Isaya 16
16
1Dira seela ka lafa gamooji keesaa, worri Moabu ilmaani hoola toko nama Yerusalemu mohatu gibiraa erga. 2Worri afaani galaana Arnoniti eege, aka simpirre mana ufi keesaa gussani lafa mara. 3Worri waan worri worra Yudatini jed'u, Waan nu taanu nuti hima akuma mukha guyya gudda gaadisa dansaa qabu nu qorqorad'a, nu gaadisa keesani jala boqonna. Nu worra baqa yau; fulla nami tokoleeni nu ingareeti nu d'ossa. 4Lafa teesani keesa nu teesisa, nama nu balleesu fed'u duraa nu baasa. Nami nama dabsufi ka woballeesu hobae, nami lafa yakuleeni ch'ufti imbada. 5Duuba nami d'aloota Daudi toko hayyu tahe, d'ugaafi jaalalani biyya fida. Inni waan d'uga hurrise tolche, ammalle aka nami nama indabsine qorqorata. 6Worri Yuda waan jed'u, Nu ya d'ageenne, aka worri Moabu kiyyibu nu imbeenna, aka worri ufi olfuud'e ufi saadu, ammo wonti worri ufi saadufi injirtu.
7Worri Moabu maro gaargala ufitifi boha. Worri ch'ufti hojja sagale dansa dira Kir-Haresethi ta duri keesati nyaate qaabatu bohe ufi jibbaata. 8Oobru Heshbonitiifi, zabibu Sibmale imballeesani — zabibu daad'iini isii duri nama lafa mohate ch'ufa macheesite. Duri zabibuni sunini haga dira Yaseritifi haga lafa gamooji gara ilaborutifi haga galaana sooda gama suniti ejiti. 9Ammatana anini akuma Yazeri bohu zabibu Sibmatile boha. Imimaani kiyya dira Heshbonitiifi Elealeti maro mid'aani galchani ka nama gammachiisani injirreefi jigani. 10Nami tokoleeni ka oobru keesati gammadu injiru; nami oobru zabibu keesati iyye yokhaani sirbu injiru. Nami tokoleeni zabibu ch'ach'arase, daad'i imid'aafatu; deebiani gammadaani ilalabani. 11Anini laalefad'e Moabu iraa bohe Kiaheresi iraa golgolaa. 12Worri Moabu fulla woyyuma ta gaara gubbatiifi, fulla Waaqa isaani iti kad'atani d'aqe, akasiini ufi dad'absiisa, ammo qarqaarsa womatu iraa inargatani.
13Dubbini AABBO Waaqi waan Moabu dubbate tana. 14Amma tana AABBO Waaqi waan jed'e, ganna saditi, duroomi Moabu kunini inhobaa. Ammalle nama isii heddu kana keesa nama diqaati hafa, sunileeni nama lalaafa taha.
Aka Waaqi worra Shamutifi ka Israelile gaargalchu
Borana Bible © Bible Society of Kenya, 2019.