Efeso 4
4
1Anini ka maro anini Aabbo hojad'uufi na hid'ani, isani kad'ad'a yaamicha Waaqi isani yaame gula yaa. 2#Kol 3.12-13 Ufi olimfuud'ina, laana yaa, waan ch'ufa obsa. Jaalala teesani wolqarqaarsaani agarsiisa. 3Takaa tahiti Lubbuuni namaa kennitu jabeesa qorqorad'a, nagaya takaa isani tolchu suniini. 4Nafa tokofi Lubbu toko ch'allati jira, akuma abdiini toko, ta Waaqi iti isani yaame. 5Aabbo tokofi d'ugefacha tokofi batiso toko ch'allati jira; 6Waaqa toko ch'allati jira ka Abba nama ch'ufaa; inni waan ch'ufa ira jira, waan ch'ufa keesa hojate waan ch'ufa keesa jira.
7Nu nami ch'ufti yayu herega Kristo gula eeba arganne. 8#Far 68.18 Akuma t'aafiini jettu,
gaafa inni gubba olkore
worra hid'ani heddu ufi gula fuud'e,
namale wo kenne.
9Duuba, Inni gubbaa olkore jechuuni maani? Qaraa fiit'e inni gadi bue jetti lafa jalati. 10Namuma gadi bue suniti ammalle achi gubbati oldeebie, aka waan ch'ufa guutu. 11Isati wo namaa kenne; nama gari ergattu tolche, ka gari raaga tolche, ka gari odeesitu dubbi tolche, ka gari tissitu tolche, ka gari barsiiftu tolche. 12Wonti inni waan kana tolcheefi aka gumi Waaqa ch'ufa huji Waaqaati kurfeesu, aka nafa Kristo jaarani. 13Duuba nuuni ch'ufti garaa tokooni, d'ugefacha teennafi beekhuma teenna ta Ilma Waaqaatiini wolti d'umna; nama gugurda taane, haga Kristoni gahu geenna. 14Iti deebine ijoolle d'awaani galaana d'od'ooftu intaanu yokhaani ta barsiisaani nama d'ara ch'ufti chochooftu intaanu, ka malteeni nama d'ibi kara ira gorsu. 15Ammo jaalalaani d'uga dubbanne kara ch'ufaani Kristo, ka mata keenna, keesa guddachu malle. 16#Kol 2.19 Jabeenna isaatiini nafi keenna ch'ufti taka, ammalle nafi ch'ufti mita ufitiini wolti eja. Tanaafi yo mitaani ch'ufti garaa ufitiini hojate, nafi ch'ufti guddate jaalalaani jabaata.
Jireenna duritiifi jireenna haraa
17Maqa Aabbootiini anini waan kana jabeese jed'a: aka worra Waaqa imbeenne, ka qalbiini worraa woma imbaanne, 18ka qalbiini ammalle dukana keesa jirtu intahiina. Worri jireenna Waaqi kennu keesa qooda inqabu; wonti akanatiifi worri daalle woma imbeekhu. 19Ch'eera inqabu huji dabati ufi kenne, waan ch'eera ka aka ch'ufa ka ira ufi ind'owine taha.
20Wonti isani waan Kristo barattani akasiiniti! 21Isani ya waan isaa d'ageetani, ammalle aka nama isa gula yau ya d'uga Yeso keesa jirtu barattani. 22#Kol 3.9 Tanaafi jireenna keesani dullacha duri, ka waan isani duri taatani isani tolche — jireenna duri ka d'araani hamtuuni balleesite baafad'a. 23Garaafi qalbi teesani hareesa tolchu malani. 24#Uum 1.26; Kol 3.10 Jireenna hareesa aka woya fud'ad'a, ka fakeenna Waaqa gula mid'aasani, ammalle ka finna d'uga ka qajeelumafi qulqulloomaani mullatu.
Seera jireenna guyya ch'ufa
25 #
Zek 8.16
Iti deebitani inkiyyibiina duuba! Nami ch'ufti ha oboleesa ufiti d'uga dubbatuuti; wonti akanatiifi nuuni ch'ufti nafa Kristo keesati mita. 26#Far 4.4Yo dalantani, dalansuuni teesani daba keesa isani inseensisiini; dalansuuni aduuni isaniti ind'iini. 27Sheet'ani qoomni inargatiini. 28Nami duri wo hatu ha hanna lakise hojatuuti, aka harka ufitiini ufi bulche hiyyeeyile qarqaaru. 29Hasaa keesati dubbi hamtu injed'ina. Dubbi dansa, ta nama qarqaarte jabeesitu ch'alla jed'a, aka worri d'agayu eeba argatu. 30Lubbu Qulqullo Waaqa ilaalefachiisiina; Lubbuuni tunini beesisa Waaqa ka isani gubba jiru, ka aka guyyaani isani balchoomsani d'ufu agarsiisu. 31Garaa hameennafi, d'araafi dalansu ch'ufa lakisa. Iti deebitani woli loltani woli inarabsina! Ammalle wolinjibiina! 32#Kol 3.13 Ammo arja taha, woli naha, woli araarama, akuma Waaqi maro Kristotiifi isani araarame.
Jireenna ifsa keesa
Borana Bible © Bible Society of Kenya, 2019.