Kolosai 2
2
1Eega me, aka anini isanifi worra Laodikia keesa jiru ch'ufaafi worra na imbeennele hojad'e isaniti hima. 2Wonti anini waan kana tolchuufi aka garaani worraa jabaate, worri ch'ufti jaalalaani wolti mataqe, dubbi d'uga ta hubachaani d'uga d'uftuuni argatu. Kara kanaani waan Waaqi duri d'osse argatani, wonti sunileeni Kristo. 3Isati qalibifi herega Waaqa ka d'ossani, namaa mullisa.
4Tanaafi anini amma isaniti hima: nami tokoleeni hasaa d'aratiini isani insobini, ato akuma fed'u dansa fakaatele. 5Wonti akanatiifi ato nafaani isani woliini injirrele lubbuuni woliini jirra; aka isani d'ugefachaani jabaattani Kristo keesa ejattani arginaani anini guddo gammada.
Jireenna qit'e Kristo keesa
6Waan isani Kristo Yeso Aabbo keesani tolfattaniifi, isa keesa taa. 7Hidda keesani isa keesati baasa, jireenna keesani isa gubbati jaarad'a, d'ugefacha teesani keesati jabaad'a, akuma duri isani barsiisani. Hojja ch'ufa galata deebisa.
8Eegad'a, aka nami tokoleeni qalbi nama ta woma imbaaneeni isani insomne. Qalbiini suni waan nami wolbarsiisufi waan herega lafaa iraa d'ufti, Kristo ira ind'uftu. 9Wonti akanatiifi qit'oomi Waaqa ch'ufti nafuma Kristo keesa jira, 10isanileeni ya jireenna mijuu isa keesa argattani. Inni mohachafi jabeenna ch'ufa ira jira.
11Isa keesa qabanqaba isani qabani, qabanqaba nami tolchuuniti ammo qabanqaba Kristoti, ta jabeenna nafa dabdicha kana jala nama baasu. 12#Rum 6.4 Wonti akanatiifi gaafa isani batisani, Kristo woliini isani awaalani, ammalle batiso teesani keesa Kristo woliini duisa keesaa isani kaasani, waan isani jabeenna Waaqaa, ka duisa keesaa isa kaase, d'ugefattaniifi. 13#Efs 2.1-5 Duri isani maro daba keesanitiifi, ammalle waan gosa d'ibi ta Seera qabanqaba jala injirre taataniifi dootani. Ammo amma Waaqi ya kristo woliini isani ijeese! Waaqi ya daba keenna ch'ufa nu araarame. 14#Efs 2.15 Inni ya gati hamtu nu qamnu balleese, seera isii ch'ufale balleese, mukha maskali gubbati fannise. 15Maskali gubbati Kristoni jabeenna mohachafi irre gubba balleese, waan suni ch'ufa aka waan duuli boojie galche diidati nama agarsiise.
16 #
Rum 14.1-6
Tanaafi nami tokoleeni d'ufe waan nyaattani d'uddanifi, jila teesaniifi, yokhaani jila teesani ta baatitifi ta Sabatole, keesa seera isaniti intolchiini. 17Wonti suni ch'ufti gandidu waan hegeriiti; wonti d'uga Kristo. 18Nami tokoleeni waan daayya arguufi waan isani ira jiru ufi sehe waan keesani isani inhanqisiini, yokhaani kara d'aratiini, Ufi diqeesa, malaika kad'ad'a isaniini injed'iini. Nami akana kunini kiyyiba, waan qalbi qabu ufi sehe ammo waan ufi saaduufi inqabu; 19#Efs 4.16 ammalle Kristo, ka mataa isaatu ya jabeesu lakise. Qorqorti Kristo jalati nafi ch'ufti inquufa, mitafi maach'eerati wolti qaba, akuma Waaqi fed'u guddata.
Duisafi jireenna Kristo woliini
20Isani ya Kristo woliini dootani, herega lafa la jalaa baatani. Eesaa aka nama lafa jirtani re? Isani maafi seera, 21Waan kana intuqiina, yokhaani Waan suni inuuniina, yokhaani Waan kaani inqabatina jed'u gula yaatani? 22Wonti kunini ch'ufti barsiisafi seera nami tolche; yo gula deemanile ufuma baddi. 23Seeri kunini d'uguma waan qalbi qabu fakaata, yoyu irreeni malaika kad'ad'a, ufi diqeesa, nafa keesani garagalcha jed'u, Ammo dandae d'araa nafa nama ind'owu.
Borana Bible © Bible Society of Kenya, 2019.