Esta 5
5
1Guyya sadeeso Estani woya hayyiti keeyatte, deemte balbala hayyu keesa fuula barch'uma hayyuti deefatte ejite. Hayyichi fuula isaa balbalati deefate, barch'uma ufii ira mana suni keesa taa. 2Hayyichi Esta ala ejitu arge jennaani gammade, ule isaa ta worqi isii olqabe. Isiini d'ufte ule taani fiit'e qubaani tut'e. 3Hayyichi waan jed'eeni, Maani, hayyiti Esta? Maani feeta? Ato lafa anini fidu gama toko feetele anini sii keenna. 4Estani waan jetteeni, Wonti ani fed'u, yo sii taate, siifi Hamani galgala kana mana kiyya woliini koota sagale nyaad'a.
5Duuba hayyuuni waan jed'e, Hamani hurrisa gadi yaama, aka waan Estani feetu tolchinu. Jennaani hayyufi Hamaniini sagale Estani mid'aasite nyaachuu d'aqani. 6Ato daad'i d'ugu jiranu, hayyuuni waan Estani jed'e, Atini maani fed'atta? Maani sii tolcha? Ato lafa anini fidu gama toko taatele sii keenna. 7Estani waan jette, 8Wonti ani fed'u ta ani kad'ad'u tana: yo atini na d'ugeefatte, ee hayyicha, ammalle yo sii taate, borile Hamani woliini mana kiyya koota, sagale nyaad'a, hojja suni waan fed'u siti himad'a.
Aka Hamaniini Mordekai ijeesu malate
9Hamaniini, ka gammachu injirre, kae worra biraa deeme; ammo aka Mordekaiini, ka fullo worra hayyutini seenani ke tau, olkae isaa saalfachu dide arge jennaani aka jaba isati dallane. 10Ammo ufi d'owe gale, jaallowaani isaatiifi niiti isaa ta Zereshi jed'ani yaame. 11Ufi d'aade waan jed'e, Dureesa aka kiyya lafa tana keesati ingartani. Ilmaani tiyya heddu, hayyuuni ya guddinna naa dare, hojattu isaa taana ch'ufa ira na dabarse. 12Ammalle inni waan jed'e, Suni malele, hayyiti Estani, nama d'ibi lakifte naafi hayyu ch'alla sagalee yaamte, borile ya nu yaamte. 13Ammo wonti kunini maal na baati, haga anini Yahudichi Mordekai jed'ani kaani, ka fullo hayyu keesa tau argu?
14Jennaani niiti isaa Zereshifi jaallowaani isaa waan jetteeni, Mukha d'ed'eera lama, ka d'eerinni d'und'uma shantama, old'aabi, mukha d'ibi ira dagalchi, bori diirama hayyuuni, Mordekai t'urura kayi, irati fannisi jed'iini; duuba hayyu woliini sagale suni gammadaani nyaachu d'aqi. Dubbini tunini Hamani quufsite, akuma jari suni jed'eeni tolche mukha suni old'aabani.
Aka hayyichi Mordekai ulfinna kenne
Borana Bible © Bible Society of Kenya, 2019.