22woya mimid'aadu aka heddu ta worri naqatufi, borsaafi 23woya nafi namaa keesaani mullatuufi woya booftatiifi gaarbisarafi, hagogo worri matati uyifatu — waan kana ch'ufa inni worra iraa fuud'a.
24Worri fulla qayya urgau, inajaa; fulla hanfala mid'aaga hid'atu, haada hid'ati; fulla rifeensa mid'aaga baaftu, imoloofti; fulla woya mid'aaduni yaatu, ch'arqiini yaati; mid'aagumti worraa garagalte ch'eera taati!
25Nami d'iira ka dira suni, jannileeni woraanani dua. 26Balbalti fullo dira laalefate booti, dirileeni niiti qulla lafa teetu fakaata.
Borana Bible © Bible Society of Kenya, 2019.