Abba herega 12
12
1Tanaafi atini Waaqa ka si uume kaimoma kanke keesa qaabad'i, ato guyyaani hamaani, atini gungumte, anini jireenna inqabu jettu, ingahiini. 2Gaafasi ifsaani adutiifi ka jiatiifi ka urjileeni siti dukanaa, ammalle huriini dumansa ta indabarre sira teeti. 3Duuba gaafasi harki kanke ka si qarqaare sirati holate, miili kanke jajabaani kunini sii lalaafa. Ilkaanile ya jaarte buufatte, waan woiini nyaatu inqabdu. Iltileeni ya si waaroofte, aka dansa woma si ingartu. 4Gurrileeni ya si duude, gohanna olla keesale ind'ageetu. Girreesa d'akha daakhutiifi sirba sirbanile laato d'ageeta, ammo ch'iweesi simpirreleeni yoosu lafaa sa si kaasa. 5Fulla goodo ch'ufa sodaatte, deemani si d'ibdi. Rifeensi kanke ch'ufti si arrae chochoule dad'abde, d'arraani woi ch'ufti si keesaa hobaati.
Yo nami fulla ufi ta haga jiru iti boqotu d'aqu, olla keesa guddo isaa bohani. 6Sansalati qarsi ch'ite, ifseeni worqileeni lafa d'oofte ch'ach'abdi; haadi bisaanini gurteesanileeni ch'ite, wodamooni buute ch'abdi. 7Nafi isaa biyyeeti deebie, hafuuri isaa ka jireennale gara Waaqa ka qara isaa kenneti deebia.
8Abbaani Herega waan jed'e, Woma imbaatu, woma imbaatu, wonti tokoleeni woma imbaatu.
Dubbi buufata
9Ammo waan Abbaani Herega sunini qarootifi, inni waan ufi beekhu halkanifi guyya nama barsiise. Inni mammaasa heddu barate qajeelche jed'e. 10Abbaani Herega sunini dubbi nama jabeesitu barbaade, duuba dubbi qajeeltu t'aafe. 11Jechi worra qaro aka ule qara qabdu, ta tissituuni hooliye hooliyeeni woworaante karaati qajeelchituni jira, yokhaani mammaasi wolti guurani akuma d'isa jabeesani gad'aani jira. Jecha kana ch'ufa Waaqa, tissitu nama ch'ufati, namaa kenne.
12Ilma kiyya, waan d'ibi atini eegachu malteti jira. T'aafiini kitaaba waan keesaa bahaniniti, ammalle soomitiini guddooni si dad'absiifti.
13Eegi waan kana ch'ufa jecha toko ch'allati hafa: Waaqa sodaad'i, seera isaa gula deemi; wonti akanatiifi wonti nama iraa fed'ani tana. 14Waaqi waan nu tolchinu, dansaafi hamtule, ta nu d'ossati tolchinule, inqora.
Borana Bible © Bible Society of Kenya, 2019.