Abba herega 5
5
1Hojja Mana Waaqati kad'achu d'at'u ufi eegad'i; yo wo baracha Mana Waaqa d'at'e ira sii jirti, fulla atini aka worra daalle, ka d'araafi d'uga gargari imbeenne, sorio baaftu. 2Hubatte male indubbatiini, ammalle herega male, Waaqaa wo tolcha injed'ini. Inni gubba jira, atini lafa jirta, tanaafi waan jechu malte male, dubbi ind'eerisiini. 3Akuma atini waan guddo yaadduuni, akasuma oobju hamtu oobjatta; ammalle akuma dubbi guddattuuni, daallumti siti guddatti. 4#Far 66.13-14Yoyu atini Waaqa wo kakhatte, kakhu suni hurrisi guutiifi; inni daalle woma ira inqabu, tanaafi atini waan kakhatte suni guutiifi. 5Fulla kakhu dandeete inguunne kakhattu, yo afaani qabatte ufira teete, ira sii jirti. 6Arabi kanke ch'ubbu keesa si imbuusini, aka hegeri kakhu tante tana ergattu Waaqa durati imormanne. Maafi Waaqa ufiti dallansiifta? Maafi aka inni huji atini tolchitu balleesu iti lakifta? 7Ato guddo oobjatte, huji woma keesa injirre hojatte, yokhaani dubbi d'eeratele, Waaqa sodaachu malte.
Jireenni woma namaa imbahu
8Hojja atini lafa toko keesati hiyyeesa dabsani d'ugaafi qajeeluma d'owani argite, imamiini. Nama gudda ch'ufa nama isa ira jiruti tissa, ammo worra lachule nama worra ira jiruti tissa. 9Hayyuleeni waan lafti baaftu male injiraatu.
10Nami beese jaalatu inquufu; nami durooma barbaadu waan fed'u ch'ufa inargatu. Tuninileeni woma imbaatu. 11Akuma nami hori gudda qabuuni, nama heddu nyaachisa. Tirfiini inni waan kana iraa qabu maani? — Agarta ila male. 12Nami harkaani hojatu, yo waan diqofi guddo nyaatule, hiriba dansa halkani ind'abu. Dureesi ammo ato waan nyaatu guddole qabaate yaadaa imbulu.
13Wonti hamtuuni toko ta anini lafa tana keesati arge tana: nami beese guddo woi jed'e olkayu, 14duuba mudani iti galte, waan ilmaani isaa iraa d'aaltule d'aba. 15#Ayu 1.21; Far 49.17; 1 Tim 6.7 Nami akuma qulla garaa haad'aa keesaa bahe, akasuma lafa tana iraa dua. Ato inni hojate waan guddo qabaatele, gaafa duu harkuma duwa biraa deema. 16Akasi qajeelaniti, ka nami akuma d'ufe deebiu! Inni guddo hojate qilleensa qabichati game, maani argate re? 17Inni dukana keesa laalefachafi gaargalafi dallansufi fayyad'abaani taa.
18Wonti anini arge tana: wonti waan ch'ufa ira dansa, ka namu tolchuu male, aka waan hojate argate nyaate d'uge gammaduuni, haga bulti gabaabdu Waaqi kenneefi tana jiru; jiruuni namaatu tanuma. 19Yo Waaqi duroomafi qabeenna namaa kenne nama macheese, nami sunini sila galata isaa deebise, waan hojate kaale iraa gammadu male. Tunini ch'ufti kenni Waaqaati. 20Waan Waaqi isa gammachiiseefi, inni jireenna isaa gabaaba kana guddo iyyaadu.
Borana Bible © Bible Society of Kenya, 2019.